യെമനി പൗരനെ കൊലപ്പെടുത്തിയ കേസില് വധശിക്ഷയ്ക്ക് വിധിക്കപ്പെട്ട് കഴിയുന്ന നിമിഷ പ്രിയയുടെ കുടുംബത്തിൻ്റെ യാത്ര വിലക്കി കേന്ദ്ര സർക്കാർ. കുടുംബം ഇപ്പോള് യെമെന് സന്ദര്ശിക്കുന്നത് യുക്തിപരമല്ലെന്ന് കേന്ദ്രം അറിയിച്ചു. തീരുമാനം പുനഃപരിശോധിക്കണമെന്ന് കേന്ദ്ര വിദേശകാര്യ മന്ത്രാലയം കത്ത് നല്കി.സനയിലെ ജയിലിലാണ് നിമിഷ പ്രിയ ഇപ്പോൾ. മോചന ശ്രമങ്ങളുടെ ഭാഗമായായിരുന്നു കുടുംബവും ആക്ഷൻ കമ്മിറ്റി ഭാരവാഹികളും യാത്ര ആസൂത്രണം ചെയ്തത്.
ശരിയത്ത് നിയമ പ്രകാരമുളള ‘ബ്ലഡ് മണി’ കൊല്ലപ്പെട്ട തലാല് അബ്ദുമഹ്ദിന്റെ കുടുംബം സ്വീകരിച്ചാല് ശിക്ഷയില് ഇളവ് ലഭിക്കാന് സാധ്യത ഉണ്ടെന്നറിഞ്ഞാണ് യാത്ര ആസൂത്രണം ചെയ്തത്.
എന്നാല് നിമിഷപ്രിയയുടെ കുടുംബം യെമെന് സന്ദര്ശിച്ചാല് അവിടുത്തെ സൗകര്യങ്ങള് ഒരുക്കാന് സര്ക്കാരിന് കഴിയില്ലെന്ന് വിദേശകാര്യ മന്ത്രാലയത്തിലെ ഡയറക്ടര് തനുജ് ശങ്കര് നൽകിയ കത്തിൽ പറയുന്നു. യെമെനിലെ ആഭ്യന്തര സാഹചര്യങ്ങള് കാരണം എംബസി ജിബുട്ടിയിലേക്ക് മാറ്റിയിരിക്കുകയാണ്. സനയിലെ സര്ക്കാരുമായി നിലവില് ഔപചാരിക ബന്ധങ്ങള് ഇല്ല എന്നതാണ് പ്രശ്നം.
വധശിക്ഷയ്ക്കെതിരെ നല്കിയ അപ്പീല് നവംബര് 13-ന് യമനിലെ സുപ്രീം കോടതി തള്ളിയിരുന്നു. യെമെന് പൗരന് തലാല് അബ്ദുമഹ്ദി 2017-ല് കൊല്ലപ്പെട്ട കേസില് ലഭിച്ച വധശിക്ഷയില് ഇളവു നല്കണമെന്ന നിമിഷപ്രിയയുടെ ആവശ്യം നേരത്തെ യെമെന് കോടതിയും തള്ളിയിരുന്നു.
ഈ സാഹചര്യത്തില് മോചന ചര്ച്ചകള്ക്കായി യെമെന് സന്ദര്ശിക്കാന് പ്രേമകുമാരിക്ക് പുറമെ, മകള് മിഷേല് ടോമി തോമസ്, സേവ് നിമിഷ പ്രിയ ഇന്റര്നാഷണല് ആക്ഷന് കൗണ്സില് ട്രഷറര് കുഞ്ഞ് അഹമ്മദ് നടുവിലക്കണ്ടി, കോര് കമ്മിറ്റി അംഗം സജീവ് കുമാര് എന്നിവരാണ് യമനിലേക്ക് യാത്ര അനുമതി തേടിയത്.
നിമിഷപ്രിയ കേസ് ഇങ്ങനെയാണ്
പാലക്കാട് കൊല്ലങ്കോട് തേക്കിന്ചിറ സ്വദേശിനിയാണ് നിമിഷ പ്രിയ. തലാല് അബ്ദുള് മഹ്ദിയെന്ന യെമന് സ്വദേശിയെ കൊലപ്പെടുത്തിയെന്നാണ് നിമിഷയ്ക്കെതിരേയുള്ള കേസ്. കൊല്ലങ്കോട് മാത്തൂരിലെ തോട്ടം കാര്യസ്ഥനായിരുന്ന തൊടുപുഴ സ്വദേശിയായ ടോമിയെ വിവാഹം കഴിച്ച് 2012ലാണ് നിമിഷപ്രിയ യെമനില് നഴ്സായി ജോലിക്ക് പോയത്. ഭര്ത്താവ് സ്വകാര്യ സ്ഥാപനത്തിലും നിമിഷ ക്ലിനിക്കിലും ജോലിനേടി. അതിനിടെ യെമന് പൗരനായ തലാല് അബ്ദുള് മഹ്ദിയെ പരിചയപ്പെടുകയും ഇരുവരും ചേര്ന്ന് കച്ചവട പങ്കാളിത്തത്തോടെ ക്ലിനിക്ക് തുടങ്ങാനും തീരുമാനിച്ചു. യെമൻ പൗരന്റെ ഉത്തരവാദിത്തത്തോടെയല്ലാതെ ക്ലിനിക്ക് ആരംഭിക്കാനാവില്ല എന്നതിനാലാണ് മഹ്ദിയുടെ സഹായം തേടിയത്. ബിസിനസ് തുടങ്ങാന് നിമിഷയും ഭര്ത്താവും തങ്ങളുടെ സമ്പാദ്യമെല്ലാം മഹ്ദിക്ക് കൈമാറിയിരുന്നു. ബിസിനസ്സിന് കൂടുതല് പണം ആവശ്യമുള്ളതിനാല് നിമിഷയും ഭര്ത്താവും മിഷേല് എന്ന മകളുമൊത്ത് നാട്ടിലേക്ക് വന്നു. പിന്നീട് നാട്ടില് നിന്ന് യെമനിലേക്ക് തിരിച്ചുപോയത് നിമിഷ മാത്രമായിരുന്നു. ബിസിനസ് പച്ചപിടിക്കുമെന്നും മഹ്ദി ചതിക്കില്ലെന്നുമായിരുന്നു ഇവരുടെ വിശ്വാസം. നിമിഷപ്രിയ പോയതിന് ശേഷം യെമനിലേക്ക് തിരിച്ചുപോവാനായിരുന്നു ടോമി ഉദ്ദേശിച്ചതെങ്കിലും യെമന്-സൗദി യുദ്ധത്തെ തുടര്ന്ന് ആ യാത്രയും മുടങ്ങി.
ബിസിനസ് പങ്കാളിയെന്ന നിലയില് ആദ്യമാദ്യം മാന്യമായി ഇടപെട്ടിരുന്ന മഹ്ദിയുടെ സ്വഭാവം പിന്നീട് പ്രതീക്ഷിക്കാത്ത രീതിയിലേക്ക് മാറി. മഹ്ദിയുമായി ചേര്ന്ന് ക്ലിനിക്ക് തുടങ്ങിയശേഷം താന് ഭാര്യയാണെന്ന് പലരേയും വിശ്വസിപ്പിച്ചു. വ്യാജ വിവാഹ സര്ട്ടിഫിക്കറ്റ് ഉണ്ടാക്കി. പിന്നീട് ഭീഷണിപ്പെടുത്തി മതാചാരപ്രകാരം വിവാഹം നടത്തി. ഇരുവരും ചേര്ന്ന് ആരംഭിച്ച ക്ലിനിക്കിലെ വരുമാനം മുഴുവന് തലാല് സ്വന്തമാക്കി. പാസ്പോര്ട്ട് തട്ടിയെടുത്തു. സ്വര്ണമെടുത്ത് വിറ്റു. അധികൃതര്ക്ക് പരാതി നല്കിയ നിമിഷപ്രിയയെ മഹ്ദി മര്ദനത്തിനിരയാക്കി. ജീവന് അപകടത്തിലാകുമെന്ന ഘട്ടത്തിലാണ് താന് മഹ്ദിയെ അപായപ്പെടുത്താന് ശ്രമിച്ചത് എന്നാണ് നിമിഷപ്രിയയുടെ വാദം.
യെമന് പൗരനായ തലാല് അബ്ദുള് മഹ്ദിയുടെ മാനസിക-ശാരീരിക പീഡനത്തില് നിന്ന് രക്ഷപ്പെടാനായി മഹ്ദിയെ കൊലപ്പെടുത്തിയെന്നതാണ് നിമിഷപ്രിയയ്ക്കെതിരേയുള്ള കേസ്. 2017ലായിരുന്നു സംഭവം. പുതിയതായി തുടങ്ങിയ ക്ലിനിക്കിലെ സാമ്പത്തിക കാര്യങ്ങളില് തുടങ്ങിയ തര്ക്കങ്ങളും മര്ദനവും അകല്ച്ചയും നിയമനടപടികളുമാണ് മഹ്ദിയെ മയക്കുമരുന്ന് കുത്തിവെക്കുന്നതിലേക്ക് എത്തിച്ചത്. തലാല് തന്നെ വഞ്ചിച്ച് ലക്ഷക്കണക്കിന് രൂപയാണ് തട്ടിയെടുത്തത്, പാസ്പോര്ട്ട് പിടിച്ചുവെച്ച് നാട്ടില് വിടാതെ പീഡിപ്പിച്ചു, ലൈംഗിക വൈകൃതങ്ങള്ക്ക് ഇരയാക്കി, തോക്കുചൂണ്ടി ഭീഷണിപ്പെടുത്തുകയും ചെയ്തു. നിമിഷയുടെ സഹപ്രവര്ത്തകയായിരുന്ന ഹനാന് എന്ന യെമനി യുവതിയും മഹ്ദിയുടെ മര്ദനത്തിന് നിരന്തരം ഇരയായിരുന്നു. പാസ്പോര്ട്ട് വീണ്ടെടുത്ത് രക്ഷപ്പെടാനുള്ള മാര്ഗം നിമിഷയ്ക്ക് പറഞ്ഞുകൊടുത്തതും ഹനാനാണ്. ഇതിനായി തലാലിന് അമിത ഡോസിൽ മരുന്നു കുത്തിവെയ്ക്കുകയായിരുന്നു. മഹ്ദിക്ക് ബോധം പോയ നേരം പാസ്പോര്ട്ടും കണ്ടെടുത്ത് രക്ഷപ്പെടാന് ശ്രമിച്ചപ്പോള് അതിര്ത്തിയില്വെച്ച് പിടിയിലായി എന്നാണ് നിമിഷപ്രിയ കോടതിയില് പറഞ്ഞത്. എന്നാല് മഹ്ദിയുടെ മൃതദേഹം അവര് താമസിച്ചിരുന്ന വീടിന് മുകളിലെ ജലസംഭരണിയില് വെട്ടിനുറുക്കിയ നിലയില് കണ്ടെത്തിയതാണ് നിമിഷപ്രിയയെ കുടുക്കിയത്.
മയക്കുമരുന്ന് കുത്തിവെച്ചതിന് ശേഷം സംഭവിച്ചതിനെ കുറിച്ച് തനിക്കൊന്നുമറിയില്ലെന്നാണ് നിമിഷപ്രിയ കോടതിയില് പറഞ്ഞത്. അറബിയില് തയ്യാറാക്കിയ കുറ്റപത്രത്തില് തന്നെ നിര്ബന്ധിച്ച് ഒപ്പിടുവിപ്പിക്കുകയായിരുന്നു. കോടതിയില് ദ്വിഭാഷിയുടെ സേവനം പോലും നിഷേധിക്കപ്പെട്ടു. സംഭവത്തിന് കൂട്ടുനിന്ന ഹനാന് ജീവപര്യന്തവും തനിക്ക് വധശിക്ഷയും വിധിച്ചത് ന്യായമല്ല, മരിക്കണമെന്ന ഉദ്ദേശത്തോടെയല്ല മരുന്നു കുത്തിവെച്ചത് തുടങ്ങിയ നിമിഷയുടെ വാദങ്ങളൊന്നും എവിടേയും പരിഗണിക്കപ്പെട്ടില്ല. വിചാരണയ്ക്ക് ശേഷം 2018ല് യെമന് കോടതി ഇവര്ക്ക് വധശിക്ഷ വിധിച്ചു. അപ്പീല് പോയെങ്കിലും യെമനിലെ അപ്പീല് കോടതിയും വധശിക്ഷ 2020ല് ശരിവെച്ചു. ശിക്ഷ ഇളവ് ചെയ്യണമെന്ന് ആവശ്യപ്പെട്ട് നിമിഷപ്രിയയുടെ അമ്മ കേന്ദ്ര സംസ്ഥാന സര്ക്കാരുകള് മുഖേന യെമന് സര്ക്കാരിന് നിവേദനം നല്കിയിരുന്നെങ്കിലും അത് പരിഗണിച്ചില്ല.
