നൊവാക് ജോക്കോവിച്ചിന് യുഎസ് ഓപ്പൺ കിരീടം. പുരുഷ സിംഗിൾസ് ഫൈനലിൽ ഡാനിയൽ മെദ്വദേവിനെ പരാജയപ്പെടുത്തി. 24 ാമത്തെ ഗ്രാൻഡ് സ്ലാം വിജയത്തോടെ ഏറ്റവും കൂടുതൽ ഗ്രാൻഡ് സ്ലാം കിരീടങ്ങള് നേടിയ താരമെന്ന റെക്കോർഡിൽ ഇദ്ദേഹം ഓസ്ട്രേലിയൻ വനിതാ താരം മാർഗരെറ്റ് കോർട്ടിനൊപ്പമെത്തി.
യുഎസ് ഓപ്പണിലെ പത്താം ഫൈനലിൽ റഷ്യയുടെ ദാനിൽ മെദ്വദേവിനെ 6–3,7–6,6–3 എന്ന സ്കോറിനാണു ജോക്കോ കീഴടക്കിയത്. 2021ലെ ഫൈനലില് ഇരുവരും ഇവിടെ ഏറ്റുമുട്ടിയപ്പോള് മെദ്വദേവിനായിരുന്നു ജയം.
റെക്കോഡുകൾ ഭേദിച്ച് മുന്നേറ്റം
യുഎസ് ഓപ്പണ് വിജയിക്കുന്ന പ്രായം കൂടിയ പുരുഷ താരമാണ് ജോക്കോവിച്ച്. സിംഗിള്സില് ഏറ്റവും കൂടുതല് ഗ്രാന്ഡ്സ്ലാം നേടിയ പുരുഷതാരമാണ് ജോക്കോവിച്ച്. 22 കിരീടം നേടിയ റാഫേല് നഡാലാണ് തൊട്ടുപിന്നില്. റോജര് ഫെഡററാണ് മൂന്നാം സ്ഥാനത്ത്.
റോജർ ഫെഡറർ കഴിഞ്ഞ വർഷം ടെന്നിസിൽനിന്നു വിരമിച്ചു. അടുത്ത വർഷം കരിയർ അവസാനിപ്പിക്കുമെന്ന് റാഫേൽ നദാൽ പ്രഖ്യാപിച്ചു കഴിഞ്ഞു. മാർഗരെറ്റ് കോർട്ടിൻ്റെ റെക്കോഡുകൾ മറികടന്ന് ഗ്രാൻഡ് സ്ലാമുകളിൽ മുന്നേറാൻ ജോക്കോയ്ക്ക് കരിയർ ഇനിയും ബാക്കിയാണ്.
