തലവേദന കുട്ടികളില് സാധാരണമായി കണ്ടുവരുന്ന അസുഖമാണ്. കുട്ടികളുടെ ശാരീരികവും മാനസികവുമായ പ്രവര്ത്തനങ്ങളെ ബാധിക്കാന് ശേഷിയുള്ള ഒരു വില്ലനാണിത്. കുട്ടികള്ക്കുണ്ടാകുന്ന ആവർത്തിച്ചു വരുന്ന തലവേദനയെ നിസാരമെന്ന് കരുതി തള്ളരുത്. പഠനത്തെ പോലും ഇത് ബാധിക്കും.
കുട്ടികളുടെ തലവേദനയുടെ കാരണങ്ങള് പലതാണ്. കാഴ്ച വൈകല്യവും മൈഗ്രേനും ഒക്കെ കാരണങ്ങളാകാം. പലവിധ സമ്മർദ്ദങ്ങളും കുട്ടികൾ നേരിടാം. തുടര്ച്ചയായി ഇടവിട്ട സമയങ്ങളില് ഉണ്ടാവുന്ന തലവേദനയാണ് മൈഗ്രേന്. വയറുവേദന, ഛര്ദി തുടങ്ങിയവയാണ് രോഗ ലക്ഷണങ്ങള്.
സാധാരണയായി ഉറക്കം കൊണ്ട് തലവേദനക്ക് ശമനം ഉണ്ടാവുന്നു. കുടുംബ പാരമ്പര്യം ഈ തലവേദനക്ക് പ്രധാന കാരണമാണ്.10 വയസിനു മുകളിലുള്ള ആണ്കുട്ടികളെ അപേക്ഷിച്ച് പെണ്കുട്ടികളിലാണ് മൈഗ്രേന് കൂടുതലായി കണ്ടുവരുന്നത്. ഏഴിനും പതിനഞ്ചു വയസിനുമിടയിലുള്ള നാല് ശതമാനം കുട്ടികളിലും മൈഗ്രേന് ഉണ്ടെന്നാണ് പഠനങ്ങള് പറയുന്നത്.
ചില ഭക്ഷണപദാര്ഥങ്ങള് കുട്ടികളില് മൈഗ്രേയ്ന് വര്ദ്ധിപ്പിക്കുന്നു. ചോക്ലേറ്റ്, ശീതള പാനീയങ്ങള്, ധാരാളം മസാലയടങ്ങിയ ഭക്ഷണങ്ങള്, മത്സ്യ മാംസാദികള്, നട്സ് തുടങ്ങിയവയാണ് ഇവയില് ചിലത്. ഇന്ന് ടിവി, മൊബൈല്, കമ്പ്യൂട്ടര് തുടങ്ങിയവ കുട്ടികളുടെയിടയില് വലിയ സ്വാധീനം ചെലുത്തുന്നു. ഇവയും കുട്ടികളിലെ തലവേദന വര്ദ്ധിപ്പിക്കുന്നു.
കണ്ണിന്റെ തകരാറുകള് തലവേദനക്ക് മറ്റൊരു കാരണമാണ്. കാഴ്ചക്കുറവ്, ഹ്രസ്വദൃഷ്ടി, ദീര്ഘദൃഷ്ടി, കോങ്കണ്ണ് ഇവയെല്ലാം തലവേദനയുണ്ടാക്കുന്നു. ചെറിയ തോതിലുള്ള കോങ്കണ്ണ് പലപ്പോഴും മാതാപിതാക്കള് ശ്രദ്ധിക്കാറില്ല. ഇത്തരം അവസ്ഥയില് കുട്ടി കാണുന്നതിന് ഒരു കണ്ണുമാത്രം ഉപയോഗിക്കുന്നു.
തലവേദന സംബന്ധിച്ച് ആവർത്തിച്ച് പരാതി പറയുമ്പോൾ എല്ലാ സാധ്യകളും പരിശോധിക്കണം. പലപ്പോഴും ചെറിയ കാഴ്ച പ്രശ്നങ്ങളും ശ്രദ്ധയിൽ പെടാതെ പോവുകയാണ് പതിവ്. ഇത് ഒഴിവാക്കണം. കുട്ടിയുടെ പരാതിയെ ഗൌരവതരമായി എടുക്കണം. കാരണങ്ങൾ അന്വേഷിക്കണം.
കുട്ടികളില് തലവേദനയുടെ ലക്ഷണങ്ങള് കാണുന്ന പക്ഷം ഒരു വിദഗ്ദ്ധ ഡോക്ടറെ കാണിച്ച് ചികിത്സ നേടണം. ശീരീരിക പ്രശ്നങ്ങ ഏതെന്ന് കണ്ടെത്തണം. പഠന സമ്മർദ്ദം, അമിതമായ മൊബൈൽ കമ്പ്യൂട്ടർ ഉപയോഗം ഇവയെല്ലാം പരിഗണിച്ച് രോഗ പരിശോധന നടത്തിക്കണം.
