കനത്തമഴയിലും ശബരിമല സന്നിധാനത്ത് ബുധനാഴ്ച ദര്‍ശനത്തന് എത്തിയത് 35,000 തീര്‍ഥാടകര്‍. ഇന്ന് 47,000 പേരും നാളെ 65,000 പേരും ദര്‍ശനത്തിന് ബുക്ക് ചെയ്തിട്ടുണ്ട്. ഉച്ചയ്ക്കു തുടങ്ങിയ മഴ രാത്രിയിലും തുടര്‍ന്നു. കനത്ത മഴയെ തുടര്‍ന്ന് നിലയ്ക്കല്‍ – പമ്പ ശബരിമല പാതയിലും ജാഗ്രതാ നിര്‍ദേശം ഉണ്ട്.

ആറു വയസുകാരിക്ക് പാമ്പ് കടിയേറ്റു

സന്നിധാനത്തേക്കുള്ള യാത്രക്കിടെ ആറു വയസുകാരിക്ക് പാമ്പ് കടിയേറ്റ സംഭവ കൂടുതൽ പാമ്പു പിടുത്തക്കാരെ വിന്യസിക്കാൻ വനം വകുപ്പ് തീരുമാനിച്ചിട്ടുണ്ട്. തിരുവനന്തപുരം കാട്ടാകട സ്വദേശി പ്രശാന്തിന്റെ മകൾ നിരഞ്ജന (6) നാണ് സ്വാമി അയ്യപ്പൻ റോഡ് ഒന്നാം വളവിൽ പുലർച്ചെ നാലിനു പാമ്പുകടി ഏറ്റത്.

കുട്ടിയെ ഉടനടി പമ്പ സർക്കാർ ആശുപത്രിയിൽ എത്തിക്കുകയും അടിയന്തര വൈദ്യ സഹായം ലഭ്യമാക്കുകയും ചെയ്തു. ആന്റി വെനം ഇൻജെക്ഷൻ നൽകിയ ശേഷം കൂടുതൽ ചികിത്സയ്ക്കും നിരീക്ഷണത്തിനുമായി കുട്ടിയെ കോട്ടയം മെഡിക്കൽ കോളജിലേക്ക് മാറ്റി. കുട്ടിയുടെ ആരോഗ്യ സ്ഥിതി തൃപ്തികരം ആണെന്ന് ആശുപത്രി അധികൃതർ അറിയിച്ചു. അണലിയുടെ കടിയാണ് ഏറ്റത് എന്നാണ് നിഗമനം.

കഴിഞ്ഞ ദിവസം ഒൻപത് വയസുകാരിയെ കാണാതായത് പരിഭ്രാന്തി പരത്തിയിരുന്നു. ബസ്സിൽ ഉറങ്ങിപ്പോയ കുട്ടിയെ കൂട്ടാതെ ഒന്നിച്ചുള്ളവർ ഇറങ്ങുകയായിരുന്നു. ബസ് പുറപ്പെട്ട് പോവുകയും ചെയ്തു. പിന്നീട് പൊലീസും മോട്ടോർ വാഹന വകുപ്പും ചേർന്ന് കുട്ടിയെ കണ്ടെത്തി.

കാനന പാതയിലും സ്വാമി അയ്യപ്പൻ റോഡിലും വന്യമൃഗങ്ങളുടെ ആക്രമണങ്ങൾ ഉണ്ടാകാതെ ഇരിക്കുവാനുള്ള നടപടികൾ വനം വകുപ്പ് അധികൃതർ സ്വീകരിച്ചിട്ടുണ്ട്. നിലവിൽ രണ്ടു പാമ്പു പിടുത്തക്കാർ വനം വകുപ്പിന്റേതായി സേവനം നടത്തുന്നുണ്ട്. എന്നാൽ ഇപ്പോൾ നടന്ന അപകടത്തിന്റെ ഗൗരവം കണക്കിലെടുത്ത് രണ്ടു പേരെ കൂടി അധികം വിന്യസിക്കാൻ ഉത്തരവിട്ടിട്ടുണ്ട് എന്ന് ഫോറെസ്റ് റേഞ്ച് ഓഫീസർ അറിയിച്ചു.

മഴയും കാലാവസ്ഥ വ്യതിയാനവും മനസിലാക്കി അയ്യപ്പന്മാർ കൂടുതകൾ ജാഗ്രത പുലർത്തണം വനം വകുപ്പ് നിർദേശിച്ചു. അയ്യപ്പന്മാർക്ക് അടിയന്തര വൈദ്യ സഹായം നൽകുന്നതിനുള്ള എല്ലാ സൗകര്യങ്ങളും പമ്പയിലും സന്നിധാനത്തും ക്രമീകരിച്ചിട്ടുണ്ട് എന്ന് ഡി എം ഓ അറിയിച്ചു.

താമരശ്ശേരി ചുരത്തില്‍ രണ്ടാംവളവിനുതാഴെ ഇന്നോവ കാര്‍ കൊക്കയിലേക്ക് മറിഞ്ഞ് യുവതി മരിച്ചു. വാഹനത്തിൽ ഉണ്ടായിരുന്ന എട്ടുപേര്‍ക്ക് പരിക്കേറ്റു. വയനാട് മുട്ടില്‍ പരിയാരം ഉപ്പൂത്തിയില്‍ കെ.പി. റഷീദ (35) ആണ് മരിച്ചത്. ഇവരുടെ കുടുംബം സഞ്ചരിച്ച കാറാണ് അപകടത്തില്‍പ്പെട്ടത്. ബുധനാഴ്ച രാത്രി 9.45-ഓടെയാണ് അപകടം.

എതിരേനിന്നുവന്ന ലോറിയില്‍ ഇടിക്കാതിരിക്കാന്‍ പെട്ടെന്ന് വെട്ടിച്ചപ്പോള്‍ സംരക്ഷണഭിത്തി തകര്‍ന്നുകിടന്ന സ്ഥലത്തുകൂടി കാര്‍ വലിയ താഴ്ചയിലേക്ക് വീഴുകയായിരുന്നു. രണ്ടാം വളവിൽ തന്നെയാണ് അപകടം ഉണ്ടായത് എന്നത് വീഴ്ചയുടെ ആഘാതം കുറച്ചു. വലിയ കാറായതും അപകത്തിൻ്റെ രൂക്ഷത കുറയാൻ സഹായകമായി. പക്ഷെ ഇത്രയും വലിയ വാഹനപ്പെരുപ്പമുള്ള ചുരത്തിൽ സംരക്ഷണ ഭിത്തി ഏറെ നളായി തകർന്ന് കിടക്കുകയായിരുന്നു.

കഴിഞ്ഞ ജൂൺ 25 നും സമാനമായ അപകടം ഉണ്ടായിരുന്നു. ബൈക്ക് കൊക്കയിലേക്ക് മറിഞ്ഞ് രണ്ട് പേർക്ക് പരുക്കേറ്റു. 2022 ഡിസംബറിലും സമാനമായ അപകടം ഉണ്ടായി.

മഞ്ഞു മഴയുമായി വർഷത്തിൽ ഏറിയ സമയവും മൂടലുള്ള ചുരമാണ് ഇത്. ഭിത്തി നിർമ്മിക്കയും റിഫ്ലക്ടർ ഘടിപ്പിക്കയും ചെയ്യേണ്ടത് നിയമപരമാണ്. ഇത് തകർന്നാൽ ഉടനടി പരിഹാരവും വേണ്ടതാണ്. വാഹനങ്ങൾക്ക് ഇടവേളയില്ലാത്ത ചുരമാണ്. കനത്തും മഴയും മൂടലുമാണ് കാറിനെ അപകടത്തിലേക്ക് നയിച്ചത്.

രണ്ടുപേരെ വിദേശത്തേക്ക് യാത്രയാക്കിയശേഷം കോഴിക്കോട് വിമാനത്താവളത്തില്‍നിന്ന് വയനാട്ടിലേക്ക് മടങ്ങുകയായിരുന്ന കുടുംബം സഞ്ചരിച്ച കാറാണ് അപകടത്തില്‍പ്പെട്ടത്. രാത്രിയായതിനാലും കനത്തമഴയായതിനാലും രക്ഷാപ്രവര്‍ത്തനം ദുഷ്‌കരമായി. പരിക്കേറ്റവരെ മുകളിലെത്തിക്കാന്‍ കഴിയാത്തതിനാല്‍ മറ്റൊരുവഴിയാണ് പുറത്തേക്ക് എത്തിച്ചത്.

രക്ഷാപ്രവര്‍ത്തനത്തിനിടെ ഇരുവശവും അടച്ചതിനാല്‍ രണ്ടാംവളവിനുതാഴെയും മുകളിലുമായി വാഹനങ്ങള്‍ മണിക്കൂറുകളോളം കുടുങ്ങിക്കിടന്നു. രാത്രി പതിനൊന്നുമണിയോടെ രക്ഷാപ്രവര്‍ത്തനം അവസാനിച്ചശേഷമാണ് ഗതാഗതം പുനഃസ്ഥാപിച്ചത്.

ശബരിമല തീര്‍ഥാടനത്തിനിടെ കാണാതായ ഒന്‍പതു വയസ്സുകാരിയെ കണ്ടെത്തി ബന്ധുക്കളുടെ അടുത്തെത്തിച്ചു. കുടുംബത്തോടൊപ്പം യാത്ര ചെയ്ത കുട്ടി ബസ്സില്‍ ഉറങ്ങിപ്പോയതിനെത്തുടര്‍ന്നാണ് കാണാതായത്. തമിഴ്‌നാട്ടില്‍നിന്ന് ശബരിമലയിലേക്ക് തീര്‍ഥാടനത്തിനെത്തിയ സംഘത്തിലെ കുട്ടിയാണ്. രക്ഷിതാക്കളായി എത്തിയവർ കുട്ടി ഇറങ്ങിയോ എന്ന് ഉറപ്പ് വരുത്തിയിരുന്നില്ല.

ഭവ്യ എന്ന നാലാംക്ലാസുകാരി ഉൾപ്പെടുന്ന സംഘം ബുധനാഴ്ച രാവിലെ പത്തിനാണ് പമ്പയിൽ എത്തിയത്. ബസ്സിറങ്ങി നടന്ന് കുറച്ചുകഴിഞ്ഞപ്പോഴാണ് മകളെ കാണാനില്ലെന്ന് അച്ഛന് ബോധ്യപ്പെട്ടത്. തിരികെയെത്തി അന്വേഷിച്ചെങ്കിലും കണ്ടെത്താനായില്ല.

ബസ് പമ്പയില്‍ അയ്യപ്പൻമാരെ ഇറക്കിയ ശേഷം നിലയ്ക്കലിലേക്ക് മടങ്ങിയിരുന്നു. ഇതോടെ പെണ്‍കുട്ടിയുടെ പിതാവ് പോലീസില്‍ പരാതി നല്‍കി. പോലീസ് വിവരമറിയിച്ചതു പ്രകാരം മോട്ടോര്‍ വാഹനവകുപ്പ് ജീവനക്കാര്‍ ബസ്സിന്റെ നമ്പര്‍ സ്വീകരിച്ച് നിലയ്ക്കലിലെത്തി. തീര്‍ഥാടകര്‍ സഞ്ചരിച്ചിരുന്ന ബസ് അട്ടത്തോട്ടില്‍വെച്ച് കണ്ടെത്തി എങ്കിലും എല്ലാവരും പമ്പയില്‍ത്തന്നെ ഇറങ്ങിയെന്നായിരുന്നു ജീവനക്കാരുടെ മറുപടി.

ഇതോടെ ബസ്സിനകത്ത് കയറി പരിശോധിച്ചപ്പോള്‍ പിന്‍സീറ്റില്‍ ഉറങ്ങുന്ന നിലയില്‍ പെണ്‍കുട്ടിയെ കണ്ടെത്തി. കുഞ്ഞിനെ കണ്ടുകിട്ടിയ കാര്യം പോലീസിലറിയിക്കാന്‍ കണ്‍ട്രോള്‍ റൂമിലേക്ക് വിളിച്ചെങ്കിലും മൊബൈല്‍ റേഞ്ചില്ലാത്തത് വീണ്ടും അനിശ്ചിതത്വം സൃഷ്ടിച്ചു. തുടര്‍ന്ന് മോട്ടോ വാഹന വകുപ്പ് വാഹനത്തില്‍ കുഞ്ഞിനെ പോലീസ് കണ്‍ട്രോള്‍ റൂമിലെത്തിച്ചു. ആശങ്കയോടെ കാത്തിരുന്ന രക്ഷിതാക്കൾക്ക് കൈമാറി.