ഗുരുവായൂര് ക്ഷേത്രത്തിലെ മേല്ശാന്തിയായി പി.എം. ശ്രീനാഥ് നമ്പൂതിരി. ഒക്ടോബര് ഒന്നു മുതല് അടുത്ത ആറ് മാസത്തേക്കുള്ള മേല്ശാന്തിയായാണ് തെക്കേ വാവന്നൂര് പൊട്ടക്കുഴി മന വൃന്ദാവനത്തില് ശ്രീനാഥ് നമ്പൂതിരിയെ തിരഞ്ഞെടുത്തത്.
മേല്ശാന്തി തിരഞ്ഞെടുപ്പില് കൂടിക്കാഴ്ചയ്ക്കായി ക്ഷണിച്ച 45 പേരില് 41 ഹാജരായിരുന്നു. ഇവരില് നിന്നും യോഗ്യത നേടിയ 40 പേരുടെ പേരുകള് നറുക്കെടുത്താണ് അവസരം നിശ്ചയിച്ചത്.
ദേവസ്വം ചെയര്മാന് ഡോ.വി.കെ.വിജയന്, ഭരണ സമിതി അംഗങ്ങളായ മല്ലിശ്ശേരി പരമേശ്വരന് നമ്പൂതിരിപ്പാട്, സി മനോജ്, കെ.ആര് ഗോപിനാഥ്, വി.ജി.രവീന്ദ്രന്, അഡ്മിനിസ്ട്രേറ്റര് കെ.പി.വിനയന് എന്നിവര് ചടങ്ങില് സന്നിഹിതരായി.
