ഇടുക്കിയിൽ വിനോദസഞ്ചാരികൾ എത്തുന്ന കുട്ടിക്കാനത്തിനു സമീപം വളഞ്ഞങ്ങാനത്ത് നിര്ത്തിയിട്ട കാറിന് മുകളിലേക്ക് മണ്ണിടിഞ്ഞുവീണ് മുതിർന്ന സ്ത്രീ മരിച്ചു. കാറിലുണ്ടായിരുന്ന ഉപ്പുതറ സ്വദേശി സോമിനി (67) ആണ് മരിച്ചത്. കാറിലുണ്ടായിരുന്നവർ പാഞ്ചാലിമാട് ടൂറിസ്റ്റ് കേന്ദ്രത്തില്നിന്ന് മടങ്ങി വരുന്നതിനിടെ ഞായറാഴ്ച രാത്രി ഏഴുമണിയോടെയാണ് അപകടമുണ്ടായത്. അഞ്ചു പേർക്ക് പരുക്കേറ്റു.
കമ്പംമേട്ട് പോലീസ് സ്റ്റേഷനിലെ പോലീസ് ഉദ്യോഗസ്ഥനായ ബിബിനും പോലീസ് ഉദ്യോഗസ്ഥയായ ഭാര്യ അനുഷ്കയും കുടുംബസമേതം പാഞ്ചാലിമേട് ടൂറിസ്റ്റ് കേന്ദ്രത്തില്നിന്ന് പുറപ്പെട്ടതായിരുന്നു. എട്ടുമാസം പ്രായമുള്ള കുഞ്ഞടക്കം ഇവരുടെ കൂടെയുണ്ടായിരുന്നു. ഇവരുടെ സഹായിയായി എത്തിയതാണ് മരിച്ച സോമിനി.
വളഞ്ഞങ്ങാനത്ത് എത്തിയപ്പോൾ കാര് നിര്ത്തി യാത്രക്കാരില് ചിലര് പുറത്തിറങ്ങിയിരുന്നു. എന്നാല് സോമിനി വാഹനത്തിനുള്ളില്ത്തന്നെ ഇരുന്നു. ഈ സമയത്താണ് കറിനു മുകളിൽ മണ്ണിടിഞ്ഞു വീണത്. കാറില്ത്തന്നെയുണ്ടായിരുന്ന ബിബിനും അനുഷ്കയും മറ്റു മൂന്നുപേരും നിസ്സാര പരിക്കുകളോടെ അദ്ഭുതകരമായി രക്ഷപ്പെട്ടു. ഇവരെ കോട്ടയത്തെ സ്വകാര്യ ആശുപത്രിയില് പ്രവേശിപ്പിച്ചു.
കഴിഞ്ഞ കുറെ മണിക്കൂറായി പ്രദേശത്ത് മഴയുണ്ടായിരുന്നു.
