സ്പീക്കര് എ.എന്. ഷംസീറിൻ്റെ പ്രസംഗം ഏറ്റുപിടിച്ച് നായര് സര്വീസ് സൊസൈറ്റി. പരാമര്ശം സ്ഥാനത്തിന് യോജിച്ചതല്ലെന്ന് പറഞ്ഞ് എന്.എസ്.എസ്. ജനറല് സെക്രട്ടറി ജി. സുകുമാരന് നായര് വാര്ത്താക്കുറിപ്പ് പുറത്തിറക്കി. പ്രസ്താവന അതിരുകടന്നുപോയി. മാപ്പു പറയണം അല്ലെങ്കിൽ സർക്കാർ നടപടി സ്വീകരിക്കണം എന്നാണാവശ്യം.
പറഞ്ഞ സാഹചര്യം എന്തായാലും ഒരുതരത്തിലും ന്യായീകരിക്കാവുന്നതല്ല. പ്രസ്താവന അതിരുകടന്നുപോയി. ”ഗണപതി ഭഗവാനെ സംബന്ധിച്ച വിശ്വാസത്തെ വിമര്ശിച്ചുകൊണ്ടുള്ള സ്പീക്കര് ഷംസീറിന്റെ നിരൂപണം ഏതു മതത്തില് വിശ്വസിക്കുന്നവര്ക്കായാലും, പ്രത്യേകിച്ച് ജനാധിപത്യത്തിന്റെ ശ്രീകോവിലായ അസംബ്ലിയെ നിയന്ത്രിക്കുന്ന വ്യക്തിക്കായാലും യോജിച്ചതല്ല. പറഞ്ഞ സാഹചര്യം എന്തായാലും അത് ഒരു തരത്തിലും ന്യായീകരിക്കത്തക്കതല്ല. ഓരോ മതത്തിനും അതിന്റേതായ വിശ്വാസപ്രമാണങ്ങളുണ്ട്. അതിനെ ചോദ്യംചെയ്യാന് ആര്ക്കും അര്ഹതയോ അവകാശമോ ഇല്ല.
മതസ്പര്ധ വളര്ത്തുന്ന രീതിയിലുള്ള പെരുമാറ്റം ആരുടെ ഭാഗത്തുനിന്നും ഉണ്ടായാലും അത് അംഗീകരിക്കാവുന്നതല്ല. ഈ സാഹചര്യത്തില് നിയമസഭാ സ്പീക്കര് സ്ഥാനത്ത് തുടരുന്നതിനുതന്നെ അര്ഹതയില്ല. വിശ്വാസികളുടെ വികാരം വ്രണപ്പെടുത്തുവിധം സ്പീക്കര് നടത്തിയ പരാമര്ശങ്ങള് പിന്വലിച്ച് അവരോട് മാപ്പുപറയുകയാണ് ചെയ്യേണ്ടത്. അല്ലാത്തപക്ഷം സ്പീക്കര്ക്കെതിരെ യുക്തമായ നടപടി സ്വീകരിക്കുന്നതിന് സംസ്ഥാനസര്ക്കാരിന് ബാധ്യതയുണ്ടെന്നും ജി. സുകുമാരന് നായര് പത്ര കുറിപ്പിൽ പറഞ്ഞു.
