ബസ്സിൽ യാത്ര ചെയ്യുന്നതിനിടെ തല വൈദ്യുതിത്തൂണിലിടിച്ച് വിദ്യാര്ഥി മരിച്ചു. മന്നിപ്പാടി ഗണേഷ് നഗര് ഹൗസിങ് കോളനിയിലെ ജി.സുനില്കുമാറിന്റെയും പ്രജിതയുടെയും മകന് മന്വിത് (15) ആണ് മരിച്ചത്. ബുധനാഴ്ച വൈകിട്ട് സ്കൂള്വിട്ട് വീട്ടിലേക്കുള്ള മടക്കയാത്രയിലാണ് അപകടം.
കാസർക്കോട് ജില്ലയിലെ ചെമ്മനാട് ജമാഅത്ത് ഹയര്സെക്കന്ഡറി സ്കൂളിലെ പത്താംക്ലാസ് വിദ്യാര്ഥിയാണ്. വിദ്യാര്ഥി കയറിയ സ്വകാര്യ ബസ് ദേശീയപാതയിലെ കറന്തക്കാട്ടുനിന്ന് മധൂരിലേക്കുള്ള റോഡില് കയറി ബട്ടംപാറയിലെ തിയേറ്ററിന് സമീപത്തെത്തിയപ്പോഴാണ് അപകടം. ബസിൻ്റെ അകത്ത് ജനലിന് സമീപം നിന്ന് യാത്രചെയ്യുകയായിരുന്ന വിദ്യാര്ഥിയുടെ തല റോഡരികിലെ പോസ്റ്റില് ഇടിക്കുകയായിരുന്നു.
ഗുരുതരമായി പരിക്കേറ്റ കുട്ടിയെ ഉടന് കാസര്കോട്ടെ സ്വകാര്യ ആസ്പത്രിയില് എത്തിച്ചെങ്കിലും രക്ഷിക്കാനായില്ല. വൈകിട്ടായതിനാല് ബസ് നിറയെ ആളുകളുണ്ടായിരുന്നു. സഹോദരന്: അന്സിത്.
