ഇടുക്കി അടിമാലിയിൽ ബൈക്കില് സഞ്ചരിക്കുന്നതിനിടെ ചക്രത്തിൽ ഷാള് കുരുങ്ങിയുണ്ടായ അപകടത്തില് വീട്ടമ്മ മരിച്ചു. ചിത്തിരപുരം മീന്കെട്ട് സ്വദേശിനി മെറ്റില്ഡയാണ് മരിച്ചത്. ഞായറാഴ്ച ഉച്ചയ്ക്ക് മീന്കെട്ട് കെ എസ് ഇ ബി സര്ക്കിള് ഓഫീസിലേക്ക് പോകുന്ന റോഡിലാണ് അപകടം.
മകനൊപ്പം ബൈക്കില് സഞ്ചരിക്കവെയാണ് അപകടം ഉണ്ടായത്. കുരുങ്ങി വീണ മെറ്റില്ഡയെ അടിമാലിയിലെ ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. രണ്ടാംമൈലിന് സമീപം മീന്കെട്ട് ജംഗ്ഷനില് ബസിറങ്ങിയതായിരുന്നു. വീട്ടിലേക്കുള്ള വഴിയിൽ മകനൊപ്പം ബൈക്കില് കയറി. ഷാൾ പിന്നിലെ ചക്രത്തിൽ കുരുങ്ങി വീണു. തലയടിച്ച് വീണാണ് അപകടം ഉണ്ടായതെന്നാണ് പ്രദേശവാസികള് നല്കുന്ന വിവരം.
ബൈക്കിൽ കയറുമ്പോൾ യാത്ര തുടങ്ങും മുൻപേ വസ്ത്രങ്ങൾ ഒതുക്കുക
ബൈക്കിൽ സാരിയും ഷാളും കുരുങ്ങിയുണ്ടാവുന്ന അപകടങ്ങൾ വർധിക്കയാണ്. പലപ്പോഴും കുഞ്ഞുങളുമായി പോകുന്നവർ വരെ ഇത്തരത്തിൽ വസ്ത്രം കരുങ്ങാനുള്ള സാധ്യത തിരക്കിൽ ശ്രദ്ധിക്കാറില്ല. പിൻ ചക്രത്തിൽ വസ്ത്രം കുരുങ്ങിയാൽ കഴുത്തിൽ ശരീരത്തിൽ മുറുകിയും തലയടിച്ച് വീണും അപകടം പതിവാണ്. നേരത്തെ കുടയുമായി ബൈക്കിൽ കയറിയുണ്ടാവുന്ന അപകടങ്ങൾ ആവർത്തിച്ചിരുന്നു. ഇത് ശ്രദ്ധിക്കാൻ തുടങ്ങിയതോടെ കുറഞ്ഞു. പക്ഷെ അയഞ്ഞ വസ്ത്രങ്ങൾ കുരുങ്ങാനുള്ള സാധ്യത പലപ്പോഴും പരിഗണിക്കാതെ പോകുന്നത് അപകടം വരുത്തുന്നു.
