മഹാത്മാ ഗാന്ധി സര്വകലാശാലയില് രേഖാ രാജിനെ അസിസ്റ്റന്റ് പ്രൊഫസര് ആയി നിയമിച്ചത് റദ്ദാക്കിയ ഹൈക്കോടതി വിധി സുപ്രീംകോടതി ശരിവച്ചു.
മഹാത്മാ ഗാന്ധി സര്വകലാശാലയിലെ ഗാന്ധിയന് സ്റ്റഡീസില് അസിസ്റ്റന്റ് പ്രൊഫസര് തസ്തികയിലേക്കുള്ള രേഖാ രാജിന്റെ നിയമനം റദ്ദാക്കിയ ഹൈക്കോടതി റാങ്ക് പട്ടികയില് രണ്ടാമെത്തിയ നിഷ വേലപ്പന് നായര്ക്ക് ഉടന് നിയമനം നല്കണമെന്ന് ഉത്തരവ് ഇറക്കിയിരുന്നു. ഇത് ശരിവെച്ചാണ് ഉത്തരവ്.
മഹാത്മാ ഗാന്ധി സര്വകലാശാലയ്ക്ക് എതിരെ നിയമന രീതി മുൻനിർത്തി രൂക്ഷ വിമര്ശനവും ഉയർത്തിയാണ് സുപ്രീംകോടതി വിധി പ്രസ്താവിച്ചത്. നിയമന രീതി ശുദ്ധ അസംബന്ധമാണെന്നും അംഗീകരിക്കാനാകില്ലെന്നും കോടതി വ്യക്തമാക്കി.
ഇതുവരെ കോടതിയില് ചോദ്യം ചെയ്യപ്പെടാത്ത മറ്റ് നിയമനങ്ങള്ക്ക് ഈ വിധി ബാധകമായിരിക്കില്ലെന്നും സുപ്രീംകോടതി വ്യക്തമാക്കി.
ഇതിനെതിരെ മഹാത്മാ ഗാന്ധി സര്വകലാശാലയും ദളിത് സ്ത്രീ ചിന്തകയുമായ രേഖ രാജുമാണ് സുപ്രീംകോടതിയെ സമീപിച്ചത്. ഈ ഹര്ജികളിലെ വാദം അംഗീകരിക്കാന് കഴിയില്ലെന്ന് സുപ്രീംകോടതി വ്യക്തമാക്കി.
രേഖാ രാജിനും നിഷ വേലപ്പന് നായര്ക്കും പിഎച്ച്ഡി ഉണ്ടായിട്ടും ഒരാള്ക്ക് മാത്രം എന്തുകൊണ്ട് നിയമനത്തിന് പിഎച്ച്ഡി യുടെ മാര്ക്ക് കണക്കാക്കിയെന്ന് കോടതി ആരാഞ്ഞു. നെറ്റ് ആണ് അടിസ്ഥാന യോഗ്യതയെന്നും നെറ്റ് ഇല്ലാത്തതിനാലാണ് നിഷ വേലപ്പന് നായര്ക്ക് പിഎച്ച്ഡിയുടെ മാര്ക്ക് കണക്കാക്കാത്തതെന്നും സര്വകലാശാലയുടെ അഭിഭാഷക സാക്ഷി കക്കര് കോടതിയില് ചൂണ്ടിക്കാട്ടി. എന്നാല് ഇത് അംഗീകരിക്കാന് കഴിയില്ലെന്ന് ജസ്റ്റിസുമാരായ സഞ്ജീവ് ഖന്ന, ജെ.കെ മഹേശ്വരി എന്നിവര് അടങ്ങിയ ബെഞ്ച് ചൂണ്ടിക്കാട്ടി.
നിയമന വ്യവസ്ഥകളില് ഇളവ് അനുവദിക്കാന് സര്വകലാശാലയ്ക്ക് അധികാരം ഉണ്ടെന്ന് ചട്ടങ്ങളില് വ്യവസ്ഥ ചെയ്തിട്ടുണ്ടെന്നും അഭിഭാഷക കോടതിയില് ചൂണ്ടിക്കാട്ടിയെങ്കിലും കോടതി അംഗീകരിച്ചില്ല.
യുജിസി അംഗീകരിക്കാത്ത ജേര്ണലിലില് പ്രസിദ്ധീകരിച്ച രേഖ രാജിന്റെ ലേഖനങ്ങള്ക്ക് ഇന്റര്വ്യൂ ബോര്ഡ് മാര്ക്ക് നല്കിയതിനെയും കോടതി വിമര്ശിച്ചു. യുജിസി അംഗീകരിച്ച ജേര്ണലുകളില് ലേഖനങ്ങള് പ്രസിദ്ധീകരിക്കാന് പലരും ലക്ഷങ്ങളാണ് വാങ്ങുന്നതെന്നും ഇത് വലിയ അഴിമതിയാണെന്നും രേഖ രാജിന്റെ അഭിഭാഷകന് പി. വി. ദിനേശ് വാദിച്ചു. കോടതി ഇക്കാര്യം പരിഗണിച്ചില്ല.
