സംസ്ഥാനത്ത് എ.ഐ. ക്യാമറകള് സ്ഥാപിച്ച ശേഷം അപകടം കുറഞ്ഞെന്ന വാദം പച്ചക്കള്ളമാണെന്ന് പ്രതിപക്ഷനേതാവ് വി.ഡി. സതീശന്. അപകടം വർധിക്കയാണ് ചെയ്തതെന്ന് സർക്കാരിൻ്റെ തന്നെ കണക്കുകൾ നിരത്തി അദ്ദേഹം പറഞ്ഞു.
എ.ഐ. ക്യാമറയുടെ പേരില് നടത്തിയ അഴിമതി മറച്ചുവെയ്ക്കാനാണ് റോഡ് അപകടങ്ങളില് വ്യാജ പ്രചാരണം സര്ക്കാര് നടത്തുന്നത്. സംസ്ഥാനത്ത് എ.ഐ. ക്യാമറകള് സ്ഥാപിച്ച ശേഷം അപകടങ്ങള് കുറഞ്ഞെന്ന മുഖ്യമന്ത്രിയുടെയും ഗതാഗതമന്ത്രിയുടെയും വാദം പച്ചക്കള്ളമാണ്. നിയമസഭയിലും പുറത്തും ഈ കള്ളം ആവര്ത്തിച്ചതുകൂടാതെ സര്ക്കാര് ഹൈക്കോടതിയെ തെറ്റിദ്ധരിപ്പിക്കുകയും ചെയ്തു. കള്ളക്കണക്ക് നല്കി ഹൈക്കോടതിയെ കബളിപ്പിക്കാന് ശ്രമിച്ച ഗതാഗതമന്ത്രി സത്യപ്രതിജ്ഞാലംഘനമാണ് നടത്തിയത്. ഒരു നിമിഷം പോലും സ്ഥാനത്ത് തുടരാന് അദ്ദേഹം അര്ഹനല്ല. ഗതാഗതമന്ത്രി രാജിവച്ചൊഴിയണം, വി.ഡി. സതീശൻ പറഞ്ഞു.
ജൂലായ് മാസത്തിൽ 254 അപകടങ്ങൾ കഴിഞ്ഞ വർഷത്തെക്കാൾ
നിയമസഭാ രേഖകള് പ്രകാരം കഴിഞ്ഞ വര്ഷം ജൂണില് 3714 അപകടങ്ങളും ഈ വര്ഷം ജൂണില് 3787 അപകടങ്ങളും ഉണ്ടായി. ജൂലായ് മാസത്തില് കഴിഞ്ഞ വര്ഷത്തെ അപേക്ഷിച്ച് 254 അപകടങ്ങള് കൂടുതലായി ഉണ്ടായി. 2022 ഓഗസ്റ്റില് 3366 അപകടങ്ങളും 307 അപകട മരണങ്ങളും നടന്നപ്പോള് ഈ വര്ഷം ഓഗസ്റ്റില് 4006 അപകടങ്ങളും 353 അപകട മരണങ്ങളുമാണുണ്ടായത്. വസ്തുതകള് ഇതായിരിക്കെ കള്ളക്കണക്ക് നല്കി ഹൈക്കോടതിയെ പോലും തെറ്റിദ്ധരിപ്പിക്കുന്നത് ഗൂഢലക്ഷ്യത്തോടെയാണ്, വി.ഡി. സതീശൻ അഭിപ്രായപ്പെട്ടു.
അഴിമതിയില് മുഖ്യമന്ത്രിയുടെ ബന്ധുക്കള്ക്കുവരെ പങ്കുണ്ടെന്ന് തെളിയിക്കുന്ന രേഖകള് സഹിതമാണ് പ്രതിപക്ഷം ആരോപണം ഉന്നയിച്ചത്. എന്നിട്ടും മറുപടി നല്കാനോ നടപടികള് സ്വീകരിക്കാനോ മുഖ്യമന്ത്രിയോ സര്ക്കാരോ തയാറാകാത്ത സാഹചര്യത്തിലാണ് പ്രതിപക്ഷം കോടതിയെ സമീപിച്ചത്. കോടതിയുടെ പരിഗണനയിലുള്ള ഈ കേസിനെ ദുര്ബലപ്പെടുത്തുകയെന്ന ഗൂഢലക്ഷ്യത്തോടെയാണോ വ്യാജക്കണക്കുകള് നിര്മ്മിച്ചതെന്ന് സംശയിക്കേണ്ടിയിരിക്കുന്നുവെന്നും പ്രതിപക്ഷനേതാവ് പറഞ്ഞു
