പോപ്പുലര് ഫ്രണ്ട് ആഹ്വാനം ചെയ്ത ഹര്ത്താലില് പൊതുമുതല് നശിപ്പിച്ച കേസിൽ അകപ്പെട്ടവരിൽ നിന്നും നഷ്ടം ഈടാക്കുന്നതിൻ്റെ ഭാഗമായി പിഎഫ്ഐ പ്രവര്ത്തകരുടെ സ്വത്ത് വകകള് ജപ്തി ചെയ്യുന്ന നടപടിയില് പ്രതികരണവുമായി നടന് ജോയ് മാത്യു.
പി.എഫ്.ഐ മാത്രമല്ല കേരളത്തില് ഹര്ത്താലും ബന്ദും നടത്തി പൊതുമുതല് നശിപ്പിച്ചത്. വേറെയും രാഷ്ട്രീയ പാര്ട്ടികളുണ്ടെന്ന് ജോയ് മാത്യു ഫേസ് ബുക്കിൽ കുറിച്ചു. അതിൻ്റെയൊക്കെ നേതാക്കന്മാരുടെ സ്വത്തുക്കളും കണ്ടുകെട്ടിയാല് തീരാവുന്ന കടമേ ഇപ്പോൾ കേരളത്തിനുള്ളൂവെന്നും അദ്ദേഹത്തിൻ്റെ പോസ്റ്റ് വാർത്തയായി.
ജോയ് മാത്യുവിൻ്റെ കുറിപ്പ്
പോപ്പുലര് ഫ്രണ്ട് മാത്രമല്ല കേരളത്തില് ഹര്ത്താലും ബന്ദും നടത്തി പൊതുമുതല് നശിപ്പിച്ചത്. അതിനും മുന്പേ ഇതൊക്കെ ചെയ്തുകൂട്ടിയ വേറെയും രാഷ്ട്രീയ പാര്ട്ടികളുണ്ട്. അതിന്റെയൊക്കെ നേതാക്കന്മാരുടെ സ്വത്തുക്കള് കണ്ടുകെട്ടിയാല് തീര്ക്കാവുന്ന കടമേ ഇപ്പോള് കേരളത്തിനുള്ളൂ- ബഹുമാനപ്പെട്ട ഹൈക്കോടതി ഇക്കാര്യം ശ്രദ്ധിക്കാനപേക്ഷ.
ഹര്ത്താല്, ബന്ദ് തുടങ്ങിയ കിരാതപ്രവൃത്തികള്ക്ക് ഇരയായി കൊല്ലപ്പെടുകയോ അംഗഭംഗം നേരിടുകയോ ചെയ്യേണ്ടിവന്ന അസംഖ്യം സാധാരണക്കാരുണ്ട്.
അവര്ക്ക് ന്യായമായ നഷ്ടപരിഹാരത്തിന് ഈ ഹൈക്കോടതി വിധി ഒരു സഹായമാകും. അഭിഭാഷകര് തയ്യാറാവുക,’
