ഹിന്ഡന്ബെര്ഗ് റിപ്പോര്ട്ടിനു പിന്നാലെ ഗൗതം അദാനിയുടെ വ്യാജ നിർമ്മിതി പുറത്ത് പറഞ്ഞ് വിക്കിപീഡിയ. അദാനി ഗ്രൂപ്പിൻ്റെ കച്ചവടവും വ്യവസായ ബന്ധങ്ങളും മറ്റുമായി ബന്ധപ്പെട്ട വിക്കിപീഡിയ ലേഖനങ്ങളില് വ്യാജ സ്തുതികൾ ചേർത്തു. അദാനി ഗ്രൂപ്പിലെ ജീവനക്കാരുടെ സംഘം തന്നെ ഇതിനായി പ്രവർത്തിച്ചു. വസ്തുതാപരമല്ലാത്ത വിവരങ്ങള് ഉള്പ്പെടുത്തി തിരുത്തല് വരുത്തുകയായിരുന്നു എന്നാണ് വിക്കിപീഡിയ കണ്ടെത്തൽ
പ്രചാരവേല ലക്ഷ്യമിട്ടുള്ളതും വസ്തുതാപരമല്ലാത്തതുമായ പ്രവൃത്തി, വിക്കിപീഡിയ ലേഖനങ്ങളുമായി ബന്ധപ്പെട്ട് അദാനി ഗ്രൂപ്പ് ജീവനക്കാരുടെ ഭാഗത്തുനിന്നുണ്ടായെന്ന് ഏറെക്കുറേ ഉറപ്പാണെന്ന് വിക്കിമീഡിയ മൂവ്മെൻ്റ് ഓണ്ലൈന് ന്യൂസ്പേപ്പറായ ദ സൈന്പോസ്റ്റിലെ ലേഖനത്തില് വെളിപ്പെടുത്തുന്നു.
വ്യാജ ഐ.ഡിക്കാരും കൂലിയെഴുത്തുകാരുമായ നാല്പ്പതിലധികം പേര് അദാനി കുടുംബവുമായും ബിസിനസുമായും ബന്ധപ്പെട്ട ഒന്പതു ലേഖനങ്ങള് സൃഷ്ടിക്കുകയോ തിരുത്തുകയോ ചെയ്തിട്ടുണ്ടെന്നാണ് സൈന്പോസ്റ്റ് കൃത്യമായി പറയുന്നത്.
ലേഖനങ്ങള് എഡിറ്റ് ചെയ്യുകയും അതില് വസ്തുതാപരമല്ലാത്ത വിവരങ്ങളോ വ്യാജസ്തുതികളോ കൂട്ടിച്ചേര്ത്തിരുന്നു. ഇങ്ങനെ ചെയ്ത നാല്പ്പതിലധികംപേരെ വിക്കിപീഡിയ പിന്നീട് നിരോധിക്കുകയോ വിലക്കുകയോ ചെയ്തിട്ടുണ്ട് എന്നും വെളിപ്പെടുത്തുന്നു.
കമ്പനി ഐ.പി. വിലാസത്തില്നിന്നുള്ള ഒരാള് അദാനി ഗ്രൂപ്പിന്റെ ലേഖനം ആകെ മാറ്റിയെഴുതിയെന്നും സൈന്പോസ്റ്റ് ലേഖനം പറയുന്നു. ഗൗതം അദാനിയെ കുറിച്ചുള്ള ലേഖനം, വ്യാജ അക്കൗണ്ടുകാരായ 25 പേര് എഡിറ്റ് ചെയ്തു. ഇതോടൊപ്പം അദാനി ഗ്രൂപ്പുമായി ബന്ധപ്പെട്ട ലേഖനത്തില് 22 പേര് തെറ്റായ വിവരങ്ങള് കൂട്ടിച്ചേര്ത്തുവെന്നുമാണ് സൈന്പോസ്റ്റ് പറയുന്നത്.
ഹിന്ഡന്ബര്ഗ് റിപ്പോര്ട്ടിനു പിന്നാലെ അദാനി ഗ്രൂപ്പ് വലിയ തിരിച്ചടിയാണ് ഓഹരിവിപണിയില് നേരിടുന്നത്.
