ലൈഫ് മിഷന് കോഴക്കേസില് മുഖ്യമന്ത്രിയുടെ അഡീഷണല് പ്രൈവറ്റ് സെക്രട്ടറി സി.എം. രവീന്ദ്രന് എന്ഫോഴ്സ്മെന്റ് ഡയറക്ടറേറ്റ്(ഇ.ഡി.)ന്റെ നോട്ടീസ്. ഫെബ്രുവരി 27-ന് രാവിലെ പത്തുമണിക്ക് കൊച്ചിയിലെ ഇ.ഡി. ഓഫീസില് ഹാജരാകാനാണ് നിര്ദേശം.
ലൈഫ് മിഷന് കേസുമായി ബന്ധപ്പെട്ട് മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം. ശിവശങ്കറിനെ ഇ.ഡി. ചോദ്യം ചെയ്തുകൊണ്ടിരിക്കുകയാണ്. കസ്റ്റഡി കാലാവധി അവസാനിക്കുന്ന പശ്ചാത്തലത്തില് വെള്ളിയാഴ്ച അദ്ദേഹത്തെ വീണ്ടും കോടതിയില് ഹാജരാക്കും. ഈ ചോദ്യംചെയ്യലിന്റെ അനുബന്ധ നടപടിയെന്നോണമാണ് മുഖ്യമന്ത്രിയുടെ ഓഫീസിലേക്കു കൂടി ഇ.ഡി. അന്വേഷണം വ്യാപിപ്പിക്കുന്നത്.
ശിവശങ്കറിന്റെ ചോദ്യം ചെയ്യലുമായി ബന്ധപ്പെട്ട് ഇ.ഡി. കോടതിയില് സമര്പ്പിച്ച കസ്റ്റഡി അപേക്ഷയില് സ്വപ്ന സുരേഷും സി.എം. രവീന്ദ്രനും തമ്മിലുള്ള വാട്ട്സാപ്പ് സന്ദേശത്തിന്റെ പകര്പ്പും ഉള്പ്പെടുത്തിയിരുന്നു.അതിനാല്ത്തന്നെ രവീന്ദ്രനും സ്വപ്നയും തമ്മില് അടുപ്പമുണ്ടായിരുന്നോ എന്നും ലൈഫ് മിഷന് അടക്കമുള്ള വിഷയങ്ങളിലെ ചര്ച്ചകളില് ശിവശങ്കറിനെ കൂടാതെ രവീന്ദ്രനും പങ്കാളിത്തം ഉണ്ടായിരുന്നോ എന്നുമുള്ള അന്വേഷണത്തിലേക്കാണ് ഇ.ഡി. കടക്കുന്നത്.
ഇത് രണ്ടാം തവണയാണ് ചോദ്യംചെയ്യലിന് രവീന്ദ്രനെ ഇ.ഡി. വിളിപ്പിക്കുന്നത്. 2020 ഡിസംബറില് സ്വര്ണക്കടത്തുമായി ബന്ധപ്പെട്ട കള്ളപ്പണക്കേസില് 13 മണിക്കൂറോളം ഇദ്ദേഹത്തെ ഇ.ഡി. ചോദ്യം ചെയ്തിരുന്നു.
സി എം രവീന്ദ്രൻ
കോഴിക്കോട് ജില്ലയിലെ പാര്ട്ടി കോട്ടയായ ഒഞ്ചിയം സ്വദേശിയായ സി എം രവീന്ദ്രന് സാധാരണ പാര്ട്ടി പ്രവര്ത്തകനായാണ് പ്രവര്ത്തനം ആരംഭിക്കുന്നത്. പിന്നീട് രവീന്ദ്രന് പാര്ട്ടിയുടെ വിശ്വസ്തനാവുകയും പ്രവര്ത്തന മണ്ഡലം തിരുവനന്തപുരത്തേക്ക് മാറുകയുമായിരുന്നു. എല്ഡിഎഫ് കണ്വീനറായ പി വി കുഞ്ഞിക്കണ്ണന്റെ സഹായിയായാണ് 1980 കളില് രവീന്ദ്രന് തലസ്ഥാനത്ത് എത്തുന്നത്. പിന്നീടിങ്ങോട്ട് നാല്പത് വര്ഷത്തോളമായി വിവിധ സിപിഎം നേതാക്കളുടെ പഴ്സണല് സ്റ്റാഫ് അംഗമായിരുന്നു സി എം രവീന്ദ്രന്.
സിപിഎം നേതാക്കളുടെ പഴ്സണല് സ്റ്റാഫില് ഏറ്റവുമധികം കാലം ജോലി ചെയ്തിട്ടുള്ള വ്യക്തികളിൽ ഒരാളാണ്. വി എസ് അച്യുതാനന്ദനൊപ്പവും കോടിയേരി ബാലകൃഷ്ണനൊപ്പവും പിണറായി വിജയനൊപ്പവും വിശ്വസ്തനായി രവീന്ദ്രന് പ്രവര്ത്തിച്ചിട്ടുണ്ട്. മുഖ്യമന്ത്രിയുടെ പഴ്സണല് സ്റ്റാഫില് കെഎസ്ആര് പാര്ട്ട് 3 ചട്ടം 100 അനുസരിച്ച് പുനര് നിയമനം ലഭിച്ച ജീവനക്കാരിലൊരാള് കൂടിയാണ് സി എം രവീന്ദ്രന്. പ്രതിപക്ഷ നേതാവിന്റെ അഡീഷണല് പ്രൈവറ്റ് സെക്രട്ടറി പദവിയില് നിന്നാണ് സി എം രവീന്ദ്രന് പുനര് നിയമനം ലഭിച്ചത്.
