ഗവര്ണര് ആരിഫ് മുഹമ്മദ് ഖാന്റെ സുരക്ഷ കേന്ദ്ര സേന ഏറ്റെടുക്കുന്നു. ഗവര്ണര്ക്കും കേരള രാജ്ഭവനും സിആര്പിഎഫിൻ്റെ ഇസഡ് പ്ലസ് സുരക്ഷ ഏര്പ്പെടുത്തുന്നതായി കേന്ദ്ര ആഭ്യന്തര മന്ത്രാലയം രാജ്ഭവനെ അറിയിച്ചു.
ഇതുസംബന്ധിച്ച ട്വീറ്റ് പുറത്തു വിട്ടു. ഇനി സി.ആര്.പി.എഫ് ആയിരിക്കും ഗവർണർക്ക് ഒരുക്കുക. കേരള പോലീസിന്റെ സുരക്ഷ മറികടന്നാവും ഇത്.
കൊല്ലം നിലമേലില് ഗവര്ണര് ആരിഫ് മുഹമ്മദ് ഖാനു നേരെ എസ്.എഫ്.ഐയുടെ കരിങ്കൊടി പ്രതിഷേധത്തിനെ തുടർന്നുണ്ടായ സംഭവവികാസങ്ങളെ തുടർന്നാണ് കേന്ദ്രത്തിൻ്റെ നേരിട്ടുള്ള ഇടപെടൽ. വാഹനത്തില്നിന്നും റോഡിലിറങ്ങി പ്രവര്ത്തകരോടും പോലീസിനോടും കയര്ത്ത ഗവര്ണര് റോഡില് പ്രതിഷേധിച്ചിരുന്നു.
പ്രതിഷേധക്കാരെ സംരക്ഷിക്കുന്നത് പോലീസ് ആണെന്നും അവര്ക്കെതിരെ കേസെടുക്കാതെ വാഹനത്തില് കയറില്ലെന്ന ഉറച്ച നിലപാടില് റോഡിന് സമീപമിരുന്ന് പ്രതിഷേധിച്ച ഗവർണർ, പ്രതിഷേധക്കാർക്കെതിരേ കേസെടുത്ത് എഫ്ഐആർ രേഖകൾ കാണിച്ച ശേഷമായിരുന്നു മടങ്ങിയത്.
സദാനന്ദ ആശ്രമത്തില് നടക്കുന്ന ചടങ്ങ് ഉദ്ഘാടനം ചെയ്യാനായി തിരുവനന്തപുരത്തുനിന്നും നിലമേല് വഴി സദാനന്ദപുരത്തേക്ക് പോകുകയായിരുന്നു ഗവര്ണര്. യാത്രാമധ്യേയാണ് നിലമേല്വെച്ച് എസ്.എഫ്.ഐക്കാര് കരിങ്കൊടികളുമായി ഗവര്ണറുടെ വാഹനത്തിന് നേരെ പ്രതിഷേധിച്ചത്. ഇതിൽ ക്ഷുഭിതനായ ഗവര്ണര് കാറില് നിന്നിറങ്ങി പ്രതിഷേധക്കാര്ക്കുനേരെ എത്തുകയായിരുന്നു.
