ദുരന്തം വിതച്ച ഉരുള്‍പൊട്ടലിനെ അതിജീവിച്ച നാലാം ക്ലാസ് വിദ്യാര്‍ഥി അര്‍ഷലിനെ സന്ദര്‍ശിക്കാൻ മന്ത്രി എംവി ഗോവിന്ദന്‍ എത്തി. ഉരുളിനെയും ഇരുളിനെയും ധൈര്യത്തോടെ നേരിട്ട കുഞ്ഞുമിടുക്കന്‍ എന്ന് ആർഷലിലനെ മന്ത്രി വിശേഷിപ്പിച്ചു.

ഉരുള്‍പൊട്ടി വരുന്ന ഉഗ്രശബ്ദം കേട്ടാണ് ഈ എട്ട് വയസുകാരന്‍ വീട്ടില്‍ നിന്നിറങ്ങി കാട്ടിലേക്ക് ഓടിയത്. തുടക്കത്തില്‍ ഒപ്പം വീട്ടുകാരുണ്ടായിരുന്നെങ്കിലും, മഴയും ഇരുട്ടും അര്‍ഷലിനെ ഒറ്റയ്ക്കാക്കി.

രണ്ടുമണിക്കൂറോളമാണ് അര്‍ഷല്‍ കണ്ണവത്തെ കൊടുംവനത്തില്‍ അലഞ്ഞത്. മഴ കുറഞ്ഞപ്പോള്‍ നാട്ടുകാര്‍ നടത്തിയ തെരച്ചിലിനൊടുവിലാണ് അര്‍ഷലിനെ കണ്ടെത്തിയത്. ദുരന്തമുഖത്തുപോലും പതറാതെ, നിശ്ചയദാര്‍ഢ്യത്തിന്റെയും ധൈര്യത്തിന്റെയും പ്രതീകമായി മാറുകയാണ് ഈ എട്ട് വയസുകാരന്‍. മഴക്കെടുതി ഉള്‍പ്പെടെ എല്ലാ പ്രതിസന്ധികളെയും ഒറ്റക്കെട്ടായി അതിജീവിക്കാന്‍ അര്‍ഷല്‍ മാതൃകയാണെന്നും മന്ത്രി കുറിച്ചു.

നിലവില്‍ പെരിന്തോട് വേക്കളം എയുപി സ്‌കൂളിലെ ദുരുതാശ്വാസ ക്യാമ്പിലാണ് അര്‍ഷലും കുടുംബവും. കൊമ്മേരി ഗവ. യുപി സ്‌കൂളിലെ വിദ്യാര്‍ഥിയാണ് അര്‍ഷല്‍. ദുരിതാശ്വാസ ക്യാമ്പ് സന്ദര്‍ശിച്ച ശേഷമാണ് മന്ത്രി ഗോവിന്ദന്‍ അര്‍ഷലിനെക്കുറിച്ചുള്ള വിവരങ്ങള്‍ പങ്കുവച്ചത്.

മന്ത്രി എം വി ഗോവിന്ദൻ്റെ പോസ്റ്റ്:

”ഇതാണ് അര്‍ഷല്‍, ഉരുളിനെയും ഇരുളിനെയും ധൈര്യത്തോടെ നേരിട്ട കുഞ്ഞുമിടുക്കന്‍. ഉരുള്‍പൊട്ടലിന്റെ ഉഗ്രശബ്ദം കേട്ടാണ് ഈ എട്ട് വയസുകാരന്‍ വീട്ടില്‍ നിന്നിറങ്ങി കാട്ടിലേക്ക് ഓടിയത്. തുടക്കത്തില്‍ ഒപ്പം വീട്ടുകാരുണ്ടായിരുന്നെങ്കിലും, മഴയും ഇരുട്ടും അര്‍ഷലിനെ ഒറ്റയ്ക്കാക്കി. കണ്ണവത്തെ കൊടുംവനത്തിലെ കൂരാക്കൂരിരുട്ടില്‍ ആ പെരുമഴയത്ത് അവന്‍ കാത്തിരുന്നു, തനിച്ച്. രണ്ട് മണിക്കൂര്‍ നീണ്ട തിരച്ചിലിനൊടുവിലാണ് അര്‍ഷലിനെ ബന്ധുക്കള്‍ക്ക് കാട്ടില്‍ കണ്ടെത്താനായത്. കണ്ണൂര്‍ കൊമ്മേരി ഗവണ്‍മന്റ് യുപി സ്‌കൂളിലെ നാലാം ക്ലാസ് വിദ്യാര്‍ത്ഥിയാണ് അര്‍ഷല്‍. ദുരന്തമുഖത്തുപോലും പതറാതെ, നിശ്ചയദാര്‍ഢ്യത്തിന്റെയും ധൈര്യത്തിന്റെയും പ്രതീകമായി മാറുകയാണ് ഈ എട്ട് വയസുകാരന്‍. അര്‍ഷല്‍ നമുക്കൊരു മാതൃകയാണ്, മഴക്കെടുതി ഉള്‍പ്പെടെ എല്ലാ പ്രതിസന്ധികളെയും ഒറ്റക്കെട്ടായി അതിജീവിക്കാന്‍.”

സംസ്ഥാനത്ത് കാലവർഷക്കെടുതിയിൽ ഇതുവരെ 21 പേർക്ക് ജീവൻ നഷ്ടമായി. അതീതീവ്ര മഴ പ്രവചിച്ചതിനാല്‍ ജനങ്ങള്‍ ജാഗ്രതയിലിരിക്കണമെന്ന് റവന്യൂമന്ത്രി കെ.രാജന്‍ അറിയിച്ചു.

തൃശ്ശൂര്‍ ജില്ലയിലാണ് ഏറ്റവും കൂടുതല്‍ മഴ ലഭിച്ചിരിക്കുന്നത്. ചാലക്കുടി പുഴയില്‍ വെള്ളം ക്രമാതീതമായി ഉയരുന്നതിനാല്‍ തൃശ്ശൂര്‍, എറണാകുളം ജില്ലകള്‍ക്ക് പ്രളയ സമാനമായ മുന്നറയിപ്പാണ്.

39000 ക്യൂസെക്‌സ് വെള്ളമാണ് ചാലക്കുടി പുഴയിലേക്ക് ഒഴുകിയെത്തുന്നത്. 7.1 മീറ്റര്‍ വെള്ളമാണ് ഇപ്പോള്‍ പുഴയിലുള്ളത്. ഇത് മുന്നറിയിപ്പ് നിലയാണ്. 8.1 മീറ്റര്‍ ആയാല്‍ അപകട നിലയാണ് എന്നത് കൊണ്ട് തന്നെ ജില്ലാ ഭരണകൂടവും സര്‍ക്കാരും അതീവ ജാഗ്രതയിലാണ്.

തൃശ്ശൂര്‍ ജില്ലയിലെ മറ്റ് പുഴകളുടെ നിലവിലെ വെള്ളത്തിന്റെ അവസ്ഥ ഇങ്ങനെയാണ്. ഭാരതപ്പുഴ:നിലവില്‍ – 23.27 മീറ്റര്‍, മുന്നറിയിപ്പ് നില – 23.5 മീറ്റര്‍അപകട നില- 23.94 മീറ്റര്‍.

 കുറുമാലിപ്പുഴ: നിലവില്‍ – 5.67 മീറ്റര്‍, മുന്നറിയിപ്പ് നില – 4.7 മീറ്റര്‍, അപകട നില – 5.6 മീറ്റര്‍
മണലിപ്പുഴ:നിലവില്‍ – 5.49 മീറ്റര്‍, മുന്നറിയിപ്പ് നില – 5 മീറ്റര്‍, അപകട നില – 6.1 മീറ്റര്‍

ഷോളയാര്‍, പെരിങ്ങല്‍ക്കുത്ത്,പറമ്പിക്കുളം എന്നീ ഡാമുകളിലെ വെള്ളമാണ് ചാലക്കുടി പുഴയിലേക്ക് ഒഴുകിയെത്തുന്നത്. ഇതില്‍ തന്നെ ഷോളയാറിലെ അധിക ജലം അര്‍ധ രാത്രിയോട് കൂടി പുഴയിലേക്ക് എത്തുമെന്നാണ് ബന്ധപ്പെട്ടവര്‍ കരുതുന്നത്. അതുകൊണ്ട് തന്നെ റവന്യൂമന്ത്രിയടക്കമുള്ളവര്‍ സ്ഥലത്ത് ക്യാമ്പ് ചെയ്താണ് കാര്യങ്ങള്‍ നിരീക്ഷിച്ച് വരുന്നത്.

സംസ്ഥാനത്ത് തുടരുന്ന കനത്ത മഴയുടെ പശ്ചാത്തലത്തില്‍ ദേശിയ ദുരന്ത നിവാരണ സേനയുടെ 9 സംഘങ്ങളെ വിവിധ ഭാഗങ്ങളില്‍ വിന്യസിച്ചതായി സംസ്ഥാന ദുരന്ത നിവാരണ അതോറിറ്റി അറിയിച്ചു.