ബി.ബി.സി. ഡല്ഹി, മുംബൈ ഓഫീസുകളിലെ റെയ്ഡ് രാത്രി വൈകിയും തുടരുന്നു. റെയ്ഡിനിടെ ഫോണുകളും ലാപ്ടോപ്പുകളും പിടിച്ചെടുത്തു. ചൊവ്വാഴ്ച പകല് 11.30ഓടെയാണ് ആദായനികുതി ഉദ്യോഗസ്ഥര് റെയ്ഡിനായി ഡല്ഹി, മുംബൈ ഓഫീസുകളില് എത്തിയത്. പോലീസ് സുരക്ഷയിലായിരുന്നു പരിശോധന. നടക്കുന്നത് റെയ്ഡല്ല, സര്വേയാണെന്നായിരുന്നു ആദ്യത്തെ വിശദീകരണം.
ഗുജറാത്ത് കലാപമടക്കം പരാമര്ശിച്ചും നരേന്ദ്ര മോഡിയുടെ പങ്കാളിത്തം വ്യക്തമാക്കിയും ബി.ബി.സിയുടെ ഇന്ത്യ: ദി മോദി ക്വസ്റ്റിയന് എന്ന ഡോക്യുമെന്ററി വന്നതിന് പിന്നാലെയാണ് നടപടി. ഡോക്യുമെൻ്ററി നിരോധിച്ചതുമായി ബന്ധപ്പെട്ട വിവാദങ്ങള് അടങ്ങുന്നതിന് മുമ്പേയാണ് ബി.ബി.ബി. ഓഫീസുകളില് റെയ്ഡ് തുടങ്ങിയത്. അടുത്ത ദിവസവും തുടരും എന്നാണ് സൂചന
ആസ്രൂത്രണം ചെയ്ത് നടപ്പാക്കിയ റെയിഡ്
അന്താരാഷ്ട്ര നികുതിയടക്കമുള്ളവയിലെ ക്രമക്കേടുകള്, ലാഭം വകമാറ്റല്, ബി.ബി.സിയുടെ ഉപകമ്പനികളുടെ ട്രാന്സ്ഫര് വിലനിര്ണ്ണയത്തില് ക്രമക്കേടുകള് എന്നിവ ആരോപിച്ചാണ് ആദായനികുതി പരിശോധന. 2012 മുതലുള്ള രേഖകളാണ് പരിശോധിച്ചുവരുന്നത്.
അഴിമതി കോർപ്പറേഷൻ എന്ന് പരിശോധനയ്ക്കും മുൻപേ ബി ജെ പി
ബി.ബി.സി. റെയ്ഡിനെ പിന്തുണച്ച് ബി.ജെ.പി. രംഗത്തെത്തി. രാജ്യത്തെ നിയമം പാലിക്കുന്നുണ്ടെങ്കില്, മറയ്ക്കാന് ഒന്നുമില്ലെങ്കില് ഭയപ്പെടേണ്ടതില്ലെന്ന് പറഞ്ഞ ബി.ജെ.പി. വക്താവ് ഗൗരവ് ഭാട്ടിയ, ബി.ബി.സിയുടേത് ഇന്ത്യാവിരുദ്ധ പ്രൊപ്പഗണ്ടയാണെന്ന് വിമര്ശിച്ചു. വിഷം ചീറ്റാത്തിടത്തോളം കാലം എല്ലാ സ്ഥാപനങ്ങള്ക്കും പ്രവര്ത്തിക്കാന് അവസരം നല്കുന്ന രാജ്യമാണ് ഇന്ത്യയെന്നും അദ്ദേഹം പറഞ്ഞു. ബി.ബി.സിയെ ലോകത്തിലെ ഏറ്റവും അഴിമതി നിറഞ്ഞ കോര്പ്പറേഷന്നാണെന്നും അദ്ദേഹം പരിഹസിച്ചു.
ശുദ്ധ തെമ്മാടിത്തമെന്ന് എൻ റാം
ബി ബി സി ഓഫീസിലെ പരിശോധന ശുദ്ധ തെമ്മാടിത്തം എന്നാണ് ഹിന്ദു എഡിറ്ററും രാജ്യത്തെ മുതിർന്ന പത്രപ്രവർത്തകനുമായ എൻ റാം വിശേഷിപ്പിച്ചത്. അന്താരാഷ്ട്ര സമൂഹത്തിന് മുന്നിൽ ഇന്ത്യൻ ജനാധിപത്യത്തെ കരിതേക്കുന്ന നടപടി എന്നും വിശേഷിപ്പിച്ചു.
വിനാശകാലേ വിപരീത ബുദ്ധിയെന്ന് എ.ഐ.സി.സി. ജനറല് സെക്രട്ടറി ജയറാം രമേശ് പരിഹസിച്ചു. ഇന്ത്യ ജനാധിപത്യത്തിന്റെ മാതാവ് തന്നെയോയെന്ന ചോദ്യവുമായി സീതാറാം യെച്ചൂരിയും രംഗത്തെത്തി. അദാനിക്കെതിരായ ഹിന്ഡന്ബര്ഗ് വെളിപ്പെടുത്തലില് പ്രതിപക്ഷം സംയുക്ത പാര്ലമെന്ററി സമിതി അന്വേഷണം ആവശ്യപ്പെടുമ്പോള് കേന്ദ്രം ബി.ബി.സിക്ക് പിന്നാലെ പോകുന്നുവെന്ന് കോണ്ഗ്രസ് വിമര്ശിച്ചു. റെയ്ഡ് ദയനീയമായ സെല്ഫ് ഗോളാണെന്ന് പറഞ്ഞ ശശി തരൂര് പറഞ്ഞു. ബി.ബി.സി. ഡോക്യുമെന്ററിക്കെതിരായ പ്രതികാരമായേ ലോകം കാണൂ എന്നും വിമര്ശിച്ചു.
റെയ്ഡിനോട് പൂര്ണ്ണമായി സഹകരിക്കുന്നുണ്ടെന്നായിരുന്നു ബി.ബി.സിയുടെ പ്രതികരണം. എത്രയും പെട്ടെന്ന് പ്രശ്നങ്ങള് പരിഹരിക്കപ്പെടുമെന്നാണ് പ്രതീക്ഷിക്കുന്നതെന്നും ബി.ബി.സി. കൂട്ടിച്ചേര്ത്തു. നടപടികള് നിരീക്ഷിച്ചുവരുന്നുവെന്നായിരുന്നു ബ്രിട്ടീഷ് സര്ക്കാരിന്റെ പ്രതികരണം. ഭരണത്തിലുള്ളവര്ക്കെതിരെ വിമര്ശനം ഉന്നയിക്കുന്ന വാര്ത്താമാധ്യമങ്ങളെ സര്ക്കാര് ഏജന്സികളെ ഉപയോഗിച്ച് ഉപദ്രവിക്കുന്ന നീക്കം തുടര്ച്ചയാവുന്നത് ദുഃഖകരമാണെന്ന് എഡിറ്റേഴ്സ് ഗില്ഡ് ഓഫ് ഇന്ത്യ പ്രതികരിച്ചു.
