പ്രധാനമന്ത്രി നരേന്ദ്ര മോഡിയെ മുൻനിർത്തിയുള്ള ദുശ്ശകുനം പരാമർശത്തിൽ കോൺ​ഗ്രസ് നേതാവ് രാഹുൽ ഗാന്ധിക്ക് തെരഞ്ഞെടുപ്പ് കമ്മീഷൻ്റെ നോട്ടീസ്. ഇന്ത്യ മികച്ച നിലയിൽ കളിച്ചുകൊണ്ടിരിക്കുകയായിരുന്നുവെന്നും ദുശ്ശകുനം എത്തിയതിന് പിന്നാലെയാണ് പരാജയം ഉണ്ടായതെന്നുമായിരുന്നു രാഹുൽ ഗാന്ധിയുടെ പരാമർശം.

രാഹുൽ​ഗാന്ധി മറ്റന്നാൾ ആറ് മണിക്കുള്ളിൽ മറുപടി നൽകണമെന്ന് നോട്ടീസിൽ പറയുന്നു. ഇന്ത്യ-ഓസ്ട്രേലിയ ലോകകപ്പ് ക്രിക്കറ്റിൽ ഇന്ത്യ പരാജയപ്പെട്ട സാഹചര്യത്തിലായിരുന്നു രാഹുലിന്റെ പരാമർശം.

‘ദുശ്ശകുനം’ പരാമർശത്തിൽ രാഹുൽ ഗാന്ധിക്കെതിരെ ദില്ലി പൊലീസിൽ പരാതി നൽകിയാണ് നീക്കം. രാജസ്ഥാനിലെ തെരഞ്ഞെടുപ്പ് റാലിയിലാണ് കുറിക്ക് കൊള്ളുന്ന പരിഹാസം രാഹുല്‍ നടത്തിയത്. ഇന്ത്യന്‍ ടീം നല്ല രീതിയില്‍ കളിച്ച് വരികയായിരുന്നു. മോദി സ്റ്റേഡിയത്തിലെത്തും വരെ മികച്ച പ്രകടനമായിരുന്നു ഇന്ത്യയുടേത്. എന്നാല്‍ ദുശ്ശകുനമെത്തിയതോടെ പിന്നീടങ്ങോട്ട് ടീമിന്‍റെ താളം തെറ്റുകയും കളി തോല്‍ക്കുകയുമായിരുന്നുവെന്ന് രാഹുല്‍ പറഞ്ഞു. രാജസ്ഥാനിലെ കോണ്‍ഗ്രസ് നേതാക്കളുടെ തമ്മിലടിയെ റണ്‍ ഔട്ടാക്കാന്‍ പരസ്പരം ശ്രമിക്കുന്ന ബാറ്റ്സ്മാന്‍മാരോട് ഉപമിച്ചതിന് മറുപടിയായി കൂടിയാണ് ക്രിക്കറ്റുമായി ബന്ധപ്പെടുത്തി രാഹുൽ തിരിച്ചടി നല്‍കിയത്.

ഉത്തരകാശിയിൽ നിർമാണത്തിലിരുന്ന തുരങ്കം തകർന്നുവീണ് തൊഴിലാളികൾ അകപ്പെട്ട സംഭവത്തിൽ രക്ഷാപ്രവർത്തനം അനിശ്ചിതത്വത്തിൽ തുടരുന്നു. ഡ്രില്ലിങ് മെഷീൻ പ്രവർത്തനം തടസ്സപ്പെട്ടിരിക്കയാണ്. കുടുങ്ങിക്കിടക്കുന്ന തൊഴിലാളികളുടെ അടുത്തേക്ക് രക്ഷാപ്രവർത്തകർ മണിക്കൂറുകൾക്കുള്ളിൽ എത്തിയേക്കുമെന്നാണ് ഇപ്പോഴും ദേശീയ ദുരന്തനിവാരണസേന പറയുന്നത്. ഡ്രില്ലിങ് പ്രവൃത്തിയിൽ അപ്രതീക്ഷിത തടസ്സം നേരിട്ടതാണ് രക്ഷാപ്രവർത്തനം വൈകാൻ ഇടയാക്കിയത് എന്നാണ് പതിനൊന്നാമത്തെ ദിവസത്തെയും വിശദീകരണം.

കഴിഞ്ഞ ദിവസം രാത്രി ദൌത്യം പൂർത്തീകരിക്കും എന്നാണ് ഉറപ്പ് പറഞ്ഞിരുന്നത്. പിന്നീട് രാവിലെ എന്നായി. 11 ദിവസം കഴിഞ്ഞിട്ടും എത്തിപ്പെടാൻ പറ്റാത്ത നിസ്സഹായതയിലാണ് തൊഴിലാളികൾ കുരുങ്ങിപ്പോയിരിക്കുന്നത്. ഹൈവേ അതോറിറ്റി ആധുനിക മാനദണ്ഡങ്ങൾ ഉറപ്പ് വരുത്തിയില്ല എന്ന പരാതിയാണ് ഉയർന്നത്. അന്താരാഷ്ട്ര ടണൽ വിദഗ്ധൻ ആർനോൾഡ് ഡിക്സ് രക്ഷാ പ്രവർത്തനത്തിന് നേതൃത്വം നൽകുന്നു. എന്നാൽ നിശ്ചിതമായി ഒന്നും പറയാനാവുന്ന സാഹചര്യമല്ല എന്നാണ് വാർത്തകൾക്ക് അപ്പുറം അദ്ദേഹം പ്രതികരിക്കുന്നത്.

ഏറെ ശ്രദ്ധയോടെയാണ് രക്ഷാപ്രവർത്തനം പുരോ​ഗമിക്കുന്നതെന്നാണ് വിശദീകരണം. വെള്ളിയാഴ്ചയ്ക്കുള്ളിൽ കുടുങ്ങിയ തൊഴിലാളികളുടെ അടുത്ത് എത്താനാകുമെന്നാണ് വിദഗ്ധരെ ഉദ്ദരിച്ച് വാർത്ത നൽകുന്നത്. രാവിലെ തൊഴിലാളികളുടെ അടുത്ത് എത്താൻ കഴിയും എന്ന് പറഞ്ഞിരുന്നു. എന്നാൽ ഡ്രില്ലിങ് ജോലികളിൽ തടസ്സം നേരിട്ടതിനെത്തുടർന്ന് രക്ഷാപ്രവർത്തനം താത്ക്കാലികമായി നിർത്തിവച്ചിരുന്നു. ഡ്രില്ലിങ്ങിനിടെ ഇനിയും തടസ്സങ്ങൾ ഉണ്ടാവാം എന്നതാണ് ഇപ്പോഴത്തെ സാഹചര്യം.

വ്യാഴാഴ്ച രാവിലെ തൊഴിലാളികളെ പുറത്തെത്തിക്കാനാകുമെന്നായിരുന്നു ആദ്യം റിപ്പോർട്ടുകൾ. എന്നാൽ, അവശിഷ്ടങ്ങൾക്കിടയിലുണ്ടായിരുന്ന ഇരുമ്പുദണ്ഡുകൾ ശ്രമത്തിന് വിഘാതമായി. തുടർന്ന് ഡ്രില്ലിങ് നിർത്തി വയ്ക്കേണ്ടിവന്നിരുന്നു.

ദിവസങ്ങളോളം സൂര്യവെളിച്ചമേൽക്കാതെയും സാധാരണഭക്ഷണമോ പുറംലോകത്തെ വായുവോ ശ്വസിക്കാതെയും കഴിയുന്ന തൊഴിലാളികളുടെ നില ആശങ്കാ ജനകമാണ്.

നവംബർ 12 പുലർച്ചെ 5.30-നായിരുന്നു ഉത്തരാഖണ്ഡിൽ നിർമാണത്തിലിരിക്കുന്ന തുരങ്കം തകർന്നത്. നാലര കിലോമീറ്റർ നീളമുള്ള തുരങ്കത്തിന്റെ 150 മീറ്റർ ഭാഗമാണ് തകർന്നുവീണത്. തുടർന്ന്, ദേശീയ ദുരന്തനിവാരണസേനയും സംസ്ഥാന ദുരന്തനിവാരണസേനയും ചേർന്ന് ആരംഭിച്ച രക്ഷാപ്രവർത്തനമാണ് 12-ാം ദിവസവും തുടരുന്നത്.

ടണലിനുള്ളിൽ തകർന്ന അവശിഷ്ടങ്ങൾക്കിടയിലൂടെ ഡ്രിൽ ഉപയോഗിച്ച് ദ്വാരം ഉണ്ടാക്കി സ്റ്റീൽ പൈപ്പ് കടത്തിവിടാനും ഇതുവഴി കുടുങ്ങിക്കിടക്കുന്ന തൊഴിലാളികളെ രക്ഷപ്പെടുത്താനുമായിരുന്നു ആദ്യശ്രമം. 900 മില്ലിമീറ്റർ വ്യാസമുള്ള കുഴലുകൾ ഒന്നൊന്നായി ഹൈഡ്രോളിക് ഡ്രില്ലിങ് മെഷിൻ ഉപയോഗിച്ചാണ് കയറ്റിയത്. ഇതിനിടയിലും പ്രദേശത്ത് മണ്ണിടിച്ചിലുണ്ടായി.

ഉത്തരകാശിയിലെ ദണ്ഡൽഗാവിനേയും സിൽക്യാരയേയും ബന്ധിപ്പിക്കാൻ ഉദ്ദേശിച്ചുള്ളതാണ് തുരങ്കം. ചാർധാം റോഡ് പദ്ധതിയുടെ ഭാഗമായാണ് തുരങ്കം നിർമിക്കുന്നത്. യാഥാർഥ്യമായാൽ ഉത്തരകാശിയിൽനിന്ന് യമുനോത്രിയിലേക്കുള്ള യാത്രയിൽ 26 കിലോമീറ്റർ ദൂരം കുറയും.

ഗവർണർ രാജിനുള്ള ശ്രമങ്ങൾക്ക് എതിരെ ജനാധിപത്യപരമായ മുന്നറിയിപ്പുമായി സുപ്രീം കോടതി. ഇന്ത്യൻ ഭരണഘടന പ്രകാരം ബില്ലുകള്‍ തടഞ്ഞുവച്ചുകൊണ്ട് ഗവര്‍ണര്‍ക്ക് നിയമസഭയെ മറികടക്കാനാകില്ലെന്ന് സുപ്രീംകോടതി വ്യക്തമാക്കി. പഞ്ചാബ് ഗവര്‍ണര്‍ക്കെതിരേ സംസ്ഥാന സര്‍ക്കാര്‍ നല്‍കിയ കേസിലാണ് ചീഫ് ജസ്റ്റിസ് ഡി.വൈ. ചന്ദ്രചൂഡ് അധ്യക്ഷനായ ബെഞ്ചിന്‍റെ സുപ്രധാന വിധി.

ബില്ലുകള്‍ മുന്നിലെത്തുമ്പോള്‍ മൂന്ന് സാധ്യതകളാണ് ഗവര്‍ണർക്കുള്ളത്. ഒന്നുകിൽ ബില്ലിന് അനുമതി നല്‍കുക. അല്ലെങ്കില്‍ ബില്ല് തടഞ്ഞുവയ്ക്കാം. ഇവ രണ്ടുമല്ലെങ്കില്‍ രാഷട്രപതിയുടെ അഭിപ്രായം തേടാം. ഭരണഘടനാ അനു​ച്ഛേദം 200 പ്രകാരം ബില്ലുകള്‍ നിയമസഭയ്ക്കുതന്നെ തിരിച്ചയച്ച് മാറ്റങ്ങള്‍ നിര്‍ദേശിക്കാനുള്ള സ്വാതന്ത്ര്യവും ഗവര്‍ണര്‍ക്കുണ്ട്. മാറ്റങ്ങൾ ഉൾപ്പെടുത്തിയോ അല്ലാതെയോ നിയമസഭ വീണ്ടും ബില്ലുകള്‍ പാസാക്കിയാല്‍ ഒപ്പിടാന്‍ ഗവര്‍ണര്‍ക്ക് ഉത്തരവാദിത്തമുണ്ടെന്നും സുപ്രീംകോടതി വ്യക്തമാക്കി.

ജനാധിപത്യത്തില്‍ തിരഞ്ഞെടുക്കപ്പെട്ട പ്രതിനിധികള്‍ക്കാണ് അധികാരമെന്നും സുപ്രീംകോടതി പറഞ്ഞു. രാഷട്രപതി നാമനിര്‍ദേശം ചെയ്യുന്ന പ്രതിനിധി മാത്രമാണ് ഗവര്‍ണര്‍. തിരഞ്ഞെടുക്കപ്പെട്ടവർക്കാണ് നിയമനിർമാണവുമായി ബന്ധപ്പെട്ട വിഷയങ്ങളിൽ ഉത്തരവാദിത്തമെന്നും സുപ്രീംകോടതി ആവർത്തിച്ചു.

ഗവർണർമാർ വഴി പ്രതിപക്ഷ കക്ഷികൾ ഭരിക്കുന്ന സംസ്ഥാനങ്ങളിൽ തുടർച്ചയായി അനിശ്ചിതത്വം സൃഷ്ടിക്കുന്ന പശ്ചാത്തലത്തിലാണ് പ്രശ്നം സുപ്രീം കോടിതിക്ക് മുന്നാലെ എത്തിയത്.