ന്യൂസ് അവർ ചർച്ചയിലെ പരാമർശത്തിൻ്റെ പേരിൽ എളമരം കരീം നൽകിയ പരാതിയിൽ ഏഷ്യാനെറ്റ് ന്യൂസ് അസോസിയേറ്റ് എഡിറ്റർ വിനു വി ജോൺ പൊലീസിന് മൊഴി നൽകി. തിരുവനന്തപുരം കൻ്റോൺമെൻ്റ പൊലീസ് സ്റ്റേഷനിലാണ് വിനു വി ജോൺ മൊഴി നൽകാനെത്തിയത്. അസാധാരണ നിബന്ധകൾ ഉൾപ്പെടുത്തിയാണ് ചോദ്യം ചെയ്യല്ലിന് ഹാജരാകാനുള്ള നോട്ടീസ് പൊലീസ് വിനുവിന് നൽകിയത്. എളമരം കരീമിൻ്റെ പരാതിയിൽ വിനു വി ജോണിനെതിരെ കേസെടുത്ത കാര്യം പോലും ഒരു വർഷത്തോളമായി പൊലീസ് രഹസ്യമാക്കി വച്ചിരിക്കുകയായിരുന്നു.   

കഴിഞ്ഞ വർഷം മാർച്ച് 28-ന് ട്രേഡ് യൂണിയനുകൾ നടത്തിയ 48 മണിക്കൂർ പണിമുടക്കിലെ അക്രമസംഭവങ്ങൾ ചർച്ച ചെയ്ത ന്യൂസ് അവറിലെ പരാമർശത്തിൻ്റെ പേരിലാണ് വിനുവിനെതിരെ പൊലീസ് കേസെടുത്തിരിക്കുന്നത്. പണിമുടക്ക് നടന്ന രണ്ട് ദിവസവും സംസ്ഥാനത്തിൻ്റെ പല ഭാഗത്തും സാധാരണക്കാർ അക്രമിക്കപ്പെട്ടിരുന്നു. കുടുംബവുമായി ഓട്ടോയിൽ സഞ്ചരിച്ചവരും രോഗിയുമായി ആശുപത്രിയിലേക്ക് പോയ ഓട്ടോറിക്ഷാ ഡ്രൈവറും ജോലിക്ക് പോയ ആളുകളും സമരാനുകൂലികളാൽ അക്രമിക്കപ്പെട്ടു. വിഷയം വലിയ വാർത്തയാവുകയും ട്രേഡ് യൂണിയനുകൾക്കെതിരെ ജനരോഷം ഉയരുകയും ചെയ്തപ്പോൾ നുള്ളിയതും പിച്ചിയതും മാന്തിയതും പരാതിയാക്കുന്നു എന്ന പരിഹാസമാണ് ട്രേഡ് യൂണിയൻ നേതാവായ രാജ്യസഭാ എംപി എളമരം കരീമിൽ നിന്നുണ്ടായത്. 

ഇതിനെതിരെ ന്യൂസ് അവറിൽ വിനു വി ജോൺ നടത്തിയ പരാമർശത്തിൻ്റെ പേരിലാണ് കേസ് ഉണ്ടായത്. എന്നാൽ ഇങ്ങനെയൊരു കേസ് എടുത്ത വിവരം വിനു വി ജോണിനെ പൊലീസ് അറിയിച്ചിരുന്നില്ല. ഇതേക്കുറിച്ച് മാധ്യമങ്ങൾക്കും യാതൊരു വിവരവും ലഭിച്ചില്ല. മാസങ്ങൾക്ക് ശേഷം തൻ്റെ പാസ്പോർട്ട് പുതുക്കാൻ വിനു വി ജോൺ അപേക്ഷ നൽകിയ ഘട്ടത്തിലാണ് കേസുള്ള വിവരം അറിയുന്നത്. ഇതിനു പിന്നാലെ കടുത്ത നിബന്ധനകളോട് കൂടിയ നോട്ടീസ് പൊലീസ് വിനു വി ജോണിന് നൽകി. ഈ സാഹചര്യത്തിലാണ് ഇന്ന് വിനു പൊലീസ് സ്റ്റേഷനിലെത്തി മൊഴി നൽകിയത്.  

ഒരു മാധ്യമപ്രവർത്തകൻ ജനങ്ങളുടെ വേദനയ്ക്കൊപ്പം നിൽക്കേണ്ടതുണ്ടെന്നും, ഭരണഘടന അനുവദിച്ച സഞ്ചാര സ്വാതന്ത്ര്യം ജനങ്ങൾക്ക് നിഷേധിക്കപ്പെടപ്പോൾ ചൂണ്ടിക്കാണിക്കേണ്ട കർത്തവ്യം തനിക്കുണ്ടെന്നും വിനു പൊലീസിന് മൊഴി നൽകിയിട്ടുണ്ട്. തൻ്റെ പരാമർശത്തിൻ്റെ പൂർണ രൂപം അടങ്ങിയ വീഡിയോ ക്ലിപ്പുകളും ഇന്ന് വിനു പൊലീസിന് കൈമാറി. അതേസമയം പൊലീസ് നടപടിക്കെതിരെ വലിയ പ്രതിഷേധമാണ് പൊതുസമൂഹത്തിലും സമൂഹമാധ്യമങ്ങളിലും ഉയരുന്നത്. ബിബിസിയിലെ ആദായ നികുതി വകുപ്പിൻ്റെ റെയ്ഡിനെതിരെ വലിയ വിമർശനം ഉന്നയിച്ച സിപിഎം നേതൃത്വത്തിൽ ഇക്കാര്യത്തിൽ ഇതുവരെ പ്രതികരണത്തിന് തയ്യാറായിട്ടില്ല.

ഹരിയാനയിൽ പശുക്കടത്താരോപിച്ച്‌ രണ്ട്‌ യുവാക്കളെ ചുട്ടുകൊന്ന സംഭവം സംസ്ഥാന പൊലീസ്‌ സേനകളുടെ ഏറ്റുമുട്ടലിലേയ്‌ക്കും വഴിമാറി. കോൺഗ്രസ്‌ ഭരിക്കുന്ന രാജസ്ഥാൻ പൊലീസും ബിജെപി ഭരിക്കുന്ന ഹരിയാന പൊലീസുമാണ്‌ ഏറ്റുമുട്ടുന്നത്‌. കേസിലെ പ്രതി ശ്രീകാന്ത്‌ പണ്ഡിറ്റിന്റെ വീട്ടിൽ രാത്രി പരിശോധനയ്‌ക്കെത്തിയ രാജസ്ഥാൻ  സംഘം പ്രതിയുടെ ഗർഭിണിയായ ഭാര്യയുടെ വയറ്റിൽ ചവിട്ടിയെന്നും കുഞ്ഞ്‌ മരിച്ചുവെന്നും പരാതിപ്പെട്ട് നൽകിയ പരാതിയിൽ 40 രാജസ്ഥാൻ ഉദ്യോഗസ്ഥർക്കെതിരെ നൂഹ്‌ പൊലീസ്‌ ഗുരുതര വകുപ്പുകൾ ചേർത്ത്‌ കേസടെുത്തു.

ഭാര്യയോടും അമ്മയോടും മോശമായി  ഇവർ പെരുമാറിയെന്നും പരാതിയിൽ പറയുന്നു.  മുഖ്യപ്രതിയും ബജ്‌റംഗ്‌ദൾ നേതാവുമായ മോനു മനേസറിന്റെ കൂട്ടാളിയാണ്‌ ശ്രീകാന്ത്‌ പണ്ഡിറ്റ്‌.ഇയാളുടെ മറ്റ്‌ രണ്ട്‌ സഹോദരന്മാരെയും റെയ്‌ഡിൽ അറസ്‌റ്റ്‌ ചെയ്‌തിരുന്നു.

അടിവയറ്റിൽ ചവിട്ടേറ്റ ശ്രീകാന്തിന്റെ ഭാര്യ ആശുപത്രിയിൽ കുഞ്ഞിന്‌ ജന്മം നൽകിയെങ്കിലും മരിച്ചു എന്നാണ്‌ പരാതി. ആയുധങ്ങളുമായി കലാപാന്തരീക്ഷം സൃഷ്‌ടിക്കുക, ഗർഭസ്ഥ ശിശുവിന്റെ മരണം, ഭവനഭേദനം തുടങ്ങിയ വകുപ്പുകൾ ചേർത്താണ്‌ നൂഹ്‌ പൊലീസിന്റെ എഫ്‌ഐആർ. പരാതി ലഭിച്ചപ്പോൾ തന്നെ കേസടെുത്തുവെന്നും ശിശുവിന്റെ മൃതദേഹം പുറത്തെടുത്ത്‌ പരിശോധനയ്‌ക്ക്‌ അയച്ചുവെന്നും നൂഹ്‌ എസ്‌പി വരുൺ സിഗ്ല പറഞ്ഞു.

പ്രതിയുടെ കുടുംബത്തിന്റെ ആരോപണം രാജസ്ഥാൻ ഡിജിപി ഉമേഷ്‌ മിശ്ര തള്ളി. രാജസ്ഥാൻ പൊലീസിനൊപ്പം ഹരിയാന പൊലീസും ഉണ്ടായിരുന്നുവെന്നും ഒരു മനുഷ്യാവകാശ ലംഘനവും പരിശോധനയിൽ നടന്നിട്ടില്ലന്നും അദ്ദേഹം പറഞ്ഞു.

യുവാക്കളെ ചുട്ടെരിച്ച  ഗോ സംരക്ഷണക്കാരുടെ കാർ  ഹരിയാനയിൽ നിന്ന്‌ കണ്ടെത്തിയെന്നും  മിശ്ര വ്യക്തമാക്കി. ഹരിയാന പൊലീസും മോനു മനേസറിന്റെ സംഘവും ചേർന്നാണ്‌ കൊല്ലപ്പെട്ട ജുനൈദ്‌, നസീർ എന്നിവരെ വഴിയിൽ തടഞ്ഞ്‌ തട്ടിക്കൊണ്ട്‌ പോയതെന്നും മർദ്ദിച്ച്‌ കൊന്ന ശേഷം മനേസറും കൂട്ടാളികളും ഇരുവരെയും ഹാരുവിൽ വെച്ച്‌ ചുട്ടുകരിക്കുകയായിരുന്നുവെന്ന റിപ്പോർട്ടും പുറത്തുവന്നിരുന്നു. ഗോരക്ഷ സേനകളുമായി ഹരിയാന പൊലീസിൻ്റെ വഴിവിട്ട ബന്ധം നേരത്തെ ആരോപണ വിധേയമായിരുന്നു.