വിമാനത്തിനുള്ളില് മുഖ്യമന്ത്രിക്കെതിരെ പ്രതിഷേധിച്ച യൂത്ത് കോണ്ഗ്രസ് നേതാവ് ഫര്സീന് മജീദിനെതിരെ കാപ്പ ചുമത്താന് പോലീസ് തീരുമാനം. കാപ്പ ചുമത്തുന്നതുമായി ബന്ധപ്പെട്ട നോട്ടീസ് ഫര്സീന് നല്കി. മുഖ്യമന്ത്രിയെ വധിക്കാന് ശ്രമിച്ചുവെന്നത് അടക്കമുള്ള കേസുകളെ മറയാക്കിയാണ് മാരക നിയമം പ്രയോഗിക്കുന്നത്.
ഫര്സീന് മജീദിനെ ജില്ലയില് തുടരാന് അനുവദിക്കുന്നത് ക്രമസമാധാന പ്രശ്നങ്ങളുണ്ടാക്കുന്നുവെന്നാണ് റിപ്പോര്ട്ടില് പറയുന്നത്. ഇതോടെ നാടുകടത്തൽ നടപടിയാവും ഉണ്ടാവുക.
കാപ്പ ചുമത്താന് പോലീസ് കണ്ണൂര് ജില്ലാ കളക്ടറുടെ അനുമതി തേടിയിരിക്കയാണ്. ഡിഐജി തലത്തില് നിന്നാണ് കളക്ടറുടെ അനുമതി തേടിയുള്ള അപേക്ഷ പോയിട്ടുള്ളത്. ഫര്സീന് മജീദിനെതിരായ കേസുകളുടെ എണ്ണവും കേസുകളുടെ സ്വഭാവവും ഒന്നിച്ച് പരിഗണിച്ചു. ഇവ നേരത്തെ തയാറാക്കിയ ശേഷം കേസിൻ്റെ അടിസ്ഥാനത്തിൽ കണ്ണൂര് ജില്ലയില്നിന്ന് നാടുകടത്തണമെന്നാണ് പോലീസ് നിർദ്ദേശം ഉണ്ടായിരിക്കുന്നത്.
ശുപാര്ശ കളക്ടര് അംഗീകരിക്കുകയും അതിനുള്ള അന്തിമ അംഗീകാരം നല്കുന്ന സമിതിക്ക് അയക്കുകയും വേണം. ഇതിനിടയില് ഫര്സീന് തന്റെ വാദങ്ങള് പറയാനുള്ള അവസരമുണ്ടാകും. ഫര്സീന് നേരിട്ടോ അദ്ദേഹത്തിന്റെ അഭിഭാഷകനോ ഈ സമിതിക്ക് മുന്നില് എത്തണം. കാപ്പ ചുമത്തുന്നതുമായി ബന്ധപ്പെട്ട നോട്ടീസ് ഫര്സീന് നല്കി
മട്ടന്നൂര് പോലീസാണ് കേസുമായി ബന്ധപ്പെട്ട റിപ്പോര്ട്ട് തയ്യാറാക്കിയത്. 2018 മുതല് ഫര്സീന് എതിരെ രജിസ്റ്റര് ചെയ്ത കേസുകളുടെ വിശദാംശങ്ങള് ഉള്പ്പെടുത്തിയാണ് റിപ്പോര്ട്ട്.
