കോണ്‍ഗ്രസിന് വോട്ടിങ് ശതമാനത്തില്‍ കാര്യമായ ഇടിവ് വന്നിട്ടില്ല. പക്ഷെ മൂന്ന് സംസ്ഥാനങ്ങളിലും ഭരണം കാത്തിരുന്ന അവസരം കൈവിട്ടു പോയി. സീറ്റുകൾ കുത്തനെ കുറഞ്ഞു. ജനങ്ങൾ പഴത് പോലെ ഒക്കെ കൂടെ നിന്നുട്ടും വിജയമാക്കാൻ ശേഷിയില്ലാതെ പോയി.

2018-ല്‍ ഛത്തീസ്ഗഢിലും മധ്യപ്രദേശിലും രാജസ്ഥാനിലും ശക്തിയായിരുന്ന കോണ്‍ഗ്രസ് 2023 ആയപ്പോൾ ഒരിടത്തും അധികാരം നിലനിര്‍ത്താനാവാതെ കുത്തഴിഞ്ഞു. ഇത്തവണ ഛത്തീസ്ഗഢിലും മധ്യപ്രദേശിലും ഒരു ശതമാനത്തില്‍ താഴെ മാത്രം വോട്ടുകളാണ് കുറവ് വന്നിട്ടുള്ളൂ. മാത്രമല്ല രാജസ്ഥാനില്‍ വോട്ടുകള്‍ വര്‍ധിച്ചിട്ടും 31 സീറ്റുകള്‍ നഷ്ടമായി.

മധ്യപ്രദേശില്‍ 2018-ല്‍ 40.89 ശതമാനം വോട്ടുകള്‍ നേടിയ കോണ്‍ഗ്രസ് 114 സീറ്റുകള്‍ സ്വന്തമാക്കിയിരുന്നു. 2023 ൽ കോണ്‍ഗ്രസ് വോട്ട് വിഹിതത്തില്‍ 0.49 ശതമാനത്തിന്റെ കുറവ് മാത്രമാണ് ഉണ്ടായിരിക്കുന്നത്. എന്നാല്‍ സീറ്റുകളുടെ എണ്ണം 66-ലേക്ക് ചുരുങ്ങി

41.02 ശതമാനം വോട്ടുണ്ടായിരുന്ന ബിജെപിയുടെ വോട്ട് വിഹിതം 48.55 ആയി ഉയർന്നിട്ടുണ്ട് . ഇത് കൃത്യമായ വിജയമാക്കി. 109-ല്‍ നിന്ന് 163 സീറ്റുകളിലേക്ക് സ്കോർ ചെയ്യാൻ സഹായിച്ചു.

മധ്യപ്രദേശില്‍ അപ്രത്യക്ഷമായത് ചെറുപാർട്ടികളാണ്. ബഹുജന്‍ സമാജ്‍വാദി പാർട്ടിക്ക് 2018-ല്‍ 19 ലക്ഷത്തിലധികം (5.01 ശതമാനം) വോട്ടാണ് ലഭിച്ചിരുന്നത്. എന്നാല്‍ ഇത്തവണ ഇത് 14.59 (3.40 ശതമാനം) ലക്ഷമായി ചുരുങ്ങി. 2018-ല്‍ അഞ്ച് ലക്ഷത്തോളം വോട്ടുനേടിയ സമാജ്‌വാദി പാർട്ടിക്ക് ഇത്തവണ ലഭിച്ചത് 1.97 ലക്ഷം മാത്രവും.

ഛത്തീസ്ഗഢില്‍ 2018-ല്‍ കോണ്‍ഗ്രസ് 43 ശതമാനം വോട്ട് വിഹിതത്തോടെ 68 സീറ്റുകളാണ് പിടിച്ചത്. 2023 ആയപ്പോൾ വോട്ട് വിഹിതം 0.77 ശതമാനം മാത്രമാണ് കുറഞ്ഞത്. പക്ഷെ 33 സീറ്റുകളും അധികാരവും കോണ്‍ഗ്രസ് കൈവിട്ടു.

33 ശതമാനം വോട്ടുണ്ടായിരുന്ന ബിജെപി 46.27 ശതമാനത്തിലേക്കെത്തി. 15 സീറ്റില്‍ നിന്ന് 55 സീറ്റുകളിലേക്കും ഉയർന്നു. ഇവരൊന്നും കവർന്നത് കോൺഗ്രസ് വോട്ടുകളല്ല.

ഛത്തീസ്ഗഡിൽ ബഹുജന്‍ സമാജ്‌വാദി പാർട്ടിക്കും (ബിഎസ്‌പി) ജനതാ കോണ്‍ഗ്രസ് ഛത്തീസ്‌ഗഡിനുമാണ് (ജെസിസി) ബിജെപി മുന്നേറ്റത്തില്‍ തിരിച്ചടിയുണ്ടായത്. 2018-ല്‍ ജെസിസി നേടിയത് 7.6 ശതമാനം വോട്ടാണ്, ഇത്തവണയത് 1.23 ശതമാനമായി കുറഞ്ഞു. ബിഎസ്‌പി 3.9 ശതമാനം വോട്ടുവിഹിതം 2.05-ലേക്കും വീണു.

രാജസ്ഥാനില്‍ 2018-നെ അപേക്ഷിച്ച് കോണ്‍ഗ്രസിന്റെ വോട്ട് വിഹിതം വർധിച്ചതായി കാണാം. 39.30 ശതമാനമായിരുന്നത് 39.53 ആയി. 38.08 ശതമാനമുണ്ടായിരുന്ന ബിജെപിയുടെ വോട്ട് വിഹിതം 41.69 ശതമാനത്തിലേക്കെത്തി. ഇവിടെയും പക്ഷെ കോണ്‍ഗ്രസിന് നഷ്ടമായത് 31 സീറ്റുകളാണ്. ബിജെപി 42 സീറ്റും അധികമായി സ്വന്തമാക്കി.

കോണ്‍ഗ്രസിന് സീറ്റ് വ്യത്യാസത്തിലുണ്ടായ ഇടിവ് വോട്ടുവിഹിതത്തില്‍ പ്രത്യക്ഷമല്ല. 2018-ല്‍ 39.30 ശതമാനം വോട്ടുനേടിയ കോണ്‍ഗ്രസിന് ഇത്തവണ 39.53 ആയി ഉയർത്താനുമായിട്ടുണ്ട്. ഭരണം നഷ്ടമായിട്ടുണ്ടെങ്കിലും കോണ്‍ഗ്രസിന്റെ അടിത്തറ രാജസ്ഥാനില്‍ സുരക്ഷിതമാണെന്ന് കണക്കുകള്‍ തെളിയിക്കുന്നു.

തിരിച്ചറിയുമോ കാരണങ്ങൾ

ചെറുപാര്‍ട്ടികളെ കൂടെ നിര്‍ത്തുന്നതിൽ പരാജയമായിരുന്നു. പുതിയ വോട്ടര്‍മാരെ ആകര്‍ഷിക്കാന്‍ സാധിച്ചില്ല. ശാസ്ത്രീയമായ കണക്കു കൂട്ടലുകളും ആസൂത്രണവും പ്രയോഗവും ഇല്ലായിരുന്നു.

ജയറാം രമേഷ് പറഞ്ഞ കണക്കും കഥയും

ഛത്തീസ്ഗഢ്: ബി.ജെ.പി 46.3 %, കോൺഗ്രസ് 42.2 %. മധ്യപ്രദേശ്: ബി.ജെ.പി 48.6 %, കോൺഗ്രസ് 40.4 %, രാജസ്ഥാൻ: ബി.ജെ.പി 41.7 %, കോൺഗ്രസ് 39.5 %

20 വർഷം മുമ്പും കോൺഗ്രസ് സമാന പ്രതിസന്ധി നേരിട്ടിരുന്നെന്ന് ഇന്നലെ ജയറാം രമേഷ് സമൂഹമാധ്യമത്തിൽ കുറിച്ചിരുന്നു. 20 വർഷം മുമ്പ് മൂന്ന് സംസ്ഥാനങ്ങളിൽ പരാജയപ്പെടുകയും ഡൽഹിയിൽ മാത്രം വിജയിക്കുകയും ചെയ്ത സാഹര്യമുണ്ടായിരുന്നു. എന്നാൽ മാസങ്ങൾക്കുള്ളിൽ ലോക്‌സഭ തെരഞ്ഞെടുപ്പിൽ ഏറ്റവും വലിയ ഒറ്റക്കക്ഷിയായി കോൺഗ്രസ് മാറി. കേന്ദ്രത്തിൽ സർക്കാർ രൂപീകരിക്കുകയും ചെയ്തു. പ്രതീക്ഷയോടെയും ആത്മവിശ്വാസത്തോടെയും കോൺഗ്രസ് വരാനിരിക്കുന്ന ലോക്‌സഭ തെരഞ്ഞെടുപ്പിനു വേണ്ടി തയാറെടുക്കുകയാണ് –

എല്ലായിടത്തും വോട്ട് വിഹിതം ഉയർത്തി ബി ജെ പി

മധ്യപ്രദേശ്, ഛത്തീസ്‌ഗഡ്, രാജസ്ഥാന്‍ എന്നിവിടങ്ങളിലെ വിജയത്തോടെ ബിജെപി ഭരിക്കുന്ന സംസ്ഥാനങ്ങളുടെ എണ്ണം പന്ത്രണ്ടായി ഉയർന്നു, മറുവശത്ത് മൂന്നിലേക്ക് കോണ്‍ഗ്രസ് ചുരുങ്ങുകയും ചെയ്തു. മധ്യപ്രദേശ് മാറ്റി നിർത്തിയാല്‍ കോണ്‍ഗ്രസും ബിജെപിയും നമ്മിലുള്ള വോട്ടുവിഹിതത്തില്‍ വലിയ വ്യത്യാസം ഉണ്ടായിട്ടില്ല. എന്നാൽ ബി ജെ പി വോട്ടുകൾ വർധിക്കുക തന്നെയാണ് ചെയ്തിട്ടുള്ളത്.

തെലങ്കാനയിൽ കോൺഗ്രസ്

ബിആർഎസിന് സീറ്റുകള്‍ മാത്രമല്ല വോട്ട് വിഹിതവും ഇടഞ്ഞു പോയിട്ടുണ്ട്. 2018-ല്‍ 46.9 ആയിരുന്നു ബിആർഎസിന്റെ വോട്ടുവിഹിതം, ഇത്തവണയിത് 37.35-ലേക്ക് വീണു.

കോണ്‍ഗ്രസ് തെലങ്കാനയില്‍ തങ്ങളുടെ വേരുറപ്പിച്ചതായാണ് കണക്കുകള്‍ തെളിയിക്കുന്നത്. 2018-ല്‍ കോണ്‍ഗ്രസിന്റെ വോട്ടുവിഹിതം 28.4 ശതമാനം മാത്രമായിരുന്നു, എന്നാല്‍ 2023-ല്‍ ഇത് 39.40 ശതമാനമായി വർധിച്ചു. 11 ശതമാനത്തിലധികം വർധനവാണ് രേഖപ്പെടുത്തിയിരിക്കുന്നത്.

മിസോറമില്‍ ഭരണകക്ഷിയായ എം.എന്‍.എഫിന് വന്‍തിരിച്ചടി നല്‍കി പുതിയ പാര്‍ട്ടിയായ സെഡ്.പി.എം (Zoram People’s Movement) മുന്നേറുന്നു. 40 സീറ്റുകളില്‍ 27 ഇടത്തും സെഡ്.പി.എമ്മാണ് നിലവില്‍ മുന്നില്‍. ഭരണകക്ഷിയായ എം.എന്‍.എഫ്. ഒമ്പതിടത്ത് മാത്രമാണ് മുന്നിലുള്ളത്.

2017-ല്‍ രജിസ്റ്റര്‍ ചെയ്ത പാര്‍ട്ടി വന്‍ ലീഡോടെയാണ് മുന്നേറുന്നത്. കോണ്‍ഗ്രസ് രണ്ടും ബി.ജെ.പി. ഒന്നും സീറ്റുകളില്‍ മാത്രമാണ് ലീഡ് നേടിയത്. എന്നാൽ അതിനിടെ മിസോറമില്‍ അടുത്ത സര്‍ക്കാരിന്റെ ഭാഗമായിരിക്കും ബി.ജെ.പിയെന്ന് സംസ്ഥാന പ്രസിഡന്റ് വാന്‍ലാല്‍മുക പ്രഖ്യാപിച്ചു.

മിസോറമില്‍ സ്ഥിരതയുള്ള ഒരു സര്‍ക്കാര്‍ രൂപവത്കരിക്കാന്‍ കഴിയുമെന്ന് വോട്ടെണ്ണലിന് മുന്‍പുതന്നെ സെഡ്.പി.എം. മുഖ്യമന്ത്രി സ്ഥാനാര്‍ഥിയായ ലാല്‍ഡുഹോമ പ്രഖ്യാപിച്ചിരുന്നു. സേര്‍ഛിപില്‍നിന്നാണ് ഇദ്ദേഹം ജനവിധി തേടുന്നത്.

മുന്‍ ഐ.പി.എസ്. ഉദ്യോഗസ്ഥനായിരുന്ന ലാല്‍ഡുഹോമയാണ് സെഡ്.പി.എമ്മിന്റെ സ്ഥാപകന്‍. ആറ് പ്രാദേശികപ്പാര്‍ട്ടികളെ കൂട്ടിച്ചേര്‍ത്താണ് സെഡ്.പി.എം. സ്ഥാപിച്ചത്. 2017-ല്‍ രജിസ്റ്റര്‍ ചെയ്ത പാര്‍ട്ടി, 2018 മിസോറം തിരഞ്ഞെടുപ്പില്‍ എട്ടു സീറ്റുകള്‍ നേടി കോണ്‍ഗ്രസിനെക്കാള്‍ മുന്നിലെത്തി. 2019-ലാണ് രാഷ്ട്രീയപ്പാര്‍ട്ടിയായി കേന്ദ്ര തിരഞ്ഞെടുപ്പ് കമ്മിഷനില്‍ ഔദ്യോഗികമായി രജിസ്റ്റര്‍ ചെയ്തത്. 1987 ൽ സംസ്ഥാന പദവി നേടയ മുതൽ കോൺഗ്രസും എംഎൻഎഫുമാണ് ഇവിടെ അധികരാം കയ്യാളിയിരുന്നത്.

രാജ്യത്ത് ബിജെപി തനിച്ച് ഭരണം കയ്യാളുന്ന സംസ്ഥാനങ്ങളുടെ എണ്ണം തെരഞ്ഞെടുപ്പ് ഫലത്തോടെ 12 ആയി ഉയർന്നു. ഉത്തരാഖണ്ഡ്, ഹരിയാന, ഉത്തര്‍പ്രദേശ്, ഗുജറാത്ത്, ഗോവ, അസം, ത്രിപുര, മണിപ്പൂര്‍, അരുണാചല്‍ പ്രദേശ് എന്നീ സംസ്ഥാനങ്ങളിൽ ഇപ്പോൾ തന്നെ ബി.ജെ.പി. നേരിട്ട് ഭരണം കയ്യാളുന്നു.

ഈ തിരഞ്ഞെടുപ്പ് ഘട്ടത്തോടെ മധ്യപ്രദേശില്‍ ഭരണം നിലനിര്‍ത്തി. രാജസ്ഥാനും ചത്തീസ്ഗഢും കോണ്‍ഗ്രസില്‍നിന്ന് കൈക്കലാക്കി. ഇതോടെ 12 സംസ്ഥാനങ്ങള്‍. ഒപ്പം മഹാരാഷ്ട്ര, മേഘാലയ, നാഗാലാന്‍ഡ്, സിക്കിം എന്നീ നാലു സംസ്ഥാനങ്ങളില്‍ ബിജെപി മുന്നണിയുമാണ് ഭരിക്കുന്നത്. 16 സംസ്ഥാനങ്ങളിൽ ഭരണത്തിലിരിക്കുന്ന പാർട്ടിയായി ബി ജെ പി

രാജ്യത്തെ രണ്ടാമത്തെ വലിയ ദേശീയപാര്‍ട്ടിയായ കോണ്‍ഗ്രസിന്റെ ഭരണം മൂന്നു സംസ്ഥാനങ്ങളില്‍ ഒതുങ്ങി. കര്‍ണാടക, ഹിമാചല്‍പ്രദേശ് സംസ്ഥാനങ്ങളിലാണ് നിലവില്‍ ഭരണമുള്ളത്. ചത്തീസ്ഗഢും രാജസ്ഥാനും ‘കൈ’വിട്ടതോടെയാണ് ഈ കണക്ക്. ബി.ആര്‍.എസിനെ തകര്‍ത്ത് അധികാത്തിലേക്കെത്തിയ തെലങ്കാനയാണ് ആശ്വാസ തുരുത്ത്. ബീഹാര്‍, ഝാര്‍ഖണ്ഡ് സംസ്ഥാനങ്ങളില്‍ ഭരണമുന്നണിയുടെ ഭാഗമാണ് കോണ്‍ഗ്രസ്. തമിഴ്‌നാട്ടില്‍ ഡി.എം.കെയ്‌ക്കൊപ്പം സംഖ്യമുണ്ടെങ്കിലും സര്‍ക്കാരിന്റെ ഭാഗമല്ല.

2024-ല്‍ സിക്കിം, അരുണാചല്‍പ്രദേശ്, ഒഡിഷ, ആന്ധ്രാപ്രദേശ് എന്നിവിടങ്ങളില്‍ നിയമസഭാതിരഞ്ഞെടുപ്പ് നടക്കും. ജമ്മുകശ്മീരിലും തിരഞ്ഞെടുപ്പ് നടക്കാനുണ്ട്.

പഞ്ചാബിലും ഡല്‍ഹിയിലും ഭരണമുള്ള ആംആദ്മിയാണ് രാജ്യത്തെ മൂന്നാമത്തെ വലിയ ദേശീയ പാര്‍ട്ടി. ബി.ജെ.പി, കോണ്‍ഗ്രസ്, ആംആദ്മി, ബഹുജന്‍ സമാജ് പാര്‍ട്ടി (ബി.എസ്.പി), സി.പി.എം, നാഷണൽ പീപ്പിള്‍സ് പാര്‍ട്ടി (എന്‍.പി.പി) എന്നിങ്ങനെ നിലവില്‍ ആറ് ദേശീയപാര്‍ട്ടികളാണുള്ളത്.

എൻഫോഴ്സ്മെൻ്റ് ഉദ്യോഗസ്ഥർ കൈക്കൂല കേസിൽ അകപ്പെടുകയും ഒരാളെ കയ്യോടെ പിടികൂടുകയും ചെയ്തതോടെ തമിഴ്നാട്ടിൽ ഇഡിയും വിജിലൻസും നേർക്കു നേർ. ഇഡി ഓഫീസിലെ റെയ്ഡ് നിയമവിരുദ്ധവും ദുഷ്ടലാക്കൊടെ ഉള്ളതുമാണെന്ന് ഇഡി തിരിച്ചടിച്ചു. പല പ്രധാന കേസുകളുടെയും ഫയൽ മോഷ്ടിച്ചുതായി വരെ ആരോപണം ഉയർത്തി.

കേസ് രേഖകൾ ഫോണിൽ പകർത്തി. ഈ സാഹചര്യത്തിൽ വിജിലൻസ് ഉദ്യോഗസ്ഥർക്കെതിരെ കേസെടുക്കണം എന്നാണ് ആവശ്യം. തമിഴ്നാട് ഡിജിപിക്ക് ഇഡി രേഖമൂലം പരാതി നൽകി. സുപ്രധാന കേസുകളുടെ അന്വേഷണം ആട്ടിമറിക്കാൻ ശ്രമമെന്നാണ് പരാതി. 

കൈക്കൂലി കേസിൽ കഴിഞ്ഞ ദിവസം, ഇഡി ഉദ്യോഗസ്ഥനെ തമിഴ്നാട് പൊലീസ് അറസ്റ്റ് ചെയ്തിരുന്നു. ഉദ്യോഗസ്ഥനുമൊത്ത് മധുര ഇഡി ഓഫിസിൽ പരിശോധനയും നടത്തി. ഡിണ്ടിഗൽ മധുര ദേശീയപാതയിൽ രാവിലെ 9 മണിക്കാണ് മുതിര്‍ന്ന ഇഡി ഉദ്യോഗസ്ഥൻ അങ്കിത് തിവാരി പിടിയിലായത്. ഡിണ്ടിഗൽ സ്വദേശിയായ ഡോക്ടര്‍ക്കെതിരായ കേസ് ഒത്തുതീര്‍പ്പാക്കാനുള്ള കൈക്കൂലി പണത്തിന്റെ രണ്ടാം ഗഡു വാങ്ങാനെത്തിയപ്പഴായിരുന്നു അറസ്റ്റ്.

ഔദ്യോഗിക വാഹനത്തിൽ ഇരുന്ന് 31 ലക്ഷം രൂപ കൈപറ്റിയതിന് പിന്നാലെ വിജിലൻസ് സംഘമെത്തി തിവാരിയെ അറസ്റ്റുചെയ്തു. പിന്നാലെ ഇയാളുടെ വീട്ടിലും മധുരയിലെ ഇഡി സബ് സോണൽ ഓഫീസിലും പരിശോധനയും നടത്തി.അടുത്തിടെ ഇഡി റെയ്ഡ് നേരിട്ട മണൽ കോൺട്രാക്ടര്‍മാരോടും ഇയാളും മറ്റ് ചില ഉദ്യോഗസ്ഥരും കൈക്കൂലി ആവശ്യപ്പെട്ടതായും വ്യാപകമായ പരാതി ഉയർന്നിരുന്നു.

തെലങ്കാനയിൽ ബിആർഎസിനെ അട്ടിമറിച്ച് കോൺഗ്രസ് ഭരണം പിടിച്ചപ്പോൾ, രാജസ്ഥാനിലും ഛത്തീസ്ഗഡിലും ജനം അവരെ കൈവിട്ടു. മധ്യപ്രദേശിൽ സ്വന്തം നില മെച്ചപ്പെടുത്തി മൂന്നിൽ രണ്ട് ഭൂരിപക്ഷ മികവോടെയാണ് ബിജെപി തുടർച്ച നേടിയത്.

തെലങ്കാനയിൽ ഹാട്രിക് വിജയം പ്രതീക്ഷിച്ചെത്തിയ കെടിആറിന്റെ ബിആർഎസിന്റെ അടിത്തറയിളക്കുന്ന മുന്നേറ്റമാണ് കോൺഗ്രസ് നടത്തിയത്. കോൺഗ്രസ് 70, ബിആർഎസ് 38, ബിജെപി 8, എഐഎംഐഎ 3 എന്നിങ്ങനെയാണ് സീറ്റ് നില.   മുതിർന്ന കോൺഗ്രസ് നേതാവ് രേവന്ദ് റെഡ്ഡി മുഖ്യമന്ത്രിയാകുമെന്നാണ് സൂചന. അദ്ദേഹം അൽപ്പസമയത്തിനകം മാധ്യമങ്ങളെ കാണുമെന്നാണ് വിവരം.

ജയിച്ചു കയറിയ മൂന്നു സംസ്ഥാനത്തും മുഖ്യമന്ത്രിമാരെ മുന്നിൽ നിർത്താതെയാണ് ബി ജ പി പ്രചാരണം നടത്തിയത്. നരേന്ദ്ര മോഡിയും അമിത് ഷായുമായിരുന്നു പ്രചാരണത്തിലെ ഫോക്കസ്. ബി ജെ പി രാഷ്ട്രീയത്തിൻ്റെ തന്നെ ഭാവി മാറ്റിയേക്കാവുന്ന സൂചകങ്ങളായും ഈ ഫലം ആയി തീരുന്നുണ്ട്.

മധ്യപ്രദേശിൽ ബിജെപി ഭരണം നിലനിർത്തിയെങ്കിലും മുഖ്യമന്ത്രിക്കസേരയിൽ ഇളക്കംതട്ടിയേക്കുമെന്ന് റിപ്പോർട്ടുകൾ. ബിജെപി മുഖ്യമന്ത്രി ശിവ് രാജ് സിങ്ങ് ചൌഹാന് പകരക്കാരൻ വന്നേക്കുമെന്ന സൂചനയാണ് ലഭിക്കുന്നത്. തിരഞ്ഞെടുപ്പ് റാലികളിൽ മോദിയും അമിത് ഷായും താരങ്ങളായപ്പോൾ ശിവ് രാജ് സിങ്ങ് ചൌഹാൻ അൽപ്പം പിന്നോട്ടടിച്ച നിലയിലായിരുന്നു. സംസ്ഥാനത്ത് ഏറ്റവും കൂടുതൽ കാലം മുഖ്യമന്ത്രിയായിരുന്ന വ്യക്തിയാണ് ശിവ് രാജ് സിങ്ങ് ചൌഹാൻ.

ചുവന്ന ചതുഷ്കോണം

ഡല്‍ഹി കേന്ദ്രത്തില്‍ നരേന്ദ്രമോദിയേയും ഉത്തര്‍പ്രദേശിലെ ആഗ്രയില്‍ യോഗി ആദിത്യനാഥിനേയും രാജസ്ഥാനിലെ ജയ്പൂരില്‍ യോഗിയുടെ രാജസ്ഥാന്‍ പതിപ്പായ മഹാന്ത് ബാലാക്‌നാഥിനേയും കൂട്ടിയിണക്കി പ്രദേശത്തെ രാഷ്ട്രീയത്തെ നിര്‍ണായകമായി സ്വാധീനീച്ച് വോട്ടുറപ്പിക്കലായിരുന്നു ബിജെപിയുടെ ഗോള്‍ഡന്‍ ട്രയാങ്കില്‍ തന്ത്രം.

അജ്മീര്‍, ഭരത്പൂര്‍, ബിക്കാനീര്‍, ജയ്പൂര്‍, ജോധ്പൂര്‍, കോട്ട, ഉദയ്പൂര്‍ എന്നിവയാണ് രാജസ്ഥാനിലെ സുപ്രധാനമായ ഏഴ് രാഷ്ട്രീയ സ്‌പോട്ടുകള്‍. ഭരത്പൂര്‍, ജയ്പൂര്‍ ഡിവിഷനുകളിലെ മിക്കവാറും എല്ലാ ജില്ലകളും ഉത്തര്‍പ്രദേശിന്റെയും ഹരിയാനയുടെയും അതിര്‍ത്തിയിലാണ്. 2018ലെ തിരഞ്ഞെടുപ്പില്‍ രാജസ്ഥാനില്‍ കോണ്‍ഗ്രസും ബിജെപിയും യഥാക്രമം 99, 73 സീറ്റുകള്‍ നേടിയിരുന്നു. എന്നാല്‍ ഭരത്പൂര്‍, ജയ്പൂര്‍ ഡിവിഷനുകളിലെ സീറ്റുകള്‍ മാറ്റിയാല്‍ കോണ്‍ഗ്രസ്-ബിജെപി സീറ്റുകള്‍ യഥാക്രമം 57, 62 എന്നിങ്ങനെയാകുന്നു. അതായത് ഈ കിഴക്കന്‍ ഭാഗങ്ങളില്‍ അടിപതറിയാല്‍ കോണ്‍ഗ്രസിന് ജയിക്കാന്‍ കൂടുതല്‍ വിയര്‍ക്കേണ്ടി വരുമെന്ന് ബിജെപി കണക്കുകൂട്ടി.

ഗെഹ്ലോട്ട്- സച്ചിന്‍ പൈലറ്റ് തര്‍ക്കം കൂടി ഉടലെടുത്തത് ബിജെപിയ്ക്ക് അനുകൂലഘടകമായി. എങ്കിലും അതിന്റെ മാത്രം ഫലംകൊയ്ത് ഭാഗ്യപരീക്ഷണത്തിന് മുതിരാന്‍ ബിജെപി ഒരുക്കമായിരുന്നില്ല. ബാലാക്‌നാഥ് അടുത്ത മുഖ്യമന്ത്രിയായേക്കുമെന്ന ഒരു പ്രതീതി ബിജെപി സൃഷ്ടിക്കാന്‍ തുടങ്ങി. യാദവ് ജാതിയില്‍പ്പെട്ട അദ്ദേഹത്തെ ഒരു പ്രമുഖ മതനേതാവെന്ന നിലയിലാണ് ബിജെപി ഉയര്‍ത്തിക്കാട്ടിയത്. ശക്തനായ ഹിന്ദുനേതാവെന്ന് പ്രചാരണം നല്‍കുമെന്നും രാജസ്ഥാനില്‍ സമാധാനം ഉറപ്പിക്കാന്‍ കരുത്തനാണ് അദ്ദേഹമെന്ന് ബിജെപി ഉയര്‍ത്തിക്കാട്ടുകയും ചെയ്തു. അക്ഷരാര്‍ത്ഥത്തില്‍ അദ്ദേഹത്തെ രാജസ്ഥാന്റെ യോഗി ആദിത്യനാഥാക്കി.

ബാലാക്‌നാഥിനെ ഉയര്‍ത്തിക്കാട്ടുന്നതോടെ ഹിന്ദു വോട്ടുകള്‍ ഏകീകരിക്കാനാകുമെന്നായിരുന്നു ബിജെപിയുടെ കണക്ക് കൂട്ടൽ. കിഴക്കന്‍ രാജസ്ഥാനില്‍ ഇത് ബിജെപിയ്ക്ക് വലിയ രീതിയില്‍ പ്രയോജനം ചെയ്തു. ഈ മൂന്ന് പോയിന്റുകളും ഇത്തരത്തില്‍ ഒരുപോലെ കരുത്തുറ്റതായാല്‍ സേഫ് സോണായി ഈ ഭാഗം മാറുമെന്ന ബിജെപി തന്ത്രം കൂടിയാണ് വിജയിക്കുന്നത്.

തമ്മിലടി തീർക്കാനാവാതെ

മധ്യപ്രദേശിൽ കോൺഗ്രസ് ഭരണത്തിലെത്തിയാൽ ഉടൻ ജാതി സെൻസസ് നടത്തുമെന്നായിരുന്നു രാഹുൽ ഗാന്ധിയുടെ വാഗ്ദാനം. രാജ്യത്തെ ഒബിസിക്കാർക്കും ഗോത്രവർഗക്കാർക്കും അവരുടെ അവകാശങ്ങൾ കൃത്യമായി നൽകുമെന്നും കോൺഗ്രസ് വാഗ്ദാനം നൽകിയിരുന്നു.

2024ലെ പൊതു തിരഞ്ഞെടുപ്പിൽ ബിജെപിയെ പ്രതിരോധിക്കാൻ ഇന്ത്യ മുന്നണി മുന്നോട്ട് വെച്ച സുപ്രധാന പ്രചാരണായുധമായിരുന്നു ജാതി സെൻസസ്. ജാതി അടിസ്ഥാനമാക്കിയുള്ള സെൻസസ് വേണമെന്നും അതനുസരിച്ച് സംവരണം സാധ്യമാക്കണമെന്നും രാഹുൽ ഗാന്ധി ആവർത്തിച്ച് ആവശ്യപ്പെട്ടതും ഈ ലക്ഷ്യം മുന്നിൽ കണ്ടാണ്. പൊതു തിരഞ്ഞെടുപ്പിന് തൊട്ടു മുൻപായി നടക്കുന്ന അഞ്ച് സംസ്ഥാനങ്ങളിലെ നിയമ സഭ തിരഞ്ഞെടുപ്പുകളിലും ഇതേ ആയുധം തന്നെയാണ് കോൺഗ്രസ് മുന്നോട്ട് വെച്ചത്. എന്നാൽ കോൺഗ്രസിലെ തമ്മിലടിയെ മറികടക്കാൻ ജാതി സെൻസസിനായില്ല 

തിരഞ്ഞെടുപ്പില്‍ പ്രതീക്ഷിച്ച നേട്ടമുണ്ടാക്കാത്ത സാഹചര്യത്തില്‍ ഇന്ത്യാ മുന്നണി യോഗം വിളിച്ച് കോണ്‍ഗ്രസ്. എഐസിസി അധ്യക്ഷന്‍ മല്ലികാര്‍ജുന്‍ ഖാര്‍ഗെയുടെ വസതയില്‍ ആറാം തീയതി യോഗം ചേരും.

അതിനിടെ, തെലങ്കാനയില്‍ വിജയിച്ച എംഎല്‍എമാരെ കര്‍ണാടകയിലേക്ക് മാറ്റാന്‍ കോണ്‍ഗ്രസ്. ഹൈദരബാദിലെ താജ് കൃഷ്ണ ഹോട്ടലില്‍ എംഎല്‍എമാരെ കൊണ്ടുപോകാനായി ബസുകള്‍ എത്തിച്ചു. 

ലോക്സഭ തെരഞ്ഞെടുപ്പിൻ്റെ സെമി ഫൈനൽ എന്ന് വിശേഷിപ്പിക്കപ്പെട്ട തെരഞ്ഞെടുപ്പിൽ ബി ജെ പി മുന്നേറ്റം. ഇന്ത്യ സംഖ്യം ഇനിയും ഉരുത്തിരിഞ്ഞില്ലെന്ന സൂചനകളോടെ കോൺഗ്രസ് പ്രതീക്ഷകൾക്ക് തിരിച്ചടി. ദക്ഷിണേന്ത്യയിൽ മാത്രമാണ് വോട്ടർമാർ ആനുകൂല്യം കാണിച്ചിട്ടുള്ളത്.

തെലങ്കാനയിൽ ബിആർഎസിനെ അട്ടിമറിച്ച് കോൺഗ്രസ് ഭരണം പിടിച്ചപ്പോൾ, രാജസ്ഥാനിലും ഛത്തീസ്ഗഡിലും ഭരണം അവരെ കൈവിട്ടു. മധ്യപ്രദേശിൽ സ്വന്തം നില മെച്ചപ്പെടുത്തി മികച്ച വിജയം നേടാനായി. ബിജെപി ഇതോടെ ഹിന്ദി ഭൂമിയിൽ കരുത്ത് ചോരാതെ നിൽക്കുന്ന കാഴ്ചയാണ്.

മധ്യപ്രദേശിൽ പ്രതീക്ഷിച്ചതിലും വലിയ വിജയമാണ് ബിജെപി നേടിയത്. ഇതിന് മുമ്പ് 165 സീറ്റ് വരെ നേടിയ ചരിത്രമുള്ള ബിജെപി 162 സീറ്റുകളിൽ വരെ ലീഡ് തുടരുകയാണ്. മധ്യപ്രദേശില്‍ ആകെയുള്ളത് 230 സീറ്റുകളാണ്. ഭോപ്പാലിലെ പാർട്ടി ആസ്ഥാനത്ത് ബിജെപി പ്രവർത്തകർ പടക്കം പൊട്ടിച്ചും മധുരപലഹാരം വിതരണം ചെയ്തും വിജയാഹ്ളാദം പങ്കുവച്ചു.

രാജസ്ഥാനിൽ കോൺഗ്രസിന് പതിവ് ദൌർബല്യങ്ങളെ മറികടക്കാൻ കഴിഞ്ഞിരുന്നില്ല. ഗ്രൂപ്പുകളും ഉപഗ്രൂപ്പുകളുമായി വോട്ട് കേന്ദ്രീകരണത്തെ ദുർബലപ്പെടുത്തി. ജനങ്ങളെയും മടുപ്പിച്ചു. 199 സീറ്റുകളിൽ 114 സീറ്റുകളിൽ ബിജെപി ലീഡ് തുടരുമ്പോൾ 64 ഇടത്ത് കോൺഗ്രസ് ലീഡ് തുടരുകയാണ്. ബിഎസ്‌പി രണ്ടും മറ്റുള്ളവർ 18 ഇടത്തും ലീഡ് നേടി.

രാജസ്ഥാൻ, മധ്യപ്രദേശ്, ഛത്തീസ്ഗഡ്, തെലങ്കാന, മിസോറാം എന്നീ അഞ്ച് സംസ്ഥാനങ്ങളില്‍ നടന്ന നിയമസഭാ തെരഞ്ഞെടുപ്പില്‍, നാലിടങ്ങളില്‍ വോട്ടെണ്ണല്‍ ആരംഭിച്ചു. രാവിലെ എട്ടു മണി മുതല്‍ ആരംഭിക്കുന്ന വോട്ടെണ്ണലില്‍, ആദ്യ ഫലസൂചനകൾ പുറത്തു വന്നു.

മധ്യപ്രദേശില്‍ 230 സീറ്റുകളിലെയും രാജസ്ഥാനില്‍ 199 സീറ്റുകളിലെയും ഛത്തീസ്ഗഡില്‍ 90 സീറ്റുകളിലേയും തെലങ്കാനയിലെ 199 സീറ്റുകളിലെയും ജനവിധിയാണ് ഇന്ന് അറിയുക.

തെക്ക് തെലങ്കാനയിൽ കോൺഗ്രസ്

ഭരണവിരുദ്ധ വികാരം വീശിയടിച്ച തെലങ്കാനയിൽ ആദ്യ ഫല സൂചനകളിൽ കോൺഗ്രസിന് പ്രതീക്ഷ നൽകുന്ന ഫലങ്ങളാണ് പുറത്തുവരുന്നത്. ബിആർഎസിനെ പിന്നിലാക്കി കേവലഭൂരിപക്ഷവും മറികടന്നാണ് കോൺഗ്രസിന്റെ കുതിപ്പ്. കോൺഗ്രസ് 70, ബിആർഎസ് 37, ബിജെപി 8, എഐഎംഐഎം 3, മറ്റുള്ളവർ 1 എന്നിങ്ങനെയാണ് ലീഡ് നില. കെ ചന്ദ്രശേഖർ റാവുവിന്റെ ടിആർഎസ് ദേശീയതലത്തിലേക്ക് രാഷ്ട്രീയം വ്യാപിക്കാനുള്ള ശ്രമങ്ങളിലായിരുന്നു. ഇതിന്റെ ഭാഗമായാണ് ബിആർഎസ് എന്ന് പാർട്ടിയെ പുനർനാമകരണം ചെയ്തത്.  

ചത്തീസ്ഗഡിൽ

ഛത്തീസ്ഗഡിൽ വാശിയേറിയ മത്സരമാണ് നടന്നതെന്ന സൂചനയാണ് ഇപ്പോൾ പുറത്തുവരുന്നത്. 46 ഇടത്ത് കോൺഗ്രസും 42 ഇടത്ത് ബിജെപിയും ലീഡ് ചെയ്യുന്നു. ബി എസ് പി, മറ്റുള്ളവർ എന്നിവർക്കൊന്നും ആർക്കും ലീഡ് നേടാനായിട്ടില്ല. തുല്യമായി മാറിമറുയുന്ന ലീഡാണ് ഇവിടെ രണ്ടാം ഘട്ടത്തിൽ കാണുന്നത്.

രാജസ്ഥാനിൽ കലഹത്തിൽ കടപുഴകി കോൺഗ്രസ്

രാജസ്ഥാനിൽ ബിജെപി വ്യക്തമായ ലീഡുമായി മുന്നേറ്റം തുടങ്ങി. ബിജെപി 110, കോൺഗ്രസ് 75, മറ്റുള്ളവർ 12, ബി എസ് പി 2 എന്നിങ്ങനെയാണ് നിലവിലെ ലീഡ് നില. അശോക് ഗെഹ്ലോട്ടിനും കൂട്ടർക്കും ഭരണം നഷ്ടമാകുമോയെന്ന കടുത്ത ആശങ്കയിൽ പാർട്ടി കേന്ദ്രങ്ങൾ. വലിയ തിരിച്ചുവരവുകളൊന്നും സംഭവിച്ചെങ്കിൽ നിലവിലെ സാഹചര്യത്തിൽ വസുന്ധര രാജെയുടെ നേതൃത്വത്തിലുള്ള ബിജെപി സർക്കാർ നിലവിൽ വരുമെന്നാണ് പ്രതീക്ഷിക്കപ്പെടുന്നത്.

ഫലശ്രുതി

മധ്യപ്രദേശ്, രാജസ്ഥാൻ, ഛത്തീസ്ഗഢ് എന്നിവിടങ്ങളിൽ ആദ്യ ട്രെൻഡുകൾ കടുത്ത മത്സരത്തിന്റെ സൂചനയാണ് നൽകുന്നത്. തെലങ്കാനയിൽ കോൺഗ്രസിന് മുൻതൂക്കമുണ്ട്. അടുത്ത വർഷം നടക്കാനിരിക്കുന്ന പൊതുതിരഞ്ഞെടുപ്പിന് മുമ്പ് ഭാരതീയ ജനതാ പാർട്ടി (ബിജെപി), കോൺഗ്രസ്സ്, അവരുടെ ചില വലിയ നേതാക്കൾ എന്നിവരുടെ ഭാവി തീരുമാനിക്കുന്നതാണ്  ഞായറാഴ്ചത്തെ ഫലങ്ങൾ.

പൊതുതിരഞ്ഞെടുപ്പ് മുന്നിൽക്കണ്ടാണ് ബിജെപിയും കോൺഗ്രസും തെരെഞ്ഞെടുപ്പ് തന്ത്രങ്ങൾ മെനഞ്ഞത്. കഴിഞ്ഞ വർഷം ഗുജറാത്തിലും ത്രിപുരയിലും വിജയിച്ചെങ്കിലും കർണാടകയിലും ഹിമാചൽ പ്രദേശിലും പരാജയം ഏറ്റുവാങ്ങിയ ബി.ജെ.പിക്ക് ലോക്‌സഭാ തെരഞ്ഞെടുപ്പിന് മുന്നോടിയായി അവർക്ക് അനുകൂലമായ മുന്നേറ്റം സൃഷ്ടിക്കാൻ വിജയങ്ങൾ ആവശ്യമാണ്. മറുവശത്ത്, ‘ഇന്ത്യാ’ ബ്ലോക്കിലെ സഖ്യകക്ഷികളുമായുള്ള സീറ്റ് വിഭജന ചർച്ചകളിൽ കോൺഗ്രസിന് മുൻതൂക്കം നൽകുമെന്ന് പ്രതീക്ഷിക്കുന്ന രണ്ട് സംസ്ഥാനങ്ങൾ വിജയം കാണാൻ ഉള്ള തീവ്രശ്രമത്തിലായിരുന്നു.