ദുബായിലെ ഏറ്റവും വലിയ ഹിന്ദു ക്ഷേത്രം ഇന്ന് ഭക്തര്ക്ക് സമര്പ്പിക്കും. വിവിധ മതങ്ങളുടെ ആരാധനാ കേന്ദ്രങ്ങള് സ്ഥിതി ചെയ്യുന്ന ദുബായിലെ ജബല് അലിയില് സിഖ് ഗുരുദ്വാരയുടെയും ക്രിസ്ത്യന് പള്ളികളുടെയും സമീപമാണ് പുതിയ ക്ഷേത്രം ഒരുക്കിയിരിക്കുന്നത്.
സ്വാമി അയ്യപ്പന്, ഗുരുവായൂരപ്പന് തുടങ്ങി പതിനാറ് പ്രതിഷ്ഠകളാണ് ക്ഷേത്രത്തില് ഉളളത്. സാധാരണ ദിവസങ്ങളില് രാവിലെ 6 മുതല് രാത്രി 8.30വരെയാണ് ദര്ശന സമയം. സിഖ് മത വിശ്വാസികളുടെ വിശുദ്ധ ഗ്രന്ഥമായ ഗുരുഗ്രന്ഥ് സാഹിബും പ്രത്യേക പ്രതിഷ്ഠയായി ക്ഷേത്രത്തിലുണ്ട്.
ക്യൂ ആർ കോഡ് സംവിധാനം വഴിയാണ് പ്രവേശനനാനുമതി ലഭിക്കുക. 1200 പേരെ ഉൾക്കൊള്ളാനുള്ള വിശാലതയുള്ളതാണ് മുഖ്യ മേഖല.
ഇന്ന് വൈകിട്ട് യുഎഇ മന്ത്രി ഷെയ്ഖ് നഹ്യാന് ബിന് മുബാറക് അല് നഹ്യാനും ഇന്ത്യന് സ്ഥാനപതി സഞ്ജയ് സുധീറും ഉള്പ്പെടെയുള്ളവരുടെ സാന്നിധ്യത്തില് ക്ഷേത്ര നട ഔദ്യോഗികമായി തുറക്കും. ക്ഷേത്രത്തിൽ പ്രവേശിക്കാന് ഉത്തരേന്ത്യൻ ആചാര രീതിയിൽ തലയില് തുണി ധരിക്കണമെന്ന നിബന്ധനയുണ്ട്. മറ്റു സ്ഥലങ്ങളില് പ്രത്യേക വേഷ നിബന്ധനകളില്ല. അബൂദബിയില് രണ്ടാമത്തെ ക്ഷേത്രത്തിന്റെ നിര്മാണവും പുരോഗമിക്കയാണ്.
