സോഷ്യൽ മീഡിയ ബിസിനസ്സിലും സ്വകാര്യത വലിയ കാര്യം തന്നെയെന്ന് അവസാനം അംഗീകിച്ച് മെറ്റ. ഫെയ്സ്ബുക്ക് മെസഞ്ചര് ആപ്പില് പുതിയ ഡിഫോൾട്ട് എന്റ് ടു എന്റ് എന്ക്രിപ്ഷന് ഫീച്ചർ അവതരിപ്പിച്ചു. വർഷങ്ങളുടെ പ്രയത്നത്തിന് ശേഷമാണ് ഇത് സാധ്യമാകുന്നതെന്നും പിന്നിൽ പ്രവർത്തിച്ച എല്ലാവർക്കും അഭിനന്ദനങ്ങൾ നേരുന്നു എന്നുമാണ് മെറ്റാ സിഇഒ മാർക്ക് സക്കർബർഗ് ഫെയ്സ്ബുക്കിലൂടെ അറിയിച്ചത്.
2016ൽ ആണ് മെറ്റ ആദ്യമായി മെസഞ്ചറില് എന്റ് ടു എന്റ് എന്ക്രിപ്ഷന് ഫീച്ചറുകള് പരീക്ഷിക്കുന്നത്. കഴിഞ്ഞ വര്ഷം മെസഞ്ചർ ഉപഭോക്താക്കള്ക്ക് കോളുകളും ഗ്രൂപ്പ് ചാറ്റുകളും എന്റ് ടു എന്റ് എന്ക്രിപഷന് അവരുടെ ഇഷ്ടാനുസരണം മാറ്റം വരുത്താനുള്ള ഓപ്ഷൻ മെറ്റ നൽകിയിരുന്നു. എന്നാൽ ഡിഫോൾട്ട് എന്റ് ടു എന്റ് എന്ക്രിപ്ഷന് ഫീച്ചർ ഇപ്പോഴാണ് ഉപഭോക്താക്കൾക്കായി മെറ്റ അവതരിപ്പിക്കുന്നത്.
പുതിയ ഡിഫോൾട്ട് എൻക്രിപ്റ്റ് ചാറ്റിലും കസ്റ്റം ചാറ്റ് ഇമോജികള്, ചാറ്റ് തീം തുടങ്ങിയ പഴയ ഫീച്ചറുകളും ലഭ്യമാകും. എന്നാൽ മെസഞ്ചറിലെ എല്ലാ ചാറ്റുകളും ഡിഫോൾട്ട് എൻക്രിപ്ഷനിലേക്ക് മാറുന്നതിന് സമയമെടുക്കുമെന്നും മെസഞ്ചർ മേധാവി ലോറിഡാന ക്രിസൻ പറഞ്ഞു.
സ്വകാര്യ ചാറ്റുകൾ ഡിഫോൾട്ട് എൻക്രിപ്റ്റിലേക്ക് മാറിയെങ്കിലും ഗ്രൂപ്പ് മെസഞ്ചർ ചാറ്റുകൾക്കുള്ള എൻഡ് ടു എൻഡ് എൻക്രിപ്ഷൻ ഇപ്പോഴും ‘ഓപ്റ്റ് ഇൻ’ ഓപ്ഷനിലാണുള്ളത്. മെറ്റയുടെ കീഴിലുള്ള മറ്റൊരു സമൂഹമാധ്യമമായ ഇൻസ്റാഗ്രാമിലും ചാറ്റ് ഇതുവരെ ഡിഫോൾട്ടായി എൻക്രിപ്റ്റ് ചെയ്തിട്ടില്ല.
