ജോലിക്കു പകരം ഭൂമി അഴിമതിക്കേസില്‍ ബിഹാര്‍ ഉപമുഖ്യമന്ത്രിയും ആര്‍.ജെ.ഡി. നേതാവുമായി തേജസ്വി യാദവിനെ ചോദ്യം ചെയ്യാൻ സി ബി ഐ വീണ്ടും നൊട്ടീസ നൽകി. മാര്‍ച്ച് നാലിന് വിളിച്ചിരുന്നെങ്കിലും തേജസ്വി ഹാജരായിരുന്നില്ല. ഇതേത്തുടര്‍ന്നാണ് ശനിയാഴ്ച വീണ്ടും വിളിപ്പിച്ചത്. രാവിലെയെത്താനാണ് നിര്‍ദേശം നല്‍കിയിരുന്നത്.

തേജസ്വി യാദവ് ഇതുവരെ ഹാജരായിട്ടില്ല. ഭാര്യയുടെ പ്രസവത്തിനായി ആശുപത്രിയിലാണ് എന്നാണ് അറിയിച്ചിട്ടുള്ളത്. ഗർഭിണിയായ ഭാര്യയെ 12 മണിക്കൂറോളം ഇ ഡി ചോദ്യം ചെയ്തത് അവരെ അവശയാക്കി എന്ന ആരോപണം ഉയർന്നിരുന്നു.

കഴിഞ്ഞ ദിവസം തേജസ്വി യാദവിന്റെ ഡല്‍ഹിയിലെ ന്യൂ ഫ്രണ്ട്‌സ് കോളനിയിലെ വസതിയിലും സുഹൃത്തുക്കളുടെയും ബന്ധുക്കളുടെയും പാർപ്പിടങ്ങളിൽ പരിശോധന നടത്തിയിരുന്നു. 24 ഇടങ്ങളില്‍ എന്‍ഫോഴ്‌സ്‌മെന്റ് ഡയറക്ടറേറ്റ് (ഇ.ഡി.) പരിശോധിച്ചു.

യു.എസ്. ഡോളര്‍ ഉള്‍പ്പെടെയുള്ള വിദേശ കറന്‍സികളും 53 ലക്ഷം രൂപയും അരക്കിലോ സ്വര്‍ണക്കട്ടിയും ഒന്നരക്കിലോ സ്വര്‍ണാഭരണങ്ങളും ലാലുപ്രസാദ് യാദവ് കുടുംബത്തില്‍നിന്ന് പിടിച്ചെടുത്തു എന്നാണ് വാർത്ത. മറ്റു പ്രധാനപ്പെട്ട രേഖകളും ഉപകരണങ്ങളും പരിശോധന നടത്തിയ വീടുകളില്‍നിന്ന് കണ്ടെടുത്തതായും ഇ.ഡി. വ്യക്തമാക്കി.

ലാലുപ്രസാദിന്റെ മക്കളായ തേജസ്വി, രാഗിണി, ചാന്ത, ഹേമ എന്നിവരുടെ വീടുകളിലാണ് പരിശോധന നടന്നത്. മകള്‍ രാഗിണിയുടെ ഭര്‍ത്താവും എസ്.പി. നേതാവുമായ ജിതേന്ദ്ര യാദവിന്റെ വീട്ടിലും ആര്‍.ജെ.ഡി. മുന്‍ എം.എല്‍.എ.യും ലാലുവിന്റെ ഉറ്റസുഹൃത്തുമായ അബു ദോജനയുടെ വീട്ടിലും ഇ.ഡി. പരിശോധന നടത്തി. സംഭവത്തില്‍ ലാലുപ്രസാദ് യാദവ്, ഭാര്യ റാബ്‌റി ദേവി എന്നിവര്‍ക്കെതിരെയും കേസുണ്ട്.

ജോലിക്കു പകരം ഭൂമി അഴിമതിയുമായി ബന്ധപ്പെട്ടുള്ള സി.ബി.ഐ. അന്വേഷണത്തിന്റെ തുടര്‍ച്ചയായാണ് ഇ.ഡി.യുടെ പരിശോധന. പിതാവ് ലാലുപ്രസാദ് യാദവ് റെയില്‍വേ മന്ത്രിയായിരുന്നപ്പോള്‍ യാദവ് കുടുംബത്തിന് സമ്മാനമായോ കുറഞ്ഞ വിലക്കോ ഭൂമി നല്‍കിയിരുന്നവര്‍ക്ക് റെയില്‍വേയില്‍ ജോലി നല്‍കിയിരുന്നു. ഈ കേസിലാണ് സി.ബി.ഐ. അന്വേഷണവും ഇ.ഡി.യുടെ പരിശോധനയും .

കേന്ദ്രസാഹിത്യഅക്കാദമി പ്രസിഡണ്ടായി മാധവ് കൗശിക് തിരഞ്ഞെടുക്കപ്പെട്ടു.അക്കാദമി നേതൃത്വം പിടിക്കാന്‍ ഇത്തവണ സംഘപരിവാർ പാനല്‍ പ്രഖ്യാപിച്ച് രംഗത്ത് വന്നതോടു കൂടിയാണ് തിരഞ്ഞെടുപ്പിലേക്ക് നീങ്ങിയത്. ചണ്ഡീഗഡിൽ നിന്നുള്ള എഴുത്തുകാരനായ മാധവ് കൗശിക് അക്കാദമിയുടെ വൈസ് പ്രസിഡണ്ടായിരുന്നു.

ബി.ജെ.പി പിന്തുണയുള്ള പാനലിലെ കന്നട എഴുത്തുകാരന്‍ പ്രൊഫ. മല്ലേപുരം ജി. വെങ്കടേഷ്, സ്വതന്ത്ര സ്ഥാനാര്‍ഥി മഹാരാഷ്ട്രയിലെ എഴുത്തുകാരനായ രംഗനാഥ് പഠാരെ എന്നിവരെ തോല്‍പിച്ചാണ് മാധവ് കൗശിക് കേന്ദ്രസാഹിത്യഅക്കാദമി അധ്യക്ഷസ്ഥാനത്തേക്ക് തിരഞ്ഞെടുക്കപ്പെട്ടത്.

92 അംഗങ്ങൾ വോട്ട് രേഖപ്പെടുത്തിയതിൽ 60 പേരുടെ പിന്തുണയോടെയാണ് മാധവ് കൗശിക് വിജയിച്ചത്. തിൽ പത്തുപേർ കേന്ദ്ര സർക്കാർ നോമിനികളാണ്. മലയാളികളായ കെ.പി രാമനുണ്ണി, വിജയലക്ഷ്മി എന്നിവർക്കും വോട്ടവകാശമുണ്ട്.

എന്നാൽ വൈസ് പ്രസിഡൻ്റ് സ്ഥാനത്തേക്ക്അ ക്കാദമി വിശിഷ്ടാംഗമായ സി.രാധാകൃഷ്ണന്‍ മത്സരിച്ചിരുന്നുവെങ്കിലും പരാജയപ്പെട്ടു. സംഘപരിവാർ പാനലിലെ കുമദ് ശര്‍മയാണ് തിരഞ്ഞെടുക്കപ്പെട്ടത്. ഡല്‍ഹി സര്‍വകലാശാലയിലെ ഹിന്ദി വിഭാഗം മേധാവിയാണ് കുമുദ് ശര്‍മ.

സംഘപരിവാർ നീക്കം ആസൂത്രിതം വൈസ് പ്രസിഡൻ്റ് സ്ഥാനം പിടിച്ചു

മാധവ് കൗശികിനെ പ്രസിഡന്റും എഴുത്തുകാരൻ സി. രാധാകൃഷ്ണനെ വൈസ് പ്രസിഡന്റുമാക്കാൻ നേരത്തെ ധാരണയായിരുന്നു. എന്നാൽ, സംഘ്പരിവാർ അനുകൂലികളുടെ പാനൽ അപ്രതീക്ഷിതമായി മത്സരം പ്രഖ്യാപിച്ചതോടെയാണ് തെരഞ്ഞെടുപ്പിലേക്ക് നീണ്ടത്.

സാധാരണയായി ധാരണ പ്രകാരമാണ് പ്രസിഡൻ്റ് വൈസ് പ്രസിഡൻ്റ് പദവികൾ നിശ്ചയിക്കപ്പെടാറ്. ഇത്തവണ സംഘപരിവാർ പാനൽ രംഗത്ത് വന്നതും ഇതേ ലക്ഷ്യം വെച്ചാണ്. വൈസ് പ്രസഡൻ്റ് സ്ഥാനം കൈക്കലാക്കുന്നതിലൂടെ അടുത്ത തവണത്തേക്കുള്ള നീക്കം കൂടിയായാണ് കാണുന്നത്.

സ്വപ്ന സുരേഷിന കണ്ടിരുന്നതായി സമ്മതിച്ച് വിജേഷ് പിള്ള. ബെംഗളൂരുവിൽ വെച്ചാണ് സ്വപ്നയുമായി കണ്ടതെന്നും സമ്മതിച്ചു. എൻഫോഴ്സ്മെന്റ് ഡയറക്ടറേറ്റ് വിജേഷ് പിള്ളയെ ചോദ്യംചെയ്തു. വ്യാഴാഴ്ച അർദ്ധ രാത്രി വരെ ഇ ഡിയുടെ ചോദ്യം ചെയ്യലിന് വിധേയമായി.

വിശദീകരണം ഇങ്ങനെ

ബിസിനസ് ആവശ്യത്തിനാണ് സ്വപ്നയുമായി കൂടിക്കാഴ്ച നടത്തിയത്. സ്വർണ്ണക്കടത്ത് കേസിൽ ഒത്തുതീർപ്പിന് ശ്രമിക്കുകയോ ഭീഷണിപ്പെടുത്തുകയോ ചെയ്തിട്ടില്ല. ഒരേ നാട്ടുകാരാണെങ്കിലും സി.പി.എം സംസ്ഥാന സെക്രട്ടറി എം.വി. ഗോവിന്ദനെ ടി.വിയിൽ മാത്രമാണ് കണ്ടിട്ടുള്ളതെന്നും വിജേഷ് പിള്ള പറഞ്ഞു.

‘ഒ.ടി.ടി. പ്ലാറ്റ്ഫോമിലെ വെബ് സീരിസിന്റെ കാര്യം ചർച്ച ചെയ്യാൻ വേണ്ടിയാണ് ബെംഗളൂരുവിൽ പോയത്. ഞങ്ങളുടെ ഹോട്ടലിൽ സ്വപ്ന വന്നു. അവിടെ വെച്ചായിരുന്നു കൂടിക്കാഴ്ച നടത്തിയത്. എന്നാൽ, ഇപ്പോൾ ഉന്നയിച്ചിരിക്കുന്ന കാര്യങ്ങളിൽ യാതൊരു വാസ്തവവുമില്ല, ആരോപണങ്ങളെല്ലാം തെറ്റായ കാര്യങ്ങളാണ്. പാർട്ടിയുമായിട്ട് യാതൊരു ബന്ധവുമില്ല, ഈ പറയുന്ന ആരേയും അറിയില്ല. പത്രത്തിലും മാധ്യമങ്ങളിലും കണ്ട പരിചയമല്ലാതെ അവർക്ക് എന്നെയോ എനിക്ക് അവരെയോ അറിയില്ല. ബിസിനസ് ബന്ധപ്പെട്ട കാര്യത്തിനായിരുന്നു ബെംഗളൂരുവിൽ ചെന്നത്. വെബ് സീരിസുമായി ബന്ധപ്പെട്ട ചർച്ചകൾ മാത്രമായിരുന്നു. രണ്ട് ദിവസം മുമ്പായിരുന്നു സ്വപ്നയുമായി കൂടിക്കാഴ്ച നടത്തിയത്. ഇ.ഡിയുടെ അടുത്ത് എനിക്ക് അറിയാവുന്ന എല്ലാ കാര്യങ്ങളും പറഞ്ഞിട്ടുണ്ട്. വെബ് സീരിസുമായി ബന്ധപ്പെട്ട കൂടിക്കാഴ്ചയിലെ ചിത്രങ്ങളാണ് സ്വപ്ന പുറത്തുവിട്ടത്’ വിജേഷ് പിള്ള പറഞ്ഞു.

സ്വപ്ന സുരേഷ് പറഞ്ഞത്

കഴിഞ്ഞ ദിവസം വൈകിട്ടായിരുന്നു സ്വർണക്കടത്തു കേസിൽ ഒത്തു തീർപ്പിനായി വിജയ് പിള്ള എന്നയാൾ സി.പി.എം. നേതാക്കൾക്കുവേണ്ടി തന്നെ സമീപിച്ചു എന്ന ആരോപണവുമായി സ്വപ്ന സുരേഷ് ഫേസ്ബുക്ക് ലൈവിൽ വന്നത്. ബെംഗളൂരുവിൽ വെച്ചായിരുന്നു കൂടിക്കാഴ്ചയെന്നും 30 കോടി രൂപ തനിക്ക് വാഗ്ദാനം ചെയ്തുവെന്നും സ്വപ്ന ഫേസ്ബുക്ക് ലൈവിൽ ആരോപിച്ചിരുന്നു. ആരോപണവുമായി ബന്ധപ്പെട്ട് കൂടിക്കാഴ്ചയുടെ ചിത്രങ്ങളും പുറത്തുവിട്ടിരുന്നു. വിജയ് പിള്ള എന്നായിരുന്നു സ്വപ്ന സുരേഷ് പറഞ്ഞതെങ്കിലും ഇയാളുടെ യഥാർഥ പേര് വിജേഷ് പിള്ള എന്നാണെന്ന് പിന്നീട് വ്യക്തമായിരുന്നു.

നെറ്റിയില്‍ സിന്ദൂരമണിയാത്തതിന് കടയിലെ ജീവനക്കാരിയെ അധിക്ഷേപിച്ച് ബി.ജെ.പി. എം.പി.യുടെ നടപടി വിവാദത്തിൽ. വനിതാദിനത്തില്‍ തെന്നെ കര്‍ണാടകയിലെ കോലാര്‍ ജില്ലയിലെ ചന്നയ്യ മന്ദിരത്തിലാണ് സംഭവം. ഇവിടത്തെ മാർക്കറ്റ് ഉദ്ഘാടനം ചെയ്തശേഷം കടയിൽ കയറിയാണ് ബി.ജെ.പി. എം.പി. മുനിസ്വാമിയുടെ അധിക്ഷേപം.

യുവതി ഭയന്ന് മാറി എങ്കിലും സംഭവത്തിന്റെ വീഡിയോ സാമൂഹിക മാധ്യമങ്ങളില്‍ പ്രചരിച്ചു.

‘നിങ്ങളുടെ ഭര്‍ത്താവ് ഇപ്പോഴും ജീവിച്ചിരിക്കുന്നുണ്ടെങ്കില്‍ നെറ്റിയില്‍ സിന്ദൂരം ധരിക്കണം’ എന്ന് മുനിസ്വാമി ആക്രോശിക്കുന്ന വീഡിയോയില്‍ പുറത്ത് വന്നതോടെ എംപിയുടെ ഉത്തരം മുട്ടി. കര്‍ണാടകയിലെ കോലാറില്‍ നിന്നുള്ള എം.പിയാണ് എസ്. മുനിസ്വാമി.

‘നിങ്ങളെന്തുകൊണ്ടാണ് നെറ്റിയില്‍ സിന്ദൂരം ധരിക്കാത്ത്? ആരാണ് നിങ്ങളെ ഇവിടെ കട നടത്താന്‍ അനുവദിച്ചത്? എന്തുകൊണ്ടാണ് ഇവിടെ വൈഷ്ണവി എന്ന പേരില്‍ ബോര്‍ഡ് സ്ഥാപിച്ചിരിക്കുന്നത്? സുജാതയെന്ന പേരില്‍, നിങ്ങള്‍ക്ക് ഒരാള്‍ കാശുതരുന്നു എന്നതുകൊണ്ട്‌, സിന്ദൂരം ധരിക്കാതിരിക്കാന്‍ പാടില്ല. ആദ്യം സിന്ദൂരം അണിയൂ. ആരെങ്കിലും ഇവര്‍ക്ക് സിന്ദൂരം കൊടുക്കൂ. നിങ്ങളുടെ ഭര്‍ത്താവ് ഇപ്പോഴും ജീവിച്ചിരിപ്പില്ലേ? നിങ്ങള്‍ക്ക് സാമാന്യബോധം ഇല്ലേ?’, എന്നാണ് എം.പി. കടയിലെ ജീവനക്കാരിയോട് ഫത്വ പുറപ്പെടുവിക്കുന്നത്.

എന്നാൽ കട നടത്തി ഉപജീവനം കഴിക്കുന്ന യുവതി ചിരിച്ചു കൊണ്ടാണ് എം പിയുടെ സദാചാര പൊലീസിങ്ങ് നേരിടുന്നത്. അതേ സമയം എം പി ക്ഷുഭിതനായി ആക്രോശിച്ച് നടന്ന് നീങ്ങുന്നു.

എം.പിയുടെ പെരുമാറ്റത്തിനെതിരെ കടുത്ത വിമര്‍ശനവുമായി കോണ്‍ഗ്രസ് നേതാവ് കാര്‍ത്തി ചിദംബരം രംഗത്തെത്തി. സദാചാര പോലീസ് ചമയുകയാണ് ബി.ജെ.പി. നേതാക്കൾ. ‘ഇന്ത്യയെ ബി.ജെ.പി. ഹിന്ദുത്വ ഇറാന്‍ ആക്കിമാറ്റും. ബി.ജെ.പിയുടെ ആയത്തുള്ളമാര്‍ സാദാചാര പോലീസിങ് തെരുവില്‍ നടപ്പാക്കും’, കാര്‍ത്തി ചിദംബരം ട്വീറ്റ് ചെയ്തു.