മുസ്ലിം ലീഗിൽ പച്ച കെടാതെ ഹരിത. കഴിഞ്ഞ ദിവസം നടന്ന ഹരിത പക്ഷയോഗത്തിൽ യൂത്ത് ലീഗ് ദേശീയ വൈസ് പ്രസിഡന്റ് പാണക്കാട് സയ്യിദ് മുഈനലി ശിഹാബ് തങ്ങളുടെ സജീവ പങ്കാളിത്തം. മുസ്ലിംലീഗ് സംസ്ഥാന സെക്രട്ടറി സ്ഥാനത്തുനിന്ന് സസ്പെന്ഡ് ചെയ്യപ്പെട്ട കെ.എസ്. ഹംസയുടെ നേതൃത്വത്തിലുള്ള വിമത യോഗത്തിലാണ് മുഈനലി തങ്ങള് പങ്കെടുത്തത്. ഹൈദരലി ശിഹാബ് തങ്ങള് ഫൗണ്ടേഷന് എന്ന പേരില് കോഴിക്കോട് കെ.പി. കേശവമേനോന് ഹാളിലാണ് യോഗം ചേർന്നത്.
ലീഗില് നടപടി നേരിട്ടവരും അസംതൃപ്തരായി തുടരുന്നവരുമായ എണ്പതോളം പേരാണ് യോഗത്തില് പങ്കെടുത്തത്.ഹൈദരലി തങ്ങളുടെ മകന് കൂടിയായ മുഈനലി തങ്ങള്ക്കു പുറമേ മുസ്ലിംലീഗ് പ്രവര്ത്തക സമിതി അംഗം, ജില്ലാ ഭാരവാഹികള്, ഹരിത വിഷയത്തില് നടപടി നേരിട്ട എം.എസ്.എഫ്. നേതാക്കളും പങ്കെടുത്തു. ദുബായ് കെ.എം.സി.സി നേതാവ് ഇബ്രാഹിം എളറ്റില് ഉള്പ്പെടെയുള്ള നേതാക്കളുടെ പിന്തുണയും ഉണ്ടായി.
കഴിഞ്ഞ ജൂലായില് കൊച്ചിയില് നടന്ന മുസ്ലിംലീഗ് പ്രവര്ത്തക സമിതി യോഗത്തില് പി.കെ. കുഞ്ഞാലിക്കുട്ടിക്കെതിരേ വിമര്ശനം നടത്തിയതിന് നടപടി നേരിട്ടയാളാണ് കെ.എസ്. ഹംസ. പാര്ട്ടി സ്ഥാനങ്ങളില്നിന്ന് ഇദ്ദേഹത്തെ നീക്കിയതായി പാണക്കാട് സയ്യിദ് സാദിഖലി ശിഹാബ് തങ്ങള് നേരത്തെ അറിയിച്ചിരുന്നു. ചന്ദ്രികയിലെ അഴിമതിക്കെതിരെയും പി.കെ. കുഞ്ഞാലിക്കുട്ടിക്കെതിരെയുമായ വിഷയങ്ങളില് നേതൃത്വത്തിനെതിരേ നിലപാട് എടുത്തിരുന്നു.
ചാരിറ്റി പ്രവര്ത്തനങ്ങളും വിദ്യാഭ്യാസ പ്രവര്ത്തനങ്ങളും നടത്താനാണ് പാണക്കാട് ഹൈദരലി ശിഹാബ് തങ്ങള് സ്മാരക ഫൗണ്ടേഷന് രൂപീകരിക്കുന്നത് എന്നാണ് ഔദ്യോഗിക വിശദീകരണം. എന്നാല് വിമത നേതാക്കളുടെ പ്ലാറ്റ്ഫോം എന്ന നിലയിലാണ് പുതിയ സംഘടന വിലയിരുത്തപ്പെടുന്നത്.
കുഞ്ഞാലിക്കുട്ടിയുടെ തലയിൽ ഡെമോക്ലീസിന്റെ വാളുണ്ടല്ലോ എന്ന കെ പി സി സി പ്രസിഡൻ്റ് കെ സുധാകരൻ്റെ കമൻ്റ് കഴിഞ്ഞ ദിവസം വിവാദമായിരുന്നു.
