– ആതിര സരാഗ്
കവിത ഒരു പ്രളയമാണ്. മണ്ണും മരവും മനുഷ്യനും ചേർന്ന് ഒഴുകുന്ന സഞ്ചാരപഥം.
ആ പ്രളയം തീർത്ത വഴികളിലൂടെ, അഗാധങ്ങളിൽ പിടയുന്ന പാതിജീവനുമായി സഞ്ചരിക്കുന്ന അന്വേഷികൾക്ക് പറ്റുന്നൊരിടം. അതാണ് കെ ജി സൂരജിന്റെ പ്രളയത്തിന്റെ മാനിഫെസ്റ്റോ എന്ന പുസ്തകം.
പ്രാണനെടുക്കുന്ന വേട്ട ആശയകറ്റുന്നതു കൂടിയാണ്. ജീവിതത്തെ നായാടുന്നവർ അനുഭവിക്കുന്ന വിനോദം കാരുണ്യമില്ലായ്മയുടെ കയ്പ്പാണ്. കൊല്ലപ്പെടുന്ന മുയലും ചക്രങ്ങൾക്കടിയിൽ ചതഞ്ഞരഞ്ഞ നായക്കുട്ടിയും ബാക്കിയാക്കുന്ന അശാന്തത, മരണപ്പെടാതെ തന്നെ മരണപ്പെട്ടവന്റെ കൂടിയാണ്.
ഒട്ടും മെരുങ്ങാത്തൊരു
വേട്ടമൃഗമുണ്ടാകും
ഓരോരുത്തരിലും.
ചിലരതിനെ മറന്നു പോകുന്നു.
(അകം)
പരസ്പരം പേടിക്കുന്ന രാത്രിയും പകലും പോലെ തണലില്ലാത്തവരും കടിഞ്ഞാൺ ഉള്ളവരും തമ്മിൽ നടക്കുന്ന നിശബ്ദ പോരാട്ടം ഉയരാകെ ഉലയ്ക്കുന്നു. പെയ്തടങ്ങുവാൻ കൊതിക്കുന്ന തീത്തുള്ളിയായി മാറുന്നു സൂരജിന്റെ ഓരോ വാക്കും.
അടക്കിപ്പിടിച്ച ഗദ്ഗദങ്ങളെല്ലാം പൊട്ടിത്തെറിച്ച് പല കഷണങ്ങളായതായി തോന്നും അറ, കുടീരങ്ങൾ, പരകായം എന്നീ കവിതകൾ. ആഴങ്ങളിലേക്ക് വീണുപോയ വിലാപങ്ങളെല്ലാം കുപ്പായം അഴിച്ചുവെച്ച് തിരികെ തീരത്തടിയുന്നു. ഒറ്റയായി പലയിടത്ത് കഴിഞ്ഞവയെല്ലാം ഒന്നിച്ച് ഒരു പ്രളയമാകുന്നു.
വിടുതൽ നൽകാതെ പ്രഹരം നൽകുന്ന യാഥാർത്ഥ്യങ്ങളാണ് മധുവല്ല ജീവിതം, കാളബിരിയാണി, രാഷ്ട്രം എന്നീ കവിതകളിൽ തെളിയുന്നത്. ക്രൂരതയുടെ നടമാട്ടം നെഞ്ചിൽ കുത്തിത്തിറക്കുമാറ് വ്യക്തമാണിവിടെ.
മണങ്ങളെല്ലാം വെറും മണങ്ങൾ അല്ല എന്ന് പലയിടത്തും സൂരജ് പറയാതെ പറയുന്നുണ്ട്. ആഴത്തിൽ ഉറഞ്ഞുപോയ ഇലയനക്കങ്ങൾ, മഴവൈകുന്നേരങ്ങൾ, കടൽമണം എന്നിവ ചില സ്നേഹസഞ്ചാരങ്ങളാണ്. മറന്നു പോകാതെ ബാക്കിയായ നന്മകൾ…
മുൻപേ നടക്കുന്നവർ
ഉള്ളിൽനിന്നൊട്ടുമേ
വിട്ടു പോകാത്തവർ.
ഒട്ടിപ്പിടിച്ചവർ.
അവർ, അവരാണു നമ്മൾ.
(സ്വം)
യാഥാർത്ഥ്യങ്ങളിൽ തട്ടി വീഴാതെ ആർക്കും ഈ കവിതകളിലൂടെ കടന്നു പോകാനാകില്ല. അവസാനിക്കാത്ത ആകുലതകളുടെ ഒരു നേർസഞ്ചാരമാണിത്.
മുറിവേറ്റവന് മാത്രം മനസ്സിലാകുന്ന ചിലത് കവിതയിൽ സൂരജ് ഒളിപ്പിച്ചു വച്ചിരിക്കുന്നു. വേട്ടയാടപ്പെട്ട മുയലിൽ നിന്ന് തെറിച്ചു വീണ ചോര, കഴുകി കളയുവാൻ കഷ്ടപ്പെടുന്ന സ്വന്തം വിരലുകളിലേക്ക് നോക്കിയിരിക്കേണ്ടി വരും നിങ്ങൾക്ക് കുറച്ചുനേരം.
പറഞ്ഞു തീരാത്ത എന്തെല്ലാമോ ഉണ്ടല്ലോ ഇതിൽ എന്ന തോന്നൽ ബാക്കി വെച്ചാണ് ഓരോ കവിതയും നാം വായിച്ചവസാനിപ്പിക്കുക. ഇനിയും ഒരുപാട് പറയുവാൻ, കവി വീണ്ടും അക്ഷരങ്ങളിലേക്ക് ഓടിയടുക്കട്ടെ. അതുവരെ നീറാനുള്ളത് ഈ പുസ്തകത്തിലുണ്ട്.
പ്രളയത്തിന്റെ മാനിഫെസ്റ്റോ
– കെ ജി സൂരജ്
ഡി സി ബുക്സ്
വില : 130 രൂപ
