പോലീസ് തലപ്പത്ത് അഴിച്ചുപണി. സംസ്ഥാനത്തെ 19 പൊലീസ് ഉദ്യോഗസ്ഥര്‍ക്ക് തസ്തിക മാറ്റം. എഡിജിപി മനോജ് എബ്രാഹം വിജിലന്‍സ് ഡയറക്ടറാവും.

പോലീസ് ഹെഡ് ക്വാര്‍ട്ടേഴ്‌സ് എ.ഡി.ജി.പി.ആയി പത്മകുമാറിന് ചുമതല നല്‍കി. എ.ആര്‍ അജിത് കുമാര്‍ എ.പി ബറ്റാലിയന്‍ എഡിജിപി ആവും. ഉത്തരമേഖല ഐ.ജിയായി തുമ്മല വിക്രമിനെ നിയമിച്ചു.

യോഗേഷ് ഗുപ്തയ്ക്ക് ബെവ്‌കോ എം.ഡിയായി വീണ്ടും നിയമനം നല്‍കി. പൊലീസ്‌ ആസ്ഥാന എഡിജിപിക്ക്‌ തുല്യമായ റാങ്കിലാണ്‌ നിയമനം.
നിലവിലെ ബെവ്‌കോ എം.ഡി ശ്യാം സുന്ദറിന് ക്രൈം ഡി.ഐ.ജിയായും നിയമനം നല്‍കി.

സംസ്ഥാന പൊലീസ്‌ ആസ്ഥാനത്ത്‌ എഡിജിപിയായിരുന്നു മനോജ്‌ എബ്രഹാം. ആംഡ് പൊലീസ് ബറ്റാലിയൻ എഡിജിപിയായിരുന്നു കെ പത്മകുമാർ.

എം ആർ അജിത്‌കുമാറിനെ ആംഡ്‌ ബറ്റാലിയൻ എഡിജിപിയായി നിയമിച്ചു.  സിവിൽ റൈറ്റ്‌സ്‌ പ്രൊട്ടക്ഷൻ എഡിജിപിയുടെ അധികചുമതലയും അജിത്‌കുമാറിനുണ്ട്‌.

തിരുമല വിക്രത്തിന്‌ ഉത്തരമേഖല ഐജിയായി നിയമനം നൽകി. സുരക്ഷാ വിഭാഗം ഐജിയായി  അശോക്‌ യാദവിനെ നിയമിച്ചു. എസ്‌ ശ്യാംസുന്ദറിനെ ക്രൈം വിഭാഗം ഡിഐജിയായി നിയമിച്ചു. സ്റ്റേറ്റ്‌ സ്പെഷ്യൽ ബ്രാഞ്ച്‌ സൂപ്രണ്ടായി എ ശ്രീനിവാസിനെ നിയമിച്ചു. കെ കാർത്തിക്കാണ്‌ പുതിയ കോട്ടയം പൊലീസ്‌ മേധാവി. പൊലീസ്‌ ആസ്ഥാനത്തെ അഡീഷണൽ എഐജിയായി ടി നാരായണനെ നിയമിച്ചു. മെറിൻ ജോസഫാണ്‌ പുതിയ കൊല്ലം സിറ്റി പൊലീസ്‌ മേധാവി. ആർ കറുപ്പസ്വാമിയാണ്‌ കോഴിക്കോട്‌ റൂറൽ പൊലീസ്‌ മേധാവി. അരവിന്ദ്‌ സുകുമാറിനെ കെഎപി നാല്‌ ബറ്റാലിയൻ  കമാൻഡന്റായി നിയമിച്ചു. ഡി ശിൽപയെ വനിതാസെൽ എസ്‌പിയായി  നിയമിച്ചു.

വനിതാ ബറ്റാലിയൻ കമാൻഡന്റിന്റെ ചുമതലയും ശിൽപയ്‌ക്കാണ്‌. ആർ ആനന്ദിനെ വയനാട്‌ പൊലീസ്‌ മേധാവിയായി നിയമിച്ചു.  വിവേക്‌ കുമാറാണ്‌ എറണാകുളം റൂറൽ പൊലീസ്‌ മേധാവി. വി യു കുര്യാക്കോസിനെ  ഇടുക്കി ജില്ലാ പൊലീസ്‌ മേധാവിയായി നിയമിച്ചു. ടി കെ വിഷ്‌ണു പ്രദീപിനെ പേരാമ്പ്ര എഎസ്‌പിയായി നിയമിച്ചു. പി നിധിൻരാജാണ്‌ തലശേരി എഎസ്‌പി.

സജി ചെറിയാന്‍ മന്ത്രിസ്ഥാനം രാജിവെച്ചതോടെ അദ്ദേഹത്തിന് ചുമതലയുണ്ടായിരുന്ന വകുപ്പുകൾ മാറ്റി.ചുമതല മൂന്നു മന്ത്രിമാർക്കായി വീതിച്ചുനല്‍കും.

ഫിഷറീസ്, സാംസ്‌കാരികം-സിനിമ, യുവജനകാര്യം എന്നീ മൂന്ന് വകുപ്പുകളാണ് നേരത്തെ സജി ചെറിയാന്‍ കൈകാര്യം ചെയ്തിരുന്നത്

ടൂറിസം-പൊതുമരാമത്ത് മന്ത്രി പിഎ മുഹമ്മദ് റിയാസ് – യുവജനക്ഷേമകാര്യ വകുപ്പ്

സഹകരണ-രജിസ്‌ട്രേഷന്‍ മന്ത്രി വിഎന്‍ വാസവന്‍ – സാംസ്‌കാരികം-സിനിമ വകുപ്പ്

കായിക മന്ത്രി വി അബ്ദുറഹ്മാന്‍- ഫിഷറീസ് വകുപ്പ്

എന്നിങ്ങനെയാണ് ചുമതലാ മാറ്റം. ഇതുസംബന്ധിച്ച മുഖ്യമന്ത്രിയുടെ ശുപാര്‍ശ ഗവര്‍ണര്‍ അംഗീകരിച്ചു.

ഭരണഘടനയെ സംബന്ധിച്ച പരാമര്‍ശത്തിന്റെ പേരില്‍ ബുധനാഴ്ചയാണ് സജി ചെറിയാന്‍ മന്ത്രി സ്ഥാനം രാജിവച്ചത്.

എറണാകുളം കെ.എസ്.ആര്‍.ടി.സി. ബസ് സ്റ്റാൻ്റിൽ തനിയേ മുന്നോട്ടു നീങ്ങിയ ബസ് യാത്രക്കാരിയായ യുവതി ബ്രേക്ക് ചവിട്ടി നിര്‍ത്തി. തുറവൂര്‍ സ്വദേശിയായ രേഷ്‌നയുടെ ഇടപെടൽ അപകടം ഒഴിവാക്കി. വ്യാഴാഴ്ച രാവിലെയാണ് ജോലി സ്ഥലത്തേക്ക് പോകാനായി ബസിൽ കയറിയതായിരുന്നു രേഷ്മ

തുറവൂരുള്ള തൻ്റെ കടയിലേക്ക് പോകുന്നതിനായാണ് സ്റ്റാൻ്റിൽ എത്തിയത്.

രേഷ്മ പറയുന്നു….

‘സ്റ്റാന്റില്‍ നിര്‍ത്തിയിരുന്ന ആലപ്പുഴ ബസിലാണ് ഞാന്‍ കയറിയത്. സ്ത്രീകള്‍ ഉള്‍പ്പെടെ എട്ടുപത്തുപേര്‍ അപ്പോള്‍ ബസില്‍ ഉണ്ടായിരുന്നു. ഏറ്റവും മുന്നിലെ സീറ്റിലായിരുന്നു ഞാനിരുന്നത്.

ഡ്രൈവറും കണ്ടക്ടറും എത്തിയിരുന്നില്ല. പെട്ടെന്നാണ് ബസ് തനിയേ മുന്നോട്ടുനീങ്ങാന്‍ തുടങ്ങിയത്. സ്റ്റാന്റില്‍ അപ്പോള്‍ അത്യാവശ്യം ആളുകള്‍ ഉണ്ടായിരുന്നു. ബസിലിരുന്ന സ്ത്രീകളൊക്കെ നിസ്സഹായമായി നിലവിളിക്കാന്‍ തുടങ്ങി. വേഗം തന്നെ ഞാന്‍ കമ്പിയുടെ അടിയിലൂടെ ഡ്രൈവര്‍ സീറ്റില്‍ കയറി ബ്രേക്ക് ചവിട്ടി. എന്തെങ്കിലും ചെയ്തില്ലെങ്കില്‍ ബസ് ആളുകളുടെ ദേഹത്തോ ബസ് സ്റ്റേഷന്റെ മതിലിലോ ഇടിക്കുമായിരുന്നു. വണ്ടി നിന്നപ്പോഴേക്കും കെ.എസ്.ആര്‍.ടി.സി. ജീവനക്കാരും ഓടിയെത്തി’, രേഷ്‌ന വിശദീകരിച്ചു.

ബസ് ബ്രേക്കോ ഗിയറോ ഉപയോഗിക്കാതെ നിർത്തിയിടാനുണ്ടായ സാഹചര്യം വ്യക്തമല്ല. ഇറങ്ങിപ്പോയ ഡ്രൈവറുടെ അശ്രദ്ധയാവാം എന്നാണ് കരുതുന്നത്.

ഡ്രൈവിങ് വിദഗ്ധയൊന്നുമല്ലെങ്കിലും മുമ്പ് കാറോടിക്കാന്‍ പഠിക്കുന്ന സമയത്ത് ഭര്‍ത്താവ് പറഞ്ഞുതന്ന ‘എ-ബി-സി’ അഥവാ ആക്‌സിലറേറ്റര്‍-ബ്രേക്ക്-ക്ലച്ച് എന്ന ഓര്‍ഡറാണ് ധൈര്യമായി ബ്രേക്ക് ചവിട്ടാനുള്ള ആത്മവിശ്വാസം തന്നതെന്ന് രേഷ്‌ന പറയുന്നു.

ബ്രേക്ക് മാറി ആക്‌സിലറേറ്ററിലെങ്ങാന്‍ ചവിട്ടിയാല്‍ ഉടനേ മാറ്റിച്ചവിട്ടാമെന്ന് ഉറപ്പിച്ചാണ് ധൈര്യമായി കയറിയതും,’ രേഷ്‌ന പറഞ്ഞു.