മന്ത്രി പത്നിയെ മുന്നിലിരുത്തി പൊതുവേദിയില് സ്ത്രീവിരുദ്ധ പരാമര്ശവുമായി യോഗ ഗുരു ബാബ രാംദേവ്. പുകഴ്ത്തലുകൾക്ക് ശേഷം, വസ്ത്രം ധരിച്ചില്ലെങ്കിലും സ്ത്രീകള് സുന്ദരികളാണെന്നായിരുന്നു രാംദേവിന്റെ പ്രയോഗം. ഓൺലൈൻ മാധ്യമങ്ങളിൽ ഇത് പരക്കെ പ്രതിധേഷങ്ങൾ ഉയർത്തി.
പതഞ്ജലി യോഗ പീഠവും മുംബൈ മഹിളാ പതഞ്ജലി യോഗ സമിതിയും സംയുക്തമായി വെള്ളിയാഴ്ച താനെയില് സംഘടിപ്പിച്ച യോഗ സയന്സ് ക്യാമ്പിലാണ് പരാമർശം. സ്ത്രീകളുടെ പ്രത്യേകയോഗവും ക്യാമ്പിനൊപ്പം ഉണ്ടായിരുന്നതിനാൽ നിരവധി സ്ത്രീകളും എത്തിയിരുന്നു.
പരിപാടിയില് അതിഥിയായാണ് മഹാരാഷ്ട്ര ഉപമുഖ്യമന്ത്രി ദേവേന്ദ്ര ഫഡ്നാവിസിന്റെ ഭാര്യ അമൃത ഫഡ്നാവിസ് എത്തിയത്. അവരെ മുൻനിർത്തി, “സാരിയില് സ്ത്രീകള് സുന്ദരികളാണ്, അമൃതാജിയെ പോലെ സല്വാറിലും അവര് സുന്ദരികളാണ്. എന്റെ അഭിപ്രായത്തില് ഒന്നും ധരിച്ചിട്ടില്ലെങ്കിലും സ്ത്രീകള് സുന്ദരികളാണ്”, എന്ന് രാംദേവ് കമൻ്റ് ചെയ്തു.
അമൃതയുടെ ആരോഗ്യകരമായ ജീവിതശൈലിയേയും ചെറുപ്പമായിരിക്കാന് ചെലുത്തുന്ന ശ്രദ്ധയേയും പ്രശംസിച്ച് കൊണ്ടായിരുന്നു തുടക്കം. “എപ്പോഴും ചെറുപ്പമായിരിക്കാന് ഇവര് ഏറെ ശ്രദ്ധിക്കുന്നുണ്ട്. ഇനിയൊരു നൂറ് കൊല്ലത്തേക്ക് ഇവര് ഇങ്ങനെ തന്നെ തുടരുമെന്നാണ് എന്റെ വിശ്വാസം. കൃത്യതയോടെയുള്ള ഭക്ഷണം, എല്ലായ്പ്പോഴും സന്തോഷവതിയായിരിക്കാനുള്ള ശ്രമം, ഒരു ശിശുവിന്റെ മുഖത്ത് കാണുന്നതുപോലെയുള്ള പുഞ്ചിരി എപ്പോഴും മുഖത്തുണ്ടായിരിക്കാനുള്ള ശ്രദ്ധ…”, രാംദേവ് പ്രശംസ തുടര്ന്നു. ഇത് സദസിൽ മുറുമുറുപ്പിനും അസ്വസ്ഥതകളും ഉയർത്തി.
