പൊലീസിൽ നായയെ വാങ്ങിയതിൽ ക്രമക്കേട് കണ്ടെത്തിയതിനെ തുടർന്ന് സംസ്ഥാനത്തെ ഡോഗ് സ്ക്വാഡ് നോഡൽ ഓഫീസറെ സസ്പെൻഡ് ചെയ്തു.
കെഎപി മൂന്നാം ബറ്റാലിയന്റെ അസിസ്റ്റന്റ് കമാണ്ടന്റായ എസ് എസ് സുരേഷിനെയാണ് ഇപ്പോള് അന്വേഷണ വിധേയമായി ആഭ്യന്തരവകുപ്പ് സസ്പെന്ഡ് ചെയ്തിരിക്കുന്നത്. ഡോഗ് സ്ക്വാഡിലെ നോഡല് ഓഫീസര് കൂടിയാണ് സുരേഷ്. സംസ്ഥാന വിജിലന്സിന് നിരവധി പരാതികള് ലഭിച്ചിരുന്നു. വിജിലന്സ് നടത്തിയ രഹസ്യാന്വേഷണത്തിന്റെ റിപ്പോര്ട്ടിന്റ അടിസ്ഥാനത്തിലാണ് ഇയാളെ സസ്പെന്ഡ് ചെയ്തിരിക്കുന്നത്.
തിരുവനന്തപുരത്തുള്ള ഒരു സ്ഥാപനത്തില് നിന്നാണ് നായ്ക്കള്ക്ക് വേണ്ടി ഉയര്ന്ന നിരക്കില് സാധനങ്ങള് വാങ്ങിയിരുന്നത്. മാത്രമല്ല ഉയര്ന്ന നിരക്കില് ഉത്തരേന്ത്യയില് നിന്ന് നായ്ക്കളെ വാങ്ങിയിരുന്നു എന്നും റിപ്പോര്ട്ടില് പറയുന്നു.
ഈ റിപ്പോര്ട്ടിൻ്റെ അടിസ്ഥാനത്തില് കേസെടുത്ത് വിശദമായ അന്വേഷണത്തിന് വിജിലന്സ് അനുമതി തേടിയിരുന്നു. അന്വേഷണ വിധേയമായാണ് സസ്പെന്ഷൻ. തൃശ്ശൂരിലെ സ്റ്റേറ്റ് ഡോഗ് ട്രെയിനിങ് സ്കൂളിലേക്ക് നായക്കുട്ടികളെയും അവയ്ക്ക് തീറ്റയും മരുന്നും വാങ്ങിയതിലാണ് ക്രമക്കേട്
ഉത്തരേന്ത്യയിലെ വിവിധ സംസ്ഥാനങ്ങളില്നിന്ന് വലിയ വിലകൊടുത്ത് നായക്കുട്ടികളെ വാങ്ങിയതിലും ഭക്ഷണവും മരുന്നും വാങ്ങിയതിലുമാണ് ക്രമക്കേട് കണ്ടെത്തിയത്. 125 നായകളെ പരിശീലിപ്പിക്കാനും വളര്ത്താനുമുള്ള സൗകര്യം കേരള പോലീസ് അക്കാദമിയിലുണ്ട്. ഇത് പരിഗണിക്കാതെ സൗകര്യമില്ലാത്ത കുട്ടിക്കാനം പോലുള്ള ക്യാമ്പുകളില് നായകള്ക്ക് പരിശീലനം നല്കിയതും കേസിലേക്ക് നയിച്ചു.
