രക്ഷിതാക്കളും വിദ്യാഥികളും അറിയേണ്ടത്

പ്ലസ് ടു തലത്തിലേക്കുള്ള പ്രവേശന നടപടികൾ ആയി. ഏകജാലക സംവിധാനത്തിലൂടെയാണ് അപേക്ഷ സ്വീകരിക്കുന്നത്. അപേക്ഷ സമർപ്പിക്കുമ്പോഴും അതിന് ശേഷമായാലും പ്രവേശനത്തിനായുള്ള തിരഞ്ഞെടുപ്പ് സംബന്ധിച്ച് ചില കാര്യങ്ങൾ അറിഞ്ഞിരിക്കണം.

സാങ്കേതിക പദാവലികളും ചില്ലറ ഗണിത ശാസ്ത്രവും ഒക്കെ ചേർന്നതാണ് അപേക്ഷകരെ മുൻഗണനാ ക്രമത്തിൽ നിശ്ചയിക്കുന്ന നടപടി. ഇത് മനസിലാക്കി വെക്കണം. സാധ്യകൾ വിലയിരുത്താനും എളുപ്പമാവും

പ്രവേശനത്തിന് അർഹരായവരെ വേർതിരിക്കുന്നത് എങ്ങനെയാണ്

ആദ്യം കുട്ടിക്ക് കിട്ടിയ ഗ്രേഡ് മുൻനിർത്തി ഗ്രേഡ് പോയിന്റ് കണക്കാക്കുക.

A+ – 9
A – 8
B+ – 7
B – 6
C+ – 5
C – 4
D+ – 3

ഇതു പോലെ വിദ്യാർഥിക്ക് ലഭിച്ച ഗ്രേഡുകളെ ഗ്രേഡ് പോയിന്റുകളാക്കി മാറ്റുകയാണ് ആദ്യം ചെയ്യുന്നത്. എന്നിട്ട് ഓരോ പേപ്പറിൻ്റെയും ഗ്രേഡ് കണക്കാക്കി അതിൻ്റെ മൊത്തം തുക കാണും.

ഇതാണ് TGP (Total Grade Point) അഥവ മൊത്തം ഗ്രേഡ് പോയിന്റ്. TGP യെ മാത്രം നോക്കി പ്രവേശന സാധ്യത പരിശോധിക്കാൻ കഴിയില്ല.

TGP യോടൊപ്പം തന്നെ വിലയിരുത്തി കണക്കാക്കുന്ന ഒന്നാണ് GSW.

എന്താണ് GSW?

GSW- total Grade value of subjects for which Weigtage is given. ( വിദ്യാർഥി തിരഞ്ഞെടുക്കുന്ന കോമ്പിനേഷന് വെയ്റ്റേജ് നൽകുന്ന വിഷയങ്ങൾ).

ഒരു കുട്ടി ഏത് കോമ്പിനേഷൻ ആണോ ആഗ്രഹിക്കുന്നത്, ആ കോമ്പിനേഷന് കിട്ടുന്ന വെയ്റ്റേജ് ഗ്രേഡ് പോയിന്റ് കണക്കാക്കുന്നതിനും ചില ഘട്ടങ്ങളുണ്ട്.

വിഷയങ്ങൾ ധാരാളം പക്ഷെ എല്ലായിടത്തും എല്ലാം ഇല്ല

ആകെ 46 തരം കോമ്പിനേഷനുകൾ ഉണ്ടെങ്കിലും കുട്ടിക്ക് പോയി വരാവുന്ന ദൂരത്തിലുള്ള ഓരോ സ്കൂളുകളിലും ശരാശരി മൂന്നോ നാലോ കോമ്പിനേഷനുകളേ കാണൂ. അപേക്ഷ സമർപ്പിക്കാൻ പോകുന്നതിന് മുമ്പ് ഇത് രക്ഷിതാക്കളും കുട്ടികളും കൃത്യമായി മനസ്സിലാക്കിയിരിക്കണം.

സയൻസ് കോമ്പിനേഷൻ

കോഴ്സ് കോഡ് 01 മുതൽ 09 വരെ സയൻസ് കോമ്പിനേഷൻ ആണ്.

എങ്കിലും കോഡ് 04 മുതൽ 08 വരെയുള്ള കോമ്പിനേഷന് ഫിസിക്സ്, കെമിസ്ട്രി & മാത്തമാറ്റിക്സ് ആണ് വെയ്റ്റേജ് നൽകുന്ന വിഷയങ്ങൾ.

01, 02, 03, 09 ബയോ മാത്സ് എന്ന് വിശേഷിപ്പിക്കപ്പെടുന്നു. ഈ ഗ്രൂപ്പിന്റെ വെയ്റ്റേജ് വിഷയങ്ങൾ മേൽ പറഞ്ഞ വിഷയങ്ങളുടെ കൂടെ ബയോളജിയെ കൂടി പരിഗണിക്കും. (ഫിസിക്സ്, കെമിസ്ട്രി, ബയോളജി, മാത്തമാറ്റിക്സ്)

സോഷ്യൽ സയൻസ്

കോഡ് 10 മുതൽ 29 വരെയും 41,42,43,45,46 യും ഹ്യൂമാനിറ്റീസ് കോമ്പിനേഷന് വെയ്റ്റേജ് നൽകുന്ന വിഷയം സോഷ്യൽ സയൻസ് മാത്രം ആണ്.

എന്നാൽ കോഡ് 30 മുതൽ 32 വരെയുള്ള ഹ്യുമാനിറ്റീസ് കോമ്പിനേഷന് സോഷ്യൽ സയൻസ് ആൻഡ് മാത്തമാറ്റിക്സ് ആണ്.

ഇതിനു പുറമെ കോഡ് 33,34,35 ആൻഡ് 44 ന്റെ വെയ്റ്റേജ് വിഷയങ്ങൾ സോഷ്യൽ സയൻസ് ആൻഡ് ഇംഗ്ലീഷും ആണ്.

കൊമേഴ്സ് കോമ്പിനേഷൻ

കോഡ് 36 മുതൽ 39 വരെയുള്ള കൊമേഴ്സ് കോമ്പിനേഷന് വെയ്റ്റേജ് നൽകുന്ന വിഷയങ്ങൾ മാത്തമാറ്റിക്സ് ആൻഡ് സോഷ്യൽ സയൻസ് ആണ്.

ഇപ്രകാരം ഉദ്ദേശിക്കുന്ന വിദ്യാലയങ്ങളിൽ വിദ്യാർഥി തിരഞ്ഞെടുക്കുന്ന കോമ്പിനേഷന് കിട്ടുന്ന വെയ്റ്റേജ് പോയിന്റ് എത്രയെന്ന് മാർക്ക് ലിസ്റ്റ് നോക്കി കണക്കാക്കി വെക്കാൻ കഴിയും. ഈ തുകയാണ് GSW.

TGP യെ പോലെ തന്നെ വളരെയധികം പ്രധാനപ്പെട്ടതാണ് GSW. പ്ലസ് വൺ പ്രവേശനത്തിന് GSW നിർണ്ണായകമായൊരു ഘടകമാണെന്ന് ഓർക്കുക. ഒരേ വിഷയത്തിന് അപേക്ഷിച്ച ചില വിദ്യാർഥികളുടെ TGP തുല്യമായിരിക്കാം, പക്ഷെ, GSW തുല്യമായി വന്നോളണം എന്നില്ല.

കുട്ടികൾ അവർക്ക് കിട്ടിയ ഗ്രേഡുകൾ ഏതാണ്ട് തുല്യമാണെന്ന് കണ്ട് ഒരേ കോമ്പിനേഷന് അപേക്ഷിച്ച് ചിലർക്ക് കിട്ടുകയും ചിലർക്ക് കിട്ടാതിരിക്കുകയും ചെയ്യുന്നതിന്റെ ഒരു കാരണം ഇതാണ്.

ബോണസ് പോയിൻ്റ് B P

ബോണസ് പോയിൻ്റ് സംബന്ധിച്ച് സർക്കാർ അവസാന ഘട്ടം വരെ തീരുമാനം എടുക്കാൻ കഴിയാതെ ആശയ കുഴപ്പം നേരിട്ടു എന്നാണ് വ്യക്തമാവുന്നത്. ഇത് സർക്കാർ പ്രോസ്പെക്ടസ് അംഗീകരിക്കുന്നത് അനുസരിച്ച് വ്യത്യാസങ്ങൾ വരാം. അതായത് എതിനൊക്കെ ബോണസ് പോയിൻ്റ് നൽകണം നൽകാതിരിക്കണം എന്ന് ഓരോ വർഷത്തെയും തീരുമാനത്തെ അനുസരിച്ചിരിക്കും

1. പത്താം തരം കേരള സിലബസിൽ (SSLC) പഠിച്ചവർക്ക് 3 ബോണസ് പോയിന്റ് ലഭിക്കും.
2. SSLC ക്ക് പഠിച്ചിരുന്ന അതേ സ്‌കൂളിൽ തന്നെ അപേക്ഷിക്കുകയാണെങ്കിൽ 2 ബോണസ് പോയിന്റ് ലഭിക്കും.
3. താമസിക്കുന്ന അതേ ഗ്രാമപഞ്ചായത്ത് / മുനിസിപ്പാലിറ്റി / കോർപറേഷൻ എന്നിവയിലുള്ള സ്‌കൂളുകളിൽ അപേക്ഷിക്കുകയാണെങ്കിൽ 2 ബോണസ് പോയിന്റ് ലഭിക്കും.
4. താമസിക്കുന്ന അതേ താലൂക്കിലുള്ള സ്‌കൂളുകളിൽ അപേക്ഷിക്കുകയാണെങ്കിൽ 1 ബോണസ് പോയിന്റ് ലഭിക്കും.
5. താമസിക്കുന്ന ഗ്രാമപഞ്ചായത്തിൽ ഗവ./എയ്‌ഡഡ്‌ ഹയർ സെക്കൻഡറി സ്‌കൂൾ ഇല്ലാത്തവർക്ക് താലൂക്കിലെ മറ്റ് സ്‌കൂളുകളിൽ അപേക്ഷിക്കുകയാണെങ്കിൽ ബോണസ് പോയിന്റ് ലഭിക്കും.
6. NCC (75 ശതമാനത്തിൽ കുറയാത്ത ഹാജർ കേഡറ്റിനുണ്ടെന്ന സർട്ടിഫിക്കറ്റ് ഹാജരാക്കണം), സ്കൗട്ട് ആൻഡ് ഗൈഡ് (രാഷ്ട്രപതി / രാജ്യ പുരസ്കാർ നേടിയവർ മാത്രം),
7. നീന്തൽ അറിവ് (അപേക്ഷകൻ താമസിക്കുന്ന തദ്ദേശ ഭരണസ്ഥാപനങ്ങൾക്ക് കീഴിലുള്ള സ്പോർട്സ് കൗൺസിൽ നൽകുന്ന സർട്ടിഫിക്കറ്റ് ഹാജരാക്കണം. സ്പോർട്സ് കൗൺസിൽ രൂപീകരിച്ചിട്ടില്ലാത്ത മേഖലകളിലുള്ളവർ ജില്ല സ്പോർട്സ് കൗൺസിലിന്റെ സർട്ടിഫിക്കറ്റ് ആണ് ഹാജരാക്കേണ്ടത്.
8. (വാർഡ് മെമ്പർ, തദ്ദേശ സ്വയം ഭരണ സ്ഥാപനത്തിന്റെ പ്രസിഡന്റ്/സെക്രട്ടറി തുടങ്ങിയവർ നൽകുന്ന സർട്ടിഫിക്കറ്റ് പരിഗണിക്കുകയില്ല.
9. സ്റ്റുഡന്റ് പോലീസ് കേഡറ്റുകൾക്കും 2 ബോണസ് പോയിന്റ് ലഭിക്കും.
10. കൃത്യനിർവഹണത്തിനിടയിൽ മരണമടഞ്ഞ ജവാൻമാരുടെ മക്കൾക്ക് 5 ബോണസ് പോയിന്റ് ലഭിക്കും. (നിയമപരമായി അവർ ദത്തെടുത്ത മക്കളും ഈ ആനുകൂല്യത്തിന് അർഹരാണ്.)
11. ജവാൻമാരുടെയും, ആർമി, നേവി, എയർഫോഴ്സ് എന്നിവയിൽ നിന്നുള്ള എക്സ് സർവീസുകാരുടെയും മക്കൾക്ക് 3 ബോണസ് പോയിന്റ് ലഭിക്കും. (നിയമപരമായി അവർ ദത്തെടുത്ത മക്കളും ഈ ആനുകൂല്യത്തിന് അർഹരാണ്.)

ഈ പട്ടിക നോക്കി അപേക്ഷകന് എത്ര BP (ബോണസ് പോയിന്റ്) കിട്ടുമെന്ന് കണക്കാക്കാവുന്നതാണ്. ഇത് അതത് വർഷം സർക്കാർ അംഗീകരിക്കുന്ന പ്രോസ്പെക്ടസ് പ്രകാരം വ്യത്യാസപ്പെടും.

Minus Point M P

SSLC ആദ്യ തവണ പാസായിട്ടില്ലെങ്കിൽ, പാസാവാൻ എടുക്കുന്ന ഓരോ ചാൻസിനും 1 പോയിന്റ് വച്ച് കുറയ്ക്കും.

ടോട്ടൽ സബ്ജക്ട് T S

ആകെ വിഷയങ്ങളുടെ എണ്ണമാണിത്. SSLC ക്കാർക്ക് 10 ആണ്.

TSW (Total Subject for Weightage)

തിരഞ്ഞെടുക്കുന്ന കോമ്പിനേഷൻ്റെ വെയ്റ്റേജ് വിഷയങ്ങളുടെ എണ്ണം ആണിത്.

ഇത് ബയോ മാത്സിന് 4, മറ്റു സയൻസുകൾക്ക് 3,

കൊമേഴ്സിന് 2, ഹ്യുമാനിറ്റീസിന് 1 എന്നിങ്ങനെയാണ് വരിക. ( ഹ്യുമാനിറ്റീസ് കോഡ് 33,34,35, 44 ന്റെ TSW 2 ആണ്.)

തീർന്നില്ല ഇവയുടെ അടിസ്ഥാനത്തിൽ WGPA കണക്കാക്കണം

ഇതു പ്രകാരമാണ് അപേക്ഷ സമർപ്പിച്ച ഓരോ വിഷയത്തിനും സീറ്റ് അനുസരിച്ച് അഡ്മിഷൻ നൽകുന്നത്

WGPA കണക്കാക്കുന്നത് എങ്ങിനെ എന്ന് പരിശോധിക്കാം.

WGPA=

TGP+GSW BP-MP
—————– + ————-
TS +TSW 10

ഇപ്പോൾ കിട്ടിയ തുകയുടെ ഏഴ് ദശാംശ സ്ഥാനം വരെ എടുക്കുക. ഈ സംഖ്യയാണ് WGPA

WGPA തുല്യമായി വരുമ്പോൾ വിവിധ മാനദണ്ഡങ്ങളെ മുൻ നിർത്തി ടൈ ബ്രേക്കിംഗ് ചെയ്യും.

സയൻസ് കോമ്പിനേഷന്, വെയ്റ്റേജ് വിഷയങ്ങളുടെ ഗ്രേഡ് പോയിന്റ് കുറവാണെങ്കിൽ ഹ്യുമാനിറ്റീസ്/ കൊമേഴ്സ് കോമ്പിനേഷന് വെയ്റ്റേജ് ഉണ്ടോ എന്ന് നോക്കണം.

എല്ലാ കോമ്പിനേഷനും അതിന്റെ സാധ്യതകളുണ്ട്. സയൻസ് പഠിച്ചാൽ നല്ല ജോലി സാധ്യത ഉണ്ടാകും, ഹ്യുമാനിറ്റീസ് പഠിച്ചാൽ മെച്ചമുണ്ടാകില്ല എന്നുള്ളതൊക്കെ തെറ്റായ ധാരണകളാണ്. വിദ്യാർഥികൾ അതത് വിഷയത്തിൽ ഉടനീളം പുലർത്തുന്ന മികവാണ് ഏറ്റവും പ്രധാനം.

എല്ലാ കോമ്പിനേഷനും മിടുക്കന്മാർക്കുള്ളതാണ്, എല്ലാത്തിനും നല്ല ജോലി സാധ്യത/ഉപരി പഠന സാധ്യതയുണ്ട്, കോഴ്സ് കഴിയുന്ന ആൾ അതിനെ എപ്രകാരം ഉപയോഗപ്പെടുത്തുന്നു എന്നതിനെ ആശ്രയിച്ചാണ് അതിന്റെ സാധ്യത കിടക്കുന്നത്.

പ്ലസ് വൺ പ്രവേശനം, അപേക്ഷ വ്യാഴാഴ്ച മുതൽ
https://keralapost.online/100004925/

പ്ലസ് വൺ പ്രവേശനത്തിനുള്ള വിജ്ഞാപനം നാളെ ബുധനാഴ്ച പുറത്തിറങ്ങും. വ്യാഴാഴ്ച മുതൽ ഓൺലൈനായി അപേക്ഷിക്കാൻ സൌകര്യം ലഭിക്കുമെന്ന് മന്ത്രി വി.ശിവൻകുട്ടി അറിയിച്ചു.

ഇത്തവണ അധിക ബാച്ചുകൾ നേരത്തെ

മുൻ വർഷങ്ങളിൽ അധികബാച്ച് അനുവദിക്കാൻ താമസിച്ചതു പ്രവേശന നടപടികൾ വൈകിച്ചിരുന്നു. ആവശ്യമുള്ള ജില്ലകളിൽ ആദ്യമേ തന്നെ അധിക സീറ്റുകൾ അനുവദിക്കാനുള്ള നീക്കമാണു നടക്കുന്നത്. ആവശ്യമെങ്കിൽ താൽക്കാലിക ബാച്ചുകൾ പിന്നീട് അനുവദിക്കും.

ബോണസ് പോയിൻ്റ്; ആശയ കുഴപ്പം തുടരുന്നു

ബോണസ് പോയിന്റ് സമ്പ്രദായം പൂർണമായും നിർത്തലാക്കില്ല എന്നും മന്ത്രി പറഞ്ഞു. നീന്തലിനുൾപ്പെടെ മികവിൻ്റെ അടിസ്ഥാനത്തിൽ പോയിന്റ് അനുവദിച്ചേക്കും എന്നാണ് വിവരം. നീന്തൽ സർട്ടിഫിക്കറ്റ് പരിഗണിക്കുന്നില്ല എന്ന് പറഞ്ഞിതിൻ്റെ അടിസ്ഥാനത്തിൽ തദ്ദേശ സ്ഥാപനങ്ങൾ മിക്കതും നീന്തൽ പരീക്ഷയും സർട്ടിഫിക്കറ്റ് നൽകലും മാറ്റി വെച്ചിരുന്നു.

ഈ കാര്യങ്ങളിൽ ആവശ്യമെങ്കിൽ മന്ത്രിസഭയുടെ അംഗീകാരം തേടും എന്നാണ് മന്ത്രി പറയുന്നത്. നാളെയാണു മന്ത്രിസഭാ യോഗം.

ബോണസ് പോയിന്റിലുൾപ്പെടെ തീരുമാനം വൈകുന്നതു മൂലം എസ്എസ്എൽസി പരീക്ഷാഫലം വന്നു മൂന്നാഴ്ചയോളമായിട്ടും പ്ലസ് വൺ പ്രവേശന നടപടി ആരംഭിക്കാനാവാത്ത സാഹചര്യമായിരുന്നു. ഇത് ഇപ്പോഴും നിശ്ചയമവാത്ത അവസ്ഥയാണ്.

ബോണസ് പോയിൻ്റിൽ ഉരുണ്ടു മറിച്ചിൽ

ചില അധ്യാപകർ സി.ബി.എസ്.ഇ., ഐ.സി.എസ്.ഇ. വിദ്യാർത്ഥികളെ ശത്രുക്കളായി കാണുകയും അവർക്കെതിരെ പരസ്യമായി  പ്രതികരിക്കുകയും ചെയ്യുന്നരീതിയും കണ്ടു വരുന്നുണ്ട്.  അവരെല്ലാം കേരളത്തിലുള്ളവരാണ്. അവരുടെയും ഉപരിപഠനാവസരം  സംരക്ഷിക്കേണ്ടതായുണ്ടെന്നും വിദ്യാഭ്യാസ മന്ത്രി പറഞ്ഞിരുന്നു.

വിമർശനവും ശക്തം

മന്ത്രിയുടെ നിയമസഭാ മറുപടി ബോണസ് സംബന്ധിച്ച കേരള സിലബസുകരുടെ  ആശങ്കയെ കൂടുതൽ ശക്തിപ്പെടുത്തുന്നതാണ്. മറ്റ് സിലബസിൽ പഠിച്ച കുട്ടികൾക്ക് കേരളാ സിലബസിലെ പ്ലസ് വണ്ണിലേക്ക് മാറാൻ സൗകര്യമാണെങ്കിലും തിരികെ അത്തരമുള്ള സൗകര്യം ലഭിക്കാറില്ലെന്ന കാര്യം മന്ത്രി മറക്കുന്നുവെന്നാണ് വിമർശകർ ചൂണ്ടി കാട്ടുന്നു

സംസ്ഥാന സർക്കാർ സിലബസിൽ പത്താം ക്ലാസ് വരെ പഠിച്ച വിദ്യാർത്ഥികളെ ഒഴിവാക്കി മറ്റ് സിലബസിൽ നിന്നും വരുന്നവർക്ക് മുൻഗണന നൽകുന്നതോടെ കേരള സർക്കാർ സിലബസിൽ പത്താം തരം വരെ പഠിക്കാൻ കുട്ടികളെ ചേർക്കാൻ രക്ഷിതാക്കൾക്ക് രണ്ട് തവണ ആലോചിക്കേണ്ട സ്ഥിതിയാണ് ഉണ്ടാവുക.  ഇത്തവണത്തെ പരീക്ഷയും പരീക്ഷാഫലവും ഉയർത്തിയ പ്രതിസന്ധിയുടെ തുടർച്ചയാണ് പ്ലസ് വൺ പ്രവേശനത്തിനും സർക്കാർ സൃഷ്ടിക്കുന്നത്. സംസ്ഥാന സിലബസിൽ വിദ്യാർത്ഥികൾ നേടിയ മുന്നേറ്റം മറ്റ് സിലബസിൽ പഠിക്കാൻ പോയിരുന്ന വിദ്യാർത്ഥികളെയും രക്ഷിതാക്കളെയും ആകർഷിക്കുകയും അവർ സംസ്ഥാന സിലബസിൽ ചേരുകയും ചെയ്തതായി  മുൻ സർക്കാരിന്റെ കാലത്ത് കണക്കുകൾ നിരത്തി അവകാശവാദം ഉന്നയിച്ചിരുന്നു. എന്നാൽ, ഇപ്പോൾ അങ്ങനെ വന്ന വിദ്യാർത്ഥികളെ തള്ളിപ്പറയുന്ന സമീപനമാണ് വിദ്യാഭ്യാസ വകുപ്പും സർക്കാരും ചെയ്യുന്നത് എന്നാണ് ആരോപണം.