വനിതാ സംവരണ ബിൽ ലോക്സഭയില് അവതരിപ്പിച്ചു. ഇതോടെ പുതിയ പാർലമെന്റില് അവതരിപ്പിച്ച ആദ്യ ബില്ലായി വനിതാ സംവരണ ബില് മാറി. കേന്ദ്ര നിയമമന്ത്രി അർജുൻ റാം മേഘ്വാൾ ആണ് ബില് അവതരിപ്പിച്ചത്. അംഗങ്ങൾക്ക് ബില്ലിന്റെ ഹാർഡ് കോപ്പി നൽകാത്തതിൽ പ്രതിപക്ഷം പ്രതിഷേധിച്ചു.
നിയമനിര്മാണ സഭകളിലേക്കുള്ള തിരഞ്ഞെടുപ്പുകളില് മൂന്നിലൊന്ന് സീറ്റില് സ്ത്രീകള്ക്ക് സംവരണം ഉറപ്പാക്കുന്നതാണ് വനിതാ സംവരണബില്. അതുവഴി ലോക്സഭയിലും സംസ്ഥാന നിയമസഭകളിലും സ്ത്രീകള്ക്ക് 33 ശതമാനം സംവരണം ഉറപ്പാകും.
128ാം ഭരണഘടനാ ഭേദഗതിയായാണ് കേന്ദ്ര നിയമമന്ത്രി അർജുൻ രാം മേഘ്വാള് ലോക്സഭയിൽ ബിൽ അവതരിപ്പിച്ചത്.
ഇന്ന് ചർച്ചയില്ല
കോൺഗ്രസിന്റെ നേതൃത്വത്തിൽ രാജ്യസഭയിൽ പാസാക്കിയ പഴയ ബിൽ നിലവിലുണ്ടെന്നും പ്രതിപക്ഷം ചൂണ്ടാക്കാട്ടി. എന്നാല് ആ ബിൽ അസാധുവായെന്നു കേന്ദ്ര ആഭ്യന്തര മന്ത്രി അമിത് ഷാ മറുപടി നല്കി. ബില്ലിന് മേലുള്ള ചർച്ച ഇന്ന് ഉണ്ടാകില്ല. ലോക്സഭ പിരിഞ്ഞു. നാളെയായിരിക്കും ബില്ലിന്മേലുള്ള ചർച്ച.
2024 ൽ നടപ്പാക്കില്ല, രാജ്യസഭയിൽ പുരുഷ മേൽക്കോയ്മ തുടരും
വനിതാ സംവരണം നിലവിൽ വന്നാൽ ലോക്സഭയിലെ വനിതാ എം.പിമാരുടെ എണ്ണം 82ൽ നിന്ന് 181 ആയി ഉയരുമെന്ന് നിയമമന്ത്രി അർജുൻ റാം മേഘ്വാൾ പറഞ്ഞു. ബില് നിയമമാകുന്നതോടെ ഇന്ത്യന് ജനാധിപത്യ ചരിത്രത്തില് സുപ്രധാന നാഴികകല്ലായി മാറും. എന്നാല് 2024ലെ ലോക്സഭാ തിരഞ്ഞെടുപ്പിൽ വനിതാ സംവരണം നടപ്പിലാകില്ല. മണ്ഡല പുനനിർണയത്തിന് ശേഷം മാത്രമേ വനിതാ സംവരണം നടപ്പാക്കൂ എന്നാണ് ബില്ലിലെ വ്യവസ്ഥ. അതേസമയം രാജ്യസഭയിലും സംസ്ഥാന ലെജിസ്ലേറ്റീവ് കൗണ്സിലുകളിലും വനിതാ സംവരണം ഉണ്ടാകില്ല.
നാരിശക്തന് വന്ദന് എന്ന പേരില് അവതിരിപ്പിച്ച ബില് അനുസരിച്ച് ലോക്സഭയിലും നിയമസഭയിലും സ്ത്രീകള്ക്ക് 33 ശതമാനം സംവരണമാണ് ലക്ഷ്യം വയ്ക്കുന്നത്. വനിതാ സംവരണത്തിനകത്ത് പട്ടികവിഭാഗങ്ങള്ക്ക് ഉപസംവരണം ഉണ്ടാകും. ഒബിസി വിഭാഗത്തിന്റെ സംവരണത്തെക്കുറിച്ച് ബില്ലില് പരാമര്ശമില്ല. രാജ്യസഭയിലും നിയമ കൗൺസിലിലും സംവരണ നിർദേശമില്ല.
പുതിയ പാര്ലമെന്റ് മന്ദിരത്തില് നമ്മള് എന്ത് ചെയ്യുന്നോ അത് രാജ്യത്തെ ഓരോ പൗരന്മാര്ക്കും പ്രചോദനമാകണം. സ്ത്രീകള് നയിക്കുന്ന വികസനത്തിന് വേണ്ടിയുള്ള പ്രവര്ത്തനങ്ങള് അനിവാര്യമാണ്. പാര്ലമെന്റിലെ മൂന്നില് ഒന്ന് സീറ്റ് സ്ത്രീകള്ക്കായി മാറ്റിവയ്ക്കാന് കാബിനറ്റ് അനുമതി നല്കിയെന്നും പുതിയ പാർലമെന്റ് മന്ദിരത്തിലെ ആദ്യ പ്രസംഗത്തില് പ്രധാനമന്ത്രി നരേന്ദ്ര മോദി പറഞ്ഞു.
ഒ ബി സി വിഭാഗത്തെ കുറിച്ച് മൌനം
നിയമനിര്മാണ സഭകളിലേക്കുള്ള തിരഞ്ഞെടുപ്പുകളില് മൂന്നിലൊന്ന് സീറ്റില് സ്ത്രീകള്ക്ക് സംവരണം ഉറപ്പാക്കുന്നതാണ് വനിതാ സംവരണബില്. അതുവഴി ലോക്സഭയിലും സംസ്ഥാന നിയമസഭകളിലും സ്ത്രീകള്ക്ക് 33 ശതമാനം സംവരണം ഉറപ്പാകും. ബില് പ്രകാരം പട്ടിക ജാതി-വര്ഗ സംവരണ സീറ്റുകളിലും മൂന്നിലൊന്ന് സീറ്റ് ആ വിഭാഗങ്ങളില്നിന്നുള്ള സ്ത്രീകള്ക്കായി മാറ്റിവെക്കണം. ഈ സംവരണ സീറ്റുകള് ചാക്രിക ക്രമത്തില് മാറും. എന്നാൽ ഓ ബി സി സംവരണം ഇല്ല.
യു.പി.എ. ഭരണകാലത്ത് 2008-ല് കൊണ്ടുവന്ന ബില് 2010-ല് രാജ്യസഭ പാസാക്കിയിരുന്നു. പിന്നീട് പത്തുവര്ഷത്തിലേറെയായിട്ടും ബില് ലോക്സഭയില് വന്നില്ല.
ഭരണഘടനയുടെ 108-ാം ഭേദഗതി ബില് എന്നറിയപ്പെടുന്ന ഈ ബില് 2008-ലാണ് തയ്യാറാക്കിയതെങ്കിലും 2010-ലാണ് രാജ്യസഭ പാസാക്കിയത്. രാജ്യസഭയില് അന്ന് നടന്ന ബില് ചര്ച്ചയ്ക്കിടയില് ഉത്തര്പ്രദേശ്, ബിഹാര് സംസ്ഥാനങ്ങളില്നിന്നുള്ള സമാജ്വാദി പാര്ട്ടി, ബി.എസ്.പി. ഉള്പ്പെടെയുള്ളവര് എതിര്പ്പുയര്ത്തി ബില്ലിന്റെ പ്രതികള് കീറിയെറിഞ്ഞിരുന്നു. വനിതാ സംവരണത്തിനുള്ളില് ജാതി സംവരണം വേണമെന്നായിരുന്നു ഈ പാര്ട്ടികളുടെ വാദം.
കേരളത്തിൽ ഇനി ആറ് വനിതാ എംപിമാരും 46 എം എൽ എമാരും
33 ശതമാനം വനിതാ സംവരണം രാജ്യത്ത് ഉടനീളം നടപ്പിലാകുന്നതോടെ കേരള നിയമസഭയില് 46 വനിതാ എം.എല്.എ മാര് ഉണ്ടാകും. നിലവിലെ സഭയില് 11 പേരാണ് വനിതകളുള്ളത്.
ഭരണപക്ഷത്ത് ഒന്പതും പ്രതിപക്ഷത്ത് രണ്ടും. ലോക്സഭയിലേക്ക് കേരളത്തില് നിന്നുള്ള 20 എം.പിമാരില് ആറ് പേര് വനിതകള് ആയിരിക്കും. നിലവില് ഏക വനിതാ പ്രതിനിധിയായി രമ്യാ ഹരിദാസ് എം.പി മാത്രമാണ് കേരളത്തില് നിന്ന് ലോക്സഭയിലുള്ളത്
നിലവിലെ ലോക്സഭാ അംഗങ്ങളുടെ കണക്ക് വച്ച് ഇനി മുതല് 179 വനിതാ പ്രതിനിധികള് ഉണ്ടാകും.
നിലവില് 78 പേരാണ് വനിതാ അംഗങ്ങളായിട്ടുള്ളത്. സ്വാതന്ത്ര്യത്തിന് ശേഷമുള്ള ഏറ്റവും കൂടുതല് വനിതാ പ്രാതിനിധ്യമാണിത്. അതായത് 14 % മാത്രം.
