കോട്ടയം അമൽ ജ്യോതി എഞ്ചിനീയറിങ് കോളേജിൽ ശ്രദ്ധയെന്ന വിദ്യാർത്ഥിനി ജീവനൊടുക്കിയ കേസിൻ്റെ പശ്ചാത്തലത്തിൽ സ്വാശ്രയ കോളേജുകളിൽ വിദ്യാർത്ഥി പരാതി പരിഹാര സെൽ രൂപീകരിക്കുമെന്ന് മന്ത്രി ബിന്ദു. സെല്ലിൽ നിന്ന് നീതി ലഭിച്ചില്ലെങ്കിൽ സർവകലാശാലയിൽ മോണിറ്ററിങ് സമിതിയെ സമീപിക്കാൻ അവസരമുണ്ടാകും. ഇക്കാര്യം ഉടൻ സർവകലാശാല നിയമത്തിന്റെ ഭാഗമാക്കുമെന്നും മന്ത്രി പറഞ്ഞു.

കോളിജിൽ വിവിധ തരത്തിലുള്ള അവഹേളനങ്ങൾക്ക് വിദ്യാർഥികൾ വിധേയമാവുന്നു. മാനേജ്മെൻ്റുകളുടെ യാഥാസ്ഥിതിക മനോഭാവങ്ങൾ അടിച്ചേൽപ്പിക്കുന്ന സാഹചര്യവുമാണ് തുടരുന്നത്. അച്ചടക്കത്തിൻ്റെ പേരിൽ മതാത്മക മൂല്യങ്ങൾ വൈകൃതത്തോടെ കുട്ടികൾക്ക് മേൽ പ്രയോഗിക്കാൻ തുനിയുന്ന സാഹചര്യമാണ്. ഇക്കാര്യം വിദ്യർഥികൾ തന്നെ പരാതിപ്പെട്ടിട്ടും ഫലം ഉണ്ടായില്ല. ഈ അനാസ്ഥയുടെ അവസാന ഇരയായി തീരുകയാണ് ശ്രദ്ധ എന്ന പെൺകുട്ടി. അമൽ ജ്യോതി കോളിജിലെ തന്നെ വിദ്യാഥിനികൾ ഇക്കാര്യം തുറന്ന് പറഞ്ഞിരുന്നു. ഇതോടെയാണ് സർക്കാരിനും നിലപാട് എടുക്കേണ്ടി വന്നത്.

വിദ്യാർഥി യൂണിയൻ പ്രതിനിധിയും അംഗമാവും

തിരുവനന്തപുരത്ത് വാർത്താസമ്മേളനം വിളിച്ചുചേർത്താണ് സംസ്ഥാന ഉന്നത വിദ്യാഭ്യാസ മന്ത്രി പ്രഖ്യാപനം നടത്തിയത്. കോളേജുകളിൽ പ്രിൻസിപ്പാളായിരിക്കും സെൽ മേധാവി. സർവകലാശാലകളിൽ വകുപ്പ് മേധാവി അധ്യക്ഷനാകും. പരാതി പരിഹാര സെല്ലിൽ ഒരു വനിതയുണ്ടാകും. വിദ്യാർത്ഥി യൂണിയൻ പ്രതിനിധികളും സെല്ലിൽ ഉണ്ടാകും. ഏഴ് അംഗങ്ങളായിരിക്കും പരാതി പരിഹാര സെല്ലിൽ ഉണ്ടാവുകയെന്നും മന്ത്രി വ്യക്തമാക്കി. 

എസ് സി എസ് ടി / ഭിന്നശേഷി പ്രാതിനിധ്യം വിദ്യാർത്ഥി യൂണിയൻ തെരഞ്ഞെടുപ്പിൽ ഉറപ്പാക്കുമെന്നും മന്ത്രി പറഞ്ഞു. വിദ്യാർത്ഥികളുടെ പരാതികളിൽ നടപടി എടുത്തില്ലെങ്കിൽ കോളേജിന്റെ അംഗീകാരം റദ്ദാക്കുന്നതടക്കം നടപടി സ്വീകരിക്കും. അല്ലെങ്കിൽ പുതിയ കോഴ്സുകൾ അനുവദിക്കില്ലെന്നും മന്ത്രി പറഞ്ഞു. സംസ്ഥാനത്തെ ഉന്നത വിദ്യാഭ്യാസ രംഗത്ത് വരുന്ന വലിയ മാറ്റങ്ങൾക്ക് വേണ്ടി പുതിയ നിയമങ്ങൾ അടുത്ത നിയമസഭാ സമ്മേളനത്തിൽ പരിഗണനയ്ക്ക് വെക്കും. എന്നാൽ പുതിയ സാഹചര്യത്തിൽ പെട്ടെന്ന് പാസാക്കേണ്ടതിനാലാണ് ഇക്കാര്യം ഉത്തരവായി ഇറക്കിയതെന്നും ഇത് സംബന്ധിച്ച നിയമ നിർമ്മാണം അടുത്ത നിയമസഭാ സമ്മേളനത്തിൽ നടക്കുമെന്നും മന്ത്രി ബിന്ദു പറഞ്ഞു. 

 യൂത്ത് കോണ്‍ഗ്രസ് സംസ്ഥാന അധ്യക്ഷ സ്ഥാനത്തേക്ക് പോര് മുറുന്നു. ആരെ മത്സരിപ്പിക്കണമെന്ന കാര്യത്തില്‍ എ ഗ്രൂപ്പിനുള്ളില്‍ തന്നെ വ്യത്യസ്ത ചർച്ചകൾ ഉയർന്നു. രാഹുല്‍ മാങ്കൂട്ടത്തിലിനെ മത്സരിപ്പിക്കണമെന്ന് ആവശ്യപ്പെട്ട് ഒരു വിഭാഗവും ജെ.എസ്. അഖിലിനെ മത്സരിപ്പിക്കണമെന്ന് മറുവിഭാഗവും ആവശ്യത്തിലാണ്. കഴിഞ്ഞ ദിവസം ചേര്‍ന്ന എ ഗ്രൂപ്പ് യോഗം തര്‍ക്കത്തെ തുടര്‍ന്ന് തീരുമാനമാവാതെ പിരിഞ്ഞിരുന്നു.

യൂത്ത് കോണ്‍ഗ്രസ് സംസ്ഥാന അധ്യക്ഷന്‍ ഷാഫി പറമ്പിലാണ് രാഹുല്‍ മാങ്കൂട്ടത്തിലിന് വേണ്ടി വാദിച്ചത്. സ്ഥാനം ഒഴിയുന്ന യൂത്ത് കോണ്‍ഗ്രസ് സംസ്ഥാന അധ്യക്ഷന്‍ എന്ന നിലയില്‍ തന്റെ താല്‍പര്യം കൂടി പരിഗണിക്കണം എന്നതായിരുന്നു ഷാഫിയുടെ ആവശ്യം.കാലങ്ങളായി ഗ്രൂപ്പിനൊപ്പം നില്‍ക്കുന്ന അഖിലിനെ പിന്തുണയ്ക്കണമെന്ന നിലപാടാണ് എ ഗ്രൂപ്പ് നേതാക്കളായ ബെന്നി ബെഹനാനും കെ. ബാബുവും സ്വീകരിച്ചത്.

കാലങ്ങളായി ഗ്രൂപ്പിനൊപ്പം നില്‍ക്കുന്ന ആളിനെ തഴഞ്ഞ് അടുത്ത കാലത്ത് മാത്രം എ ഗ്രൂപ്പിനൊപ്പം കൂടിയ ആളിനെ മത്സരിപ്പിക്കാന്‍ തീരുമാനിച്ചാല്‍ അധ്യക്ഷസ്ഥാനത്തേക്ക് വിജയം ഉറപ്പിക്കാനാകില്ലെന്നാണ് ഒരു വിഭാഗം വാദിച്ചത്. അഖിലിന് പകരം കെ.എസ്.യു. മുന്‍ അധ്യക്ഷന്‍ അഭിജിത്തിനെ യൂത്ത് കോണ്‍ഗ്രസ് അധ്യക്ഷസ്ഥാനത്തേക്ക് മത്സരിപ്പിക്കാമെന്ന ഉപാധി വന്നെങ്കിലും മത്സരിക്കാന്‍ താത്പര്യമില്ലെന്ന നിലപാടാണ് അഭിജിത് സ്വീകരിച്ചത്. കെ.എസ്.യു. അധ്യക്ഷസ്ഥാനത്തേക്ക് അഭിജിത്തിന് വേണ്ടി അഖില്‍ നേരത്തെ പിന്മാറിയിരുന്നു.

നിലപാടില്‍ ഇരുപക്ഷവും വിട്ടുവീഴ്ചയ്ക് തയാറായില്ല. യൂത്ത് കോണ്‍ഗ്രസ് അധ്യക്ഷ സ്ഥാനത്തേക്ക് നാമനിര്‍ദേശം സമര്‍പ്പിക്കുന്നതിനുള്ള അവസാന തീയത് ഈ മാസം 14 ആണ്.

ചാനല്‍ ചര്‍ച്ചകളിലും സാമൂഹിക മാധ്യമങ്ങളിലും സജീവമായി ഇടപെടുന്നതാണ് രാഹുല്‍ മാങ്കൂട്ടത്തിലിനെ ഉയര്‍ത്തിക്കാട്ടാന്‍ ഉന്നയിച്ച വാദം. കെ.എസ്.യു. പ്രസിഡന്റ് സ്ഥാനം, എന്‍.എസ്.യു. പ്രസിഡന്റ് സ്ഥാനം എന്നിവ നല്‍കാതെ ഒഴിവാക്കിയിട്ടും ഗ്രൂപ്പ് വിട്ടുപോകാതെ നില്‍ക്കുന്നതാണ് അഖിലിനെ പിന്തുണച്ചവർ ഉയർത്തിയത്. യൂത്ത് കോൺഗ്രസ് ദേശീയ കോഡിനേറ്ററാണ് അഖിൽ. ബിനു ചള്ളിയിൽ മഞ്ജുക്കുട്ടൻ എന്നിവരുടെ പേരും രംഗത്തുണ്ട്.

ലോക് സഭാ തിരഞ്ഞെടുപ്പിന് മുൻപ് വിവാദം വേണ്ട എന്ന നേതൃത്വത്തിൻ്റെ നിലപാട് ഷാഫി പറമ്പിലിന് തുടർച്ച നൽകുകയും ചെയ്യാം.

എസ്എഫ്‌ഐ സംസ്ഥാന സെക്രട്ടറി പി.എം. ആര്‍ഷോ എഴുതാത്ത പരീക്ഷ ജയിച്ചതായുള്ള വിവാദത്തിന് മരുന്നിട്ടത് പാർട്ടിക്ക് അകത്തെ കേന്ദ്രങ്ങളെന്ന്. ഗുഢാലോചന നടത്തിയെന്ന് ആര്‍ഷോ ആരോപിക്കുന്നുണ്ട്. പാർട്ടി സെക്രട്ടറിയും ഇത് ശരിവെച്ച് അന്വേഷണം ആവശ്യപ്പെട്ടു. എന്നാൽ ഈ അധ്യാപകന്‍ ഇടതുപക്ഷ സംഘടനാ നേതാവാണ് എന്നാണ് തുടർ പ്രസ്താവനകളിൽ വ്യക്തമാവുന്നത്.

ഇക്കാര്യത്തില്‍ വിശദീകരണം പാർച്ചിക്ക് നൽകിയിട്ടുണ്ട്. ഗൂഢാലോചനയ്ക്ക് പിന്നില്‍ പ്രവര്‍ത്തിച്ചവരെ ചൂണ്ടിക്കാട്ടി നേതൃത്വത്തെ വിവരങ്ങള്‍ ധരിപ്പിച്ചിട്ടുണ്ടെന്നും ആർഷോ വ്യക്തമാക്കിയിട്ടുണ്ട്.

ഡിപ്പാര്‍ട്ട്‌മെന്റ് കോര്‍ഡിനേറ്ററായിരുന്ന അധ്യാപകനെതിരെയാണ് ആര്‍ഷോ ആരോപണം ഉന്നയിച്ചിരിക്കുന്നത്. ഈ അധ്യാപകനെതിരെ നല്‍കിയ പരാതികൾ ഉന്നയിച്ചിരുന്നു. ഇതേ തുടര്‍ന്ന് അദ്ദേഹത്തെ ഡിപ്പാര്‍ട്ട്‌മെന്റ് കോര്‍ഡിനേറ്റര്‍ പദവിയില്‍ നിന്ന് നീക്കംചെയ്തിരുന്നു. ഇതൊക്കെ തനിക്കെതിരായ ഗൂഢാലോചനയ്ക്ക് പിന്നിലുണ്ടെന്നാണ് ആര്‍ഷോ പരാതിയിൽ പറഞ്ഞത്.

ആഷോയുമായി ബന്ധപ്പെട്ട് ഉയർന്ന വിവാദം മാര്‍ക്ക് ലിസ്റ്റില്‍ വന്ന സാങ്കേതിക പിഴവാണെന്നാണ് കോളേജ് അധികൃതര്‍ വിശദീകരിച്ചത്. അത് തള്ളിക്കളയുകയാണ് ആര്‍ഷോയും സിപിഎമ്മും.

ഗൂഢാലോചനയ്ക്ക് പിന്നില്‍ പ്രവര്‍ത്തിച്ചതെന്ന് ആര്‍ഷോ ആരോപിക്കുന്ന വ്യക്തി എകെജിസിടിഎ നേതാവാണ്. താന്‍ അധ്യാപകന്റെ രാഷ്ട്രീയം നോക്കിയല്ല പരാതി നല്‍കിയത് എന്ന നിലപാടും പാട്ടിക്ക് മുന്നിൽ വെച്ചിട്ടുണ്ട്. താന്‍ ഉന്നയിച്ച അധ്യാപകനെ ഇടതുപക്ഷ അധ്യാപക സംഘടനകളുടെ പരിപാടികളിൽ കണ്ടിട്ടില്ലെന്ന സംഘടനാ തല വിമർശവും ഉണ്ട്.

സിപിഎം സംസ്ഥാന നേതൃത്വത്തിനെ കാര്യങ്ങള്‍ അറിച്ചിട്ടുണ്ടെങ്കിലും ആരെയാണ് അറിയച്ചിരിക്കുന്നത് എന്ന് വ്യക്തമാാക്കിയിട്ടില്ല. ഔദ്യോഗികമായി പരാതിപ്പെടുകയല്ല ചെയ്തതത് എന്നും ഇതിൽ വ്യക്തമാവുന്നു. ഇതോടെ അധ്യാപകനെ മുൻനിർത്തിയുള്ള ആരോപണത്തിൽ വീണ്ടും വിള്ളൽ വരുന്നുമുണ്ട്.

ആർഷോ പക്ഷത്തെ വിശദീകരണം

ചില മാധ്യമങ്ങൾ തെറ്റായ വാർത്ത നൽകി. പ്രിൻസിപ്പൽ പറഞ്ഞ കാര്യങ്ങളിൽ നിന്നും മലക്കം മറിയുകയാണ്, ഒരു വിദ്യാഭ്യാസ സ്ഥാപനത്തിലും സംഭവിക്കാത്ത തെറ്റാണ് മഹാരാജാസ് കോളേജിലെ പ്രിൻസിപ്പലിൻ്റെ ഭാഗത്തു നിന്നുണ്ടായത് എന്നും ആർഷോ പറഞ്ഞു. 2021 ബാച്ചിനോടൊപ്പം വീണ്ടും പരീക്ഷക്ക് അപ്ലൈ ചെയ്‌തെങ്കിൽ പരീക്ഷ ഫീസ് അടച്ചതിന്റെ റസീപ്റ്റ്, അപ്ലൈ ചെയ്‌തതിന്റെ രേഖ ഹാജരാക്കണമെന്ന്‌ ആർഷോ പ്രിൻസിപ്പലിനോട്‌ ആവശ്യപ്പെട്ടിരുന്നു. ഇതിന്‌ പിന്നാലെയാണ്‌ മാധ്യമങ്ങൾക്ക്‌ നൽകിയ രേഖയിൽ പിഴവുണ്ടായെന്ന്‌ സമ്മതിച്ച്‌ പ്രിൻസിപ്പൽ രംഗത്തെത്തിയത്‌.

കോളേജ് വെബ്സൈറ്റ് പ്രകാരം 2021 ബാച്ചിനൊപ്പം പരീക്ഷ എഴുതിയ 20 ബാച്ചിലെ വിദ്യാർത്ഥികളുടെ ലിസ്റ്റും ആർഷോ ഫെയ്‌സ്‌ബുക്കിലൂടെ പുറത്തുവിട്ടു. ഇതിലും ആർഷോയുടെ പേരില്ല.

സംസ്ഥാനത്തെ സ്കൂളുകളുടെ പ്രവൃത്തി ദിവസം 210 ൽ നിന്ന് 205 ആയി കുറയ്ക്കും. ഭരണാനുകൂല സംഘടനയായ കെഎസ്ടിഎ അടക്കം ഇതിനെതിരെ നടത്തിയ സമ്മർദ്ദത്തിന് വഴങ്ങിയാണ് തീരുമാനം. മധ്യവേനലവധി ഏപ്രിൽ ആറ് മുതലെന്ന പ്രഖ്യാപനത്തിലും മാറ്റം വരുത്തി. നിലവിലെ മാർച്ച് 31 ന് തന്നെയായിരിക്കും ഇനിയും മധ്യവേനലവധി. ഇത്തവണത്തെ പ്രവേശനോത്സവ പരിപാടി മലയിൻകീഴ് സ്കൂളിൽ നടക്കുമ്പോൾ അധ്യക്ഷ പ്രസംഗത്തിലാണ് പൊതുവിദ്യാഭ്യാസ വകുപ്പ് മന്ത്രി പുതിയ തീരുമാനങ്ങൾ പ്രഖ്യാപിച്ചത്. വിഷയത്തിൽ ഇന്ന് മന്ത്രിയുടെ അധ്യക്ഷതയിൽ അധ്യാപക സംഘടനകളുടെ യോഗം ചേർന്നിരുന്നു.

തീരുമാനം

2023-24 അക്കാദമിക വർഷത്തെ അധ്യയന ദിനങ്ങൾ 205 ആയി  നിജപ്പെടുത്തി. പൊതുവിദ്യാഭ്യാസവും തൊഴിലും വകുപ്പ് മന്ത്രി വി. ശിവൻകുട്ടിയുടെ അദ്ധ്യക്ഷതയിൽ ചേർന്ന ക്യു.ഐ.പി. അധ്യാപക സംഘടനകളുടെ യോഗത്തിലാണ് തീരുമാനം. ഏപ്രിൽ 01 മുതൽ 05 വരെയുള്ള തീയതികൾ വേനൽക്കാല അവധി ദിവസങ്ങളായി തുടരും. വേനലവധി ദിവസങ്ങൾക്ക് മാറ്റമില്ല.

അദ്ധ്യയന വർഷത്തിലെ ആകെയുള്ള 52 ശനിയാഴ്ചകളിൽ 13 ശനിയാഴ്ചകൾ മാത്രമാണ് പ്രവൃത്തി ദിനമായി നിശ്ചയിച്ചിട്ടുള്ളത്. നിലവിലെ നിയമങ്ങളും കോടതി വിധികളും ഒരാഴ്ചയിൽ 5 പ്രവൃത്തി ദിനങ്ങൾ വേണം എന്ന് നിർദ്ദേശിച്ചിട്ടുള്ള പശ്ചാത്തലത്തിലാണ് ആഴ്ചയിൽ 5 ദിവസം അധ്യയന ദിനങ്ങൾ ലഭിക്കാത്ത ആഴ്ചകളിൽ ശനിയാഴ്ച പഠന ദിവസമാക്കിയിട്ടുള്ളത്.

2022-23 അക്കാദമിക വർഷത്തിൽ 198 അധ്യയന ദിനങ്ങളാണ് വിദ്യാഭ്യാസ കലണ്ടറിൽ ഉണ്ടായിരുന്നത്. അതിനോടൊപ്പം 4 ശനിയാഴ്ചകൾ കൂടി അധ്യയന ദിനങ്ങളാക്കി 202 അധ്യയന ദിനങ്ങൾ ആണ് 2022-23 അക്കാദമിക വർഷത്തിലുണ്ടായിരുന്നത്. 2023-24 അക്കാദമിക വർഷത്തിൽ 192 അധ്യയന ദിനങ്ങളും 13 ശനിയാഴ്ചകളും ചേർന്ന് 205 അധ്യയന ദിനങ്ങൾ ആണ് ഉണ്ടാകുക. യോഗത്തിൽ പൊതുവിദ്യാഭ്യാസ പ്രിൻസിപ്പൽ സെക്രട്ടറി റാണി ജോർജ്ജ് ഐ.എ.എസ്., പൊതുവിദ്യാഭ്യാസ ഡയറക്ടർ എസ്. ഷാനവാസ് ഐ.എ.എസ്. തുടങ്ങിയവരും പൊതുവിദ്യാഭ്യാസ വകുപ്പിലെ ഉന്നത ഉദ്യോഗസ്ഥരും സന്നിഹിതരായിരുന്നു.