മുതിർന്ന കോൺഗ്രസ് നേതാവ് വക്കം പുരുഷോത്തമൻ അന്തരിച്ചു. 96 വയസ്സായിരുന്നു. തിരുവനന്തപുരം കുമാരപുരത്തെ വീട്ടിലായിരുന്നു അന്ത്യം. അഭിഭാഷക ജോലിയിൽ നിന്നാണ് വക്കം പുരുഷോത്തമൻ രാഷ്ട്രീയത്തിലേക്കെത്തിയത്. മൂന്നു തവണ സംസ്ഥാന മന്ത്രിയായിട്ടുണ്ട്. കൃഷി, ആരോഗ്യം, ടൂറിസം, തൊഴിൽ, ധനകാര്യം എന്നീ വകുപ്പുകളിൽ മന്ത്രിസ്ഥാനം വഹിച്ചു.
രണ്ട് തവണ ലോക്സഭാ അംഗം, രണ്ട് തവണ ഗവർണർ, അഞ്ച് തവണ നിയമസഭാ അംഗവുമായി. ഏറ്റവും അധികം കാലം നിയമ സഭാ സ്പീക്കർ ആയിരുന്ന നേതാവാണ്. ധന മന്ത്രി,സ്പീക്കർ എന്നി പദവികളിൽ ശ്രദ്ധേയമായി.
കുറച്ച് ദിവസങ്ങളായി ആരോഗ്യപ്രശ്നങ്ങളുണ്ടായിരുന്നു. ഇതിൻ്റെ ഭാഗമായി ചികിത്സതേടിയിരുന്നു. ഇന്ന് ഉച്ചക്ക് ശ്വാസതടസ്സമുണ്ടാവുകയും മരണം സംഭവിക്കുകയുമായിരുന്നു.
പഞ്ചായത്തിൽ നിന്നും പാർലമെൻ്റ് വരെ
വിദ്യാർത്ഥി രാഷ്ട്രീയത്തിലൂടെയാണ് രാഷ്ട്രീയ ജീവിതത്തിൻ്റെ തുടക്കം. പഞ്ചായത്ത് അംഗമായി പാർലമെൻ്ററി ജീവിതം ആരംഭിച്ചു. ദീർഘകാലം ആറ്റിങ്ങലിൽ നിന്ന് നിയമസഭയിലെത്തി. രണ്ടു തവണ ആലപ്പുഴയിൽ നിന്ന് ലോക്സഭയിലേക്കും മത്സരിച്ചു. തിരുവനന്തപുരം ഡിസിസി പ്രസിഡന്റ്, കെപിസിസി ജനറൽ സെക്രട്ടറി, കെപിസിസി വൈസ് പ്രസിഡന്റ് എന്നീ പദവികൾ വഹിച്ചിട്ടുണ്ട്.
മികച്ച സ്പീക്കർ, ഉദ്യോഗസ്ഥ ഭരണത്തെ വിറപ്പിച്ച മന്ത്രി
ആറ്റിങ്ങല് നിയോജക മണ്ഡലത്തില്നിന്ന് 1970,1977,1980,1982, 2001 വര്ഷങ്ങളില് നിയമസഭയിലെത്തി. 1971-77, 1980-81, 2001-2004 കാലയളവില് സംസ്ഥാന മന്ത്രിസഭകളിലും അംഗമായി. 1971-77 കാലത്തെ അച്യുതമേനോന് മന്ത്രിസഭയില് വക്കം കൃഷി, തൊഴില് വകുപ്പുകളുടെ ചുമതല വഹിച്ചിരുന്നു. തുടര്ന്ന് വന്ന നായനാര് സര്ക്കാരില് ആരോഗ്യ, ടൂറിസം മന്ത്രിയായി.
1982-84 കാലത്തും പിന്നീട് 2001 മുതല് 2004 വരെയും അദ്ദേഹം സ്പീക്കര് സ്ഥാനം വഹിച്ചു. 80 കളില് പാര്ലമെന്റിലേക്ക് തട്ടകം മാറ്റിയ വക്കം 1984 മുതല് 1991 വരെ ലോക്സഭാംഗമായിരുന്നു. 2004-ലില് ഉമ്മന് ചാണ്ടി മന്ത്രിസഭയില് ധനകാര്യ- എക്സൈസ് വകുപ്പ് മന്ത്രിയായിരുന്നു
1993-96 കാലത്ത് ആന്ഡമാന് ആന്ഡ് നിക്കോബാര് ദ്വീപസമൂഹത്തിന്റെ ലെഫ്റ്റനന്റ് ഗവര്ണര് ആയിരുന്നു. 2011 മുതല് 2014 വരെ മിസോറം ഗവര്ണറായിരുന്നു. 2014 ജൂണ് 30 മുതല് 2014 ജൂലൈ 14 വരെ ത്രിപുരയുടെ ഗവര്ണറായി അധിക ചുമതലയും വഹിച്ചിരുന്നു. തിരക്കുള്ള അഭിഭാഷകനായിരുന്ന വക്കം, ആര്.ശങ്കറിന്റെ നിര്ദേശപ്രകാരമാണ് കോണ്ഗ്രസ് രാഷ്ട്രീയത്തിലേക്ക് എത്തിയത്.
ഡോ. ലില്ലിയാണ് വക്കം പുരുഷോത്തമന്റെ ഭാര്യ. രണ്ട് ആണ്മക്കളും ഒരു മകളുമുണ്ട്.
