സംഘടിത ആക്രമണങ്ങൾ അതിജീവിച്ച് ഗംഭീര തിരിച്ചുവരവ് അറിയിച്ച ഷാരൂഖ് ഖാന് വിശ്രുത എഴുത്തുകാരൻ്റെ പ്രശംസ. പഠാന് ബോക്സ്ഓഫിസ് തകര്ത്ത് പ്രയാണം തുടരുന്നതിനിടെ ഷാരൂഖ് ഖാനെ പ്രകീര്ത്തിച്ച് എഴുത്തുകാരന് പൗലോ കൊയ്ലോയാണ് ട്രെൻഡിങ് ട്വിറ്റ് ഇട്ടത്.
ഷാരൂഖ് ഖാനെ ബോളിവുഡ് വിശേഷിപ്പിക്കുന്ന കിംഗ് എന്ന പേര് ആവര്ത്തിച്ചാണ് ട്വിറ്ററിലൂടെ പൗലോ കൊയ്ലോയുടെ പ്രശംസ. ഷാരൂഖ് രാജാവും ഇതിഹാസവും സുഹൃത്തുമാണെന്നാണ് ട്വീറ്റ്. അതിലെല്ലാമുപരി ഷാരൂഖ് ഗംഭീര നടനുമാണെന്ന് പൗലോ കൊയ്ലോ പറഞ്ഞു.
ഷാരൂഖിനെ അറിയാത്ത പാശ്ചാത്യരാജ്യങ്ങളിലുള്ളവര്ക്ക് താന് മൈ നെയിം ഈസ് ഖാന്- ഐ ആം നോട്ട് എ ടെററ്സിറ്റ് എന്ന സിനിമ നിര്ദേശിക്കുന്നുവെന്നും പൗലോ കൊയ്ലോ പറഞ്ഞു. ഷാരൂഖിനെ കാണുന്നതിനായി മുംബൈയിലുള്ള അദ്ദേഹത്തിന്റെ വസതിയ്ക്ക് മുന്നില് തടിച്ചുകൂടിയിരിക്കുന്ന ആരാധകരുടെ കൂട്ടത്തെ താരം അഭിവാദ്യം ചെയ്യുന്ന വിഡിയോയും പൗലോ കൊയ്ലോ പങ്കുവച്ചിട്ടുണ്ട്.
മതേതര ജീവിതം നയിക്കുന്ന നടന് എതിരെ ഹിന്ദുത്വ തീവ്രവാദ സംഘടനകളുടെ ആക്രമണവും വേട്ടയാടലും തുടരുന്നതിനിടെയാണ് നടന് പ്രശംസ. എഴുത്തുകാരന്റെ ട്വീറ്റിന് 40.2K ലൈക്കുകളാണ് ലഭിച്ചിട്ടുള്ളത്.
പൗലോ കൊയ്ലോയുടെ ട്വീറ്റ് എസ്ആര്കെ ആരാധകര് ആഘോഷമാക്കിയതിന് പിന്നാലെ ഷാരൂഖ് പൗലോ കൊയ്ലോയ്ക്ക് ട്വീറ്റിലൂടെ മറുപടിയും നല്കി. നിങ്ങള് എപ്പോഴും വളരെ ദയാലുവാണ് സുഹൃത്തേ എന്ന് ഷാരൂഖ് നന്ദി പ്രകടിപ്പിച്ചു. നമ്മുക്ക് ഉടനെ തന്നെ നേരിൽ കാണാമെന്ന് ആഗ്രഹിക്കുന്നതായും താരം പൗലോ കൊയ്ലോയുടെ വാക്കുകള് റീട്വീറ്റ് ചെയ്തുകൊണ്ട് പറഞ്ഞു.
