മോട്ടോർ വാഹനവകുപ്പ് തയ്യാറാക്കിയ റോഡ് സുരക്ഷാ പുസ്തകം ഹയര്സെക്കന്ഡറി പാഠ്യപദ്ധതിയിലേക്ക്. ഈ പുസ്തകം ഉൾപ്പെടുന്ന സിലബസ് പഠിക്കുന്നവർക്ക് ഇനി ലേണേഴ്സ് ഡ്രൈവിങ് ലൈസന്സ് ആവശ്യം വരില്ല. നേരിട്ട് ഡ്രൈവിങ് ടെസ്റ്റിന് അപേക്ഷിക്കാം. ഹയര്സെക്കന്ഡറി പാഠ്യപദ്ധതി പരിഷ്കരണകമ്മിറ്റി ഈ പുസ്തകം അംഗീകരിച്ചു.
ഇത് പ്രകാരം പാഠഭാഗങ്ങൾ ഉൾപ്പെടുത്തി സിലബസ് പരിഷ്കരിക്കുന്നതിനുള്ള നടപടികള് ആരംഭിച്ചു. ഹയര്സെക്കന്ഡറി സിലബസിന് യോജിക്കുന്ന വിധത്തില് പാഠ്യഭാഗങ്ങള് സ്വീകരിക്കാനാണ് തീരുമാനം.
ഏത് വിഷയത്തിനൊപ്പം ചേര്ത്ത് പഠിപ്പിക്കണമെന്നത് അടക്കമുള്ള കാര്യങ്ങളില് തീരുമാനമായിട്ടില്ല . പാഠ്യപദ്ധതി പരിഷ്കരണത്തോടെ സംസ്ഥാനത്തെ ലേണേഴ്സ് പരീക്ഷാ സംവിധാനത്തില് മാറ്റംവരുത്തണമെന്നാവശ്യപ്പെട്ട് സംസ്ഥാന സര്ക്കാര് കേന്ദ്രത്തിന് കത്ത് നല്കിയിട്ടുണ്ട്.
റോഡ് സുരക്ഷാനിയമങ്ങള്, സുരക്ഷിതമായ ഡ്രൈവിങ് രീതികള്, അപകടങ്ങളിലേക്ക് നയിക്കുന്ന പിഴവുകള്, സിഗ്നല് പരിചയം, റോഡുകളെ മനസ്സിലാക്കേണ്ട രീതി, അപകടങ്ങള് സമൂഹത്തിലുണ്ടാക്കുന്ന പ്രത്യാഘാതങ്ങള്, സുരക്ഷാ ക്രമീകരണങ്ങള്, വേഗപരിധി, പാര്ക്കിങ് രീതികള് എന്നിവയെല്ലാം പ്ലസ്ടു സിലബസില് ഇടംപിടിക്കും.
