ഇരയും കുറ്റാരോപിതനും തമ്മില്‍ ഒത്തുതീര്‍പ്പായി എന്ന കാരണത്താല്‍ പോക്സോ പോലുള്ള ഗുരുതരമായ കേസ് റദ്ദാക്കാന്‍ കഴിയില്ലെന്ന് സുപ്രീം കോടതി. ജസ്റ്റിസുമാരായ അജയ് രസ്‌തോഗി, ബി.വി. നാഗരത്‌ന എന്നിവര്‍ അടങ്ങിയ ബെഞ്ചിന്റേതാണ് ഉത്തരവ്. മുസ്ലിം യൂത്ത് ലീഗ് നേതാവും ഉറുദു അധ്യാപകനുമായ ഹഫ്സല്‍ റഹ്‌മാന് എതിരായ പോക്‌സോ കേസ് റദ്ദാക്കിയതിനെതിരെ സംസ്ഥാന സര്‍ക്കാര്‍ നല്‍കിയ ഹര്‍ജിയിലാണ് സുപ്രീം കോടതി ഉത്തരവ്.

മലപ്പുറം ചെമ്മങ്കടവ് പി.എം.എസ്.എ.എം. ഹയര്‍ സെക്കന്‍ഡറി സ്‌കൂളിലെ ഉറുദു അധ്യാപകനായിരുന്ന ഹഫ്സല്‍ റഹ്‌മാന് എതിരെ 2018 നവംബറിലാണ് പോക്‌സോ നിയമപ്രകാരം പോലീസ് കേസ് രജിസ്റ്റര്‍ ചെയ്തത്. 16 വയസ് മാത്രം പ്രായമുള്ള വിദ്യാര്‍ഥിനികളെ സ്‌കൂളിലെ പ്രിന്‍സിപ്പലിന്റെ മുറിയിലേക്ക് വിളിച്ചുവരുത്തി പീഡിപ്പിച്ചു എന്ന പരാതിയിലാണ് കേസ്. എന്നാല്‍ പ്രതിയുമായി ഒത്തുതീര്‍പ്പിലെത്തി എന്ന് വ്യക്തമാക്കി ഇരകളുടെ അച്ഛനും അമ്മയും ഹൈക്കോടതിയില്‍ സത്യവാങ്മൂലം ഫയല്‍ ചെയ്തു. ഇത് പരിഗണിച്ച ഹൈക്കോടതി കേസ് റദ്ദാക്കിയിരുന്നു.

അച്ഛന്റെയും അമ്മയുടെയും സത്യവാങ്മൂലം പരിഗണിച്ച് പോക്സോ കേസ് റദ്ദാക്കിയ ഹൈക്കോടതി നടപടി തെറ്റാണെന്ന് സംസ്ഥാന സര്‍ക്കാരിന് വേണ്ടി ഹാജരായ സ്റ്റാന്‍ഡിങ് കോണ്‍സല്‍ ഹര്‍ഷദ് വി. ഹമീദ് ചൂണ്ടിക്കാട്ടി. പോക്സോ കേസുകളില്‍ പ്രതിയുമായി ഇരകള്‍ക്ക് ഒത്തുതീര്‍പ്പിലെത്താന്‍ കഴിയില്ലെന്നും ഇക്കാര്യം സുപ്രീം കോടതി തന്നെ മുന്‍ ഉത്തരവുകളില്‍ വ്യക്തമാക്കിയിട്ടുണ്ടെന്നും അദ്ദേഹം ചൂണ്ടിക്കാട്ടി.

അതേസമയം, ഹൈക്കോടതിയില്‍ കേസ് നടന്നിരുന്ന സമയത്ത് കുട്ടികള്‍ പ്രായപൂര്‍ത്തിയായിരുന്നില്ലെന്ന് ഹഫ്സല്‍ റഹ്‌മാന് വേണ്ടി ഹാജരായ അഭിഭാഷകന്‍ ഹാരിസ് ബീരാന്‍ വാദിച്ചു. ഇപ്പോള്‍ പ്രായപൂര്‍ത്തിയായ മൂന്ന് പെണ്‍കുട്ടികളും തങ്ങള്‍ക്ക് പരാതിയില്ലെന്ന് വ്യക്തമാക്കി സുപ്രീം കോടതിയില്‍ സത്യവാങ്മൂലം ഫയല്‍ ചെയ്തിട്ടുണ്ടെന്നും അദ്ദേഹം ചൂണ്ടിക്കാട്ടി.

ഒത്തുതീര്‍പ്പായി എന്ന കാരണത്താല്‍ പോക്സോ പോലുള്ള ഗുരുതരമായ കേസ് റദ്ദാക്കാന്‍ കഴിയില്ലെന്ന് വ്യക്തമാക്കിയ സുപ്രീം കോടതി, എന്നാല്‍ പ്രതിക്ക് കേസ് റദ്ദാക്കുന്നതിന് വീണ്ടും ഹൈക്കോടതിയെ സമീപിക്കാമെന്ന് പറഞ്ഞു. കേസ് മെറിറ്റില്‍ കേട്ട് ഹൈക്കോടതി ഇക്കാര്യത്തില്‍ തീരുമാനം എടുക്കട്ടെയെന്നും സുപ്രീം കോടതി വ്യക്തമാക്കി.

കോൺഗ്രസ് അധ്യക്ഷ പദവി സംബന്ധിച്ച് നിസംഗത ആവർത്തിച്ച് രാഹുൽ ഗാന്ധി. അധ്യക്ഷ സ്ഥാനത്തേക്ക് മത്സരിക്കുമോ എന്നതുൾപ്പെടേയുള്ള കാര്യങ്ങളിൽ നേരിട്ട് മറുപടി പറഞ്ഞില്ല.

ഭാരത് ജോഡോ യാത്രയ്ക്കിടെ കൊച്ചിയിൽ മാധ്യമങ്ങളെ കാണുകയായിരുന്നു അദ്ദേഹം.

കോൺഗ്രസ് അധ്യക്ഷ പദവി ഇന്ത്യയുടെ വികസനം ലക്ഷ്യമിടുന്ന പദവിയാണ്. കോൺഗ്രസ് അധ്യക്ഷനാകുക എന്നത് ഭാരിച്ച ഉത്തരവാദിത്വമാണ്. അതൊരു പദവി മാത്രമല്ല. ആ സ്ഥാനത്തേക്ക് വരേണ്ടത് ആശയങ്ങളും കാഴ്ചപ്പാടുകളും ഉള്ള ആളായിരിക്കണം. ഞാൻ അധ്യക്ഷ സ്ഥാനത്തേക്ക് മത്സരിക്കുമോ ഇല്ലയോ എന്ന ചോദ്യം എല്ലാ കാര്യങ്ങളിൽ നിന്നും ശ്രദ്ധ തിരിച്ചുവിടാനുള്ള ശ്രമമാണ്. ആ ട്രാപ്പിൽ വീഴാൻ ഞാൻ തയ്യാറല്ല. പഴയനിലപാടിൽ മാറ്റമില്ല.

“ഭാരത് ജോഡോ യാത്ര വൻ വിജയമാണ്. കേരളത്തിലെ ജനങ്ങൾ മികച്ച പിന്തുണയാണ് നൽകുന്നത്. ഇത് വളരെയേറെ പ്രചോദിപ്പിക്കുന്നുണ്ട്. യാത്രയുടെ ഉദ്ദേശം രാജ്യത്തെ ഒന്നിപ്പിക്കുക എന്നതാണ്. രാജ്യത്ത് ഇന്ന് അനിയന്ത്രിതമായി തൊഴിലില്ലായ്മ വർധിച്ചുവരികയാണ്. കേരളത്തിലെ മാത്രം പ്രശ്നമല്ല, ഇത് രാജ്യത്തെ മൊത്തം പ്രശ്നമാണ്. ഇതിനുപുറമെ വിലക്കയറ്റവും അനിയന്ത്രിതമായി ഉയരുന്നുണ്ട്. ഈ കാര്യങ്ങളൊക്കെ മുൻനിർത്തിയാണ് യാത്ര ആരംഭിച്ചിരിക്കുന്നത്. ബി.ജെ.പിയും ആർ.എസ്.എസും വർഗീയത വളർത്തുന്നതിനു പിന്നിൽ ഈ മൂന്ന് കാര്യങ്ങളും ബന്ധപ്പെട്ട് കിടക്കുന്നുണ്ട്. രാജ്യത്തെ ജനങ്ങൾ ഇത് തിരിച്ചറിഞ്ഞു തുടങ്ങിയിട്ടുണ്ട്”, രാഹുൽ പറഞ്ഞു.

കേരളത്തിൽ എന്തുകൊണ്ട് ഇത്ര ദിവസം പര്യടനം നടത്തുന്നു, ബി.ജെ.പി. ഭരിക്കുന്ന ഉത്തർപ്രദേശ് ഉൾപ്പെടെയുള്ള സംസ്ഥാനങ്ങളിൽ എന്തുകൊണ്ട് യാത്രയുടെ ദൈർഘ്യം കുറച്ചു എന്ന ചോദ്യത്തിന് ഇന്ത്യയുടെ ഒരറ്റം മുതൽ മറ്റൊരു അറ്റം വരെയാണ് യാത്രയെന്നായിരുന്നു അദ്ദേഹത്തിന്റെ മറുപടി.

ഭാരത് ജോഡോ യാത്ര ഏതൊക്കെ സംസ്ഥാനങ്ങളിൽ കൂടി കടന്നുപോകുന്നു എന്നതല്ല വിഷയം. യാത്രയുടെ ഫലം ഓരോ സംസ്ഥാനങ്ങളിലും പ്രതിഫലിക്കണമെന്നതാണ്. ഇന്ത്യയുടെ ഒരു അറ്റത്തുനിന്ന് മറ്റൊരു അറ്റത്തേക്കാണ് യാത്ര ലക്ഷ്യം വെക്കുന്നത്. അതനുസരിച്ചാണ് യാത്രയുടെ റൂട്ട് തയ്യാറാക്കിയിരിക്കുന്നത്. യു.പിയിൽ കുറച്ചുദിവസം മാത്രമാണ് യാത്ര കടന്നു പോകുന്നത്. പക്ഷെ, ബിഹാറിലോ പശ്ചിമ ബംഗാളിലോ ഗുജറാത്തിലോ യാത്ര കടന്നുപോകുന്നില്ല. യാത്ര ലക്ഷ്യം വെക്കുന്നത് ഇന്ത്യയുടെ ഒരു അറ്റത്തുനിന്ന് മറ്റൊരു അറ്റത്തേക്കാണ്. പതിനായിരക്കണക്കിന് കിലോ മീറ്റർ നടന്നു പോകുക എന്നത് അസാധ്യമാണ്. അതുകൊണ്ടുതന്നെ യാത്രയുടെ റൂട്ടുകളിൽ ചില പരിമിധികളുണ്ടാകും. ഉത്തർപ്രദേശിലെ കാര്യമോർത്ത് ആരും വിഷമിക്കേണ്ട. എന്താണ് ഉത്തർപ്രദേശിൽ ചെയ്യേണ്ടത് എന്ന കാര്യത്തിൽ ഞങ്ങൾക്ക് കൃത്യമായ കാഴ്ചപ്പാടുണ്ട്, രാഹുല്‍ പറഞ്ഞു.

രാഹുൽ പ്രതികരിക്കാൻ തയ്യാറായില്ല. പോപ്പുലർ ഫ്രണ്ടിനെതിരേയുള്ള റെയ്ഡിനെക്കുറിച്ചുള്ള ചോദ്യത്തിന് ഒരു തരത്തിലുള്ള വർഗീയതയും പ്രോത്സാഹിപ്പിക്കാൻ ഉദ്ദേശിക്കുന്നില്ലെന്നായിരുന്നു അദ്ദേഹത്തിന്റെ മറുപടി.

സംസ്ഥാന സർക്കാരിനെ എന്തുകൊണ്ട് വിമർശിക്കുന്നില്ല എന്ന ചോദ്യത്തിന്, കേരളത്തിലെ കാര്യങ്ങൾ വ്യക്തമായി അറിയുന്നത് ഇവിടുത്തെ നേതൃത്വത്തിനാണ്. അവർ അത് ചെയ്തുകൊള്ളുമെന്നായിരുന്നു രാഹുലിന്‍റെ മറുപടി.

കേരളത്തില്‍ നാളെ ഹര്‍ത്താലിന് ആഹ്വാനം ചെയ്ത് പോപ്പുലര്‍ ഫ്രണ്ട്. വെള്ളിയാഴ്ച ആറുമണി മുതല്‍ വൈകിട്ട് ആറുമണി വരെയാണ് ഹര്‍ത്താല്‍. എന്‍.ഐ.എ. നടത്തിയ രാജ്യവ്യാപക റെയ്ഡിലും നേതാക്കളുടെ അറസ്റ്റിലും പ്രതിഷേധിച്ചാണ് ആഹ്വാനം പോപ്പുലര്‍ ഫ്രണ്ട് സംസ്ഥാന കമ്മിറ്റിയാണ് ഹര്‍ത്താൽ പ്രഖാപിച്ചത്.

ദേശീയ, സംസ്ഥാന നേതാക്കളെ എന്‍.ഐ.എ. അറസ്റ്റ് ചെയ്തത് അന്യായമായിട്ടാണെന്നും ഇത് ഭരണകൂട ഭീകരതയാണെന്നുമാണ് പോപ്പുലര്‍ ഫ്രണ്ടിന്റെ ആരോപണം.

പോപ്പുലർ ഫ്രണ്ട് കേന്ദ്രങ്ങളിൽ രാജ്യവ്യാപകമായി റെയിഡ്, നിരവധി പേർ കസ്റ്റഡിയിൽ

ബുധനാഴ്ച അര്‍ധരാത്രി മുതലാണ് രാജ്യവ്യാപകമായി പോപ്പുലര്‍ ഫ്രണ്ടിന്റെ ഓഫീസുകളിലും നേതാക്കളുടെ വീടുകളിലും എന്‍.ഐ.എ. റെയ്ഡ് നടത്തിയത്. കേരളത്തില്‍ വിവിധ ജില്ലകളിലായി 70 കേന്ദ്രങ്ങളിലായിരുന്നു എന്‍.ഐ.എ. പരിശോധന. ദേശീയ ചെയര്‍മാന്‍ ഒ.എം.എ. സലാം, ദേശീയ സെക്രട്ടറി നസറുദ്ദീന്‍ എളമരം എന്നിവരടക്കം 106 പേരെയാണ് രാജ്യവ്യാപകമായി നടത്തിയ റെയ്ഡില്‍ അറസ്റ്റ് ചെയ്തത്.

കേരളത്തില്‍നിന്ന് 22 പേരാണ് അറസ്റ്റിലായത്. സംസ്ഥാന പ്രസിഡന്റ് സി.പി. മുഹമ്മദ് ബഷീര്‍, ദേശീയ കൗണ്‍സില്‍ അംഗം പ്രൊഫ. പി. കോയ എന്നിവരടക്കമുള്ളവര്‍ അറസ്റ്റിലായിട്ടുണ്ട്. കേന്ദ്ര സേനകളെ വിന്യസിച്ചായിരുന്നു കേരളത്തിലെ മിന്നൽ പരിശോധന.

കേന്ദ്ര ഏജന്‍സികളായ എന്‍ഐഎയും ഇ.ഡിയും ബുധനാഴ്ച അര്‍ധരാത്രിയോടെ നാടകീയമായാണ് റെയിഡ് തുടങ്ങിയത്. മഹാരാഷ്ട്രയില്‍നിന്നും കര്‍ണാടകയില്‍നിന്നും 20 പേര്‍ വീതം പിടിയിലായി. തമിഴ്‌നാട്ടില്‍നിന്ന് 10 പേരെയും അസമില്‍നിന്ന് ഒന്‍പത് പേരെയും, ഉത്തര്‍പ്രദേശില്‍നിന്ന് 8 പേരെയും, ആന്ധ്രാപ്രദേശില്‍നിന്ന് 5 പേരെയും, മധ്യപ്രദേശില്‍നിന്ന് 4 പേരെയും, ഡല്‍ഹി, പുതുച്ചേരി എന്നിവിടങ്ങളില്‍നിന്ന് 3 പേരെ വീതവും, രാജസ്ഥാനില്‍നിന്ന് 2 പേരെയും കസ്റ്റഡിയില്‍ എടുത്തിട്ടുണ്ട്.

ചെന്നൈയിലുള്ള പോപ്പുലര്‍ ഫ്രണ്ട് സംസ്ഥാന ആസ്ഥാനത്തും തമിഴ്‌നാട്ടിലെ കോയമ്പത്തൂര്‍, കടലൂര്‍, ഡിണ്ടിഗല്‍, തേനി, തെങ്കാശി എന്നിവിടങ്ങളിലും റെയ്ഡുകള്‍ നടന്നു. അസമില്‍നിന്ന് 9 പേരെയാണ് കസ്റ്റഡിയിലെടുത്തത്. ഗുവഹാട്ടിയിലടക്കം റെയ്ഡുകള്‍ നടന്നു. യുപിയിലെ ലഖ്‌നൗ, ഡല്‍ഹിയിലെ ഷഹീന്‍ബാഗ്, ഖാസിപുര്‍ എന്നിവിടങ്ങളിലും റെയ്ഡുകള്‍ നടന്നുവെന്നാണ് വിവരം. റെയ്ഡിന് പിന്നാലെ ഹൈദരാബാദിലുള്ള പോപ്പുലര്‍ ഫ്രണ്ട് ഓഫീസ് എന്‍ഐഎ സീല്‍ ചെയ്തിട്ടുണ്ട്. സിആര്‍പിഎഫിന്റെയും സംസ്ഥാന പോലീസിന്റെയും സുരക്ഷയോടെ ആയിരുന്നു എല്ലാ സംസ്ഥാനങ്ങളിലും റെയ്ഡ് നടത്തിയത്. 2006 ല്‍ കേരളത്തിലാണ് പോപ്പുലര്‍ ഫ്രണ്ട് എന്ന സംഘടന രൂപംകൊള്ളുന്നത്.

  ഗുജറാത്തിൽ ഈ വർഷം ഇതുവരെ തെരുവുകാലികളുടെ കുത്തേറ്റ് മരിച്ചത് 29 പേർ. തെരുവ് നായ്ക്കളെക്കാൾ ഭീഷണിയാണ് നഗരങ്ങളിലും ചെറു പട്ടണങ്ങളിലും അലഞ്ഞു തിരിയുന്ന കാലികൾ.

ഇത് നിയന്ത്രിക്കാൻ ഗുജറാത്ത് സർക്കാർ കഴിഞ്ഞ ബജറ്റ് സമ്മേളനത്തിൽ പാസാക്കിയ കാലിനിയന്ത്രണ നിയമം ബുധനാഴ്ച പിൻവലിച്ചു. തിരഞ്ഞെടുപ്പ് അടുത്തതോടെ പശുപാലക സംഘങ്ങളുടെ സമ്മദ്ദത്തിൽ സർക്കാർ വഴങ്ങേണ്ടി വരികയായിരുന്നു.

കാലികളെ തുകലിനും ഭക്ഷണത്തിനും വേണ്ടി ഉപയോഗിച്ചിരുന്നത് പുതിയ രാഷ്ട്രീയം മൂലം ഇല്ലാതായി. കർഷകർക്ക് കാലികളുടെ ഉപയോഗം കഴിഞ്ഞാൽ വില കിട്ടാതെയായി. ഉപേക്ഷിക്കപ്പെട്ടവ കൃഷിനാശവും നഗരങ്ങളിൽ അക്രമവുമായി അലയേണ്ട അവസ്ഥയാണ്. പാവപ്പെട്ടവന് പ്രോട്ടീൻ കിട്ടാൻ ഏറ്റവും കുറഞ്ഞ വിലയിൽ മാംസം കിട്ടിയിരുന്നത് ഇവയുടെ മാംസം ലഭ്യമാവുക വഴിയായിരുന്നു. എന്നാൽ പശു രാഷ്ട്രീയത്തിൽ ജനങ്ങളെ വീഴ്ത്തി. ഇപ്പോൾ ഏതെങ്കിലും തരത്തിൽ ഇവയെ നിയന്ത്രിക്കാൻ ശ്രമിച്ചാൽ ആൾക്കൂട്ട കൊലപാതകം ആവർത്തിക്കും.

രോഗം ബാധിച്ചും മുറിവേറ്റും തെരുവുകളിൽ അലയുന്ന കാലികൾ നഗരത്തിരക്കിൽ അക്രമാസക്തമാവുന്നത് പതിവാണ്. മാത്രമല്ല ചാണകവും മൂത്രവുമായി തെരുവുകൾ മലീമസമാവുകയും ചെയ്യും. കഴിഞ്ഞ ഓഗസ്റ്റ് 13-ന് മുൻ മുഖ്യമന്ത്രി നിതിൻ പട്ടേലിനെ തിരംഗായാത്രയ്ക്കിടെ തെരുവുപശു കുത്തിത്താഴെയിട്ടിരുന്നു.

ഇക്കാര്യം ചൂണ്ടികാട്ടി കഴിഞ്ഞ ഒഗസ്റ്റിലും ഹൈക്കോടതി കാലി നിയന്ത്രണം കർശനമാക്കാൻ ആവശ്യപ്പെട്ടിരുന്നു. കാലികൾ അലഞ്ഞു തിരിയുന്നത് മൂലം നഗരങ്ങളിൽ വാഹന അപകടവും വർധിച്ചു വന്നു. കാലികളിൽ നിന്നും മനുഷ്യരിലേക്ക് പടരുന്ന ചർമ്മ രോഗത്തെ കുറിച്ചുള്ള ആശങ്കയും വാർത്തയായി.

എട്ട് കോർപ്പറേഷനുകളിലും 156 നഗരസഭകളിലും കാറ്റിൽ പോണ്ടുകൾ നിർമ്മിച്ച് പ്രശ്നം പരിഹരിക്കാൻ ശ്രമിച്ചു എങ്കിലും കാലികൾ നിരത്തിലെത്തി. 156 പേരെ കാലിനിയന്ത്രണത്തിനായി നിയമിച്ചിരുന്നു. ആറുവർഷം കൊണ്ട് 257 കോടി രൂപ ശമ്പള ഇനത്തിൽ മാത്രം ചിലവഴിച്ചു. 281 കോടി രൂപ മൊത്തം ചിലവഴിച്ചു. കോടതി നിർദ്ദേശ പ്രകാരം കാലികളെ റജിസ്ത്ര് ചെയ്യാൻ ഉത്തരവിറക്കി എങ്കിലും പത്തു ശതമാനം പേർ പോലും തയാറായില്ല.

സർക്കാർ കണക്കിൽ തന്നെ അയ്യായിരത്തോളം പേരെ ഇതുവരെ അലഞ്ഞുതിരിയുന്ന പശുക്കളും മൂരിക്കുട്ടൻമാരും കുത്തിപ്പരിക്കേൽപ്പിച്ചു. പശുക്കളെയും കാളകളെയും കൊല്ലുന്നത് സംസ്ഥാനത്ത് ജീവപര്യന്തം തടവു കിട്ടാവുന്ന കുറ്റമാണ്.

പട്ടണങ്ങളിൽ മേച്ചിൽപ്പുറങ്ങൾ ഇല്ലാതായി. ഇത്തരം കാലികൾക്ക് തീറ്റയും പരിചരണവും ഇല്ല. ഹൈക്കോടതിയുടെ ഇടപെടൽ കൂടിയായപ്പോഴാണ് കഴിഞ്ഞ ഏപ്രിലിൽ നിയമം കൊണ്ടുവന്നത്.

ഗാന്ധിനഗറിൽ കഴിഞ്ഞദിവസം മാൽധാരി മഹാപഞ്ചായത്ത് ചേർന്ന് നിയന്ത്രണ നിയമം പിൻവലിക്കാൻ ബി.ജെ.പി. സർക്കാരിന് അന്ത്യശാസനം നൽകിയിരുന്നു. നിയമസഭ ചേർന്ന ബുധനാഴ്ച സംസ്ഥാനത്ത് പാൽബന്ദ് നടത്തി. ആശുപത്രികളിലും തെരുവുകളിലും പാൽ സൗജന്യവിതരണം നടത്തിയും പുഴയിലൊഴുക്കിയുമൊക്കെയായിരുന്നു പ്രതിഷേധം. പശു രാഷ്ട്രീയം ഉയർത്തി നേടിയ വോട്ടുകൾ നഷ്ടമാവും എന്ന നിലയായി.

തുടർന്ന് നിയമസഭയിൽ നഗരവികസനസഹമന്ത്രി വിനോദ് മൊറാദിയ നിയമം പിൻവലിക്കാൻ അനുമതി തേടി. ആറുമാസം മുമ്പ് പാസാക്കിയ നിയമം ഗവർണർ ഒപ്പിടാതെ കഴിഞ്ഞദിവസം മടക്കി. പുലരുവോളം ചർച്ച ചെയ്തും പ്രതിപക്ഷത്തിന്റെ എതിർപ്പ് മറികടന്നും കൊണ്ടുവന്ന നിയമമാണ് ഒറ്റയടിക്ക് റദ്ദാക്കിയത്.

എന്നാൽ കോൺഗ്രസ് ഇവിടെ പശുരാഷ്ട്രീയം തിരിച്ച് മുതലെടുക്കുകയായിരുന്നു. കാലിനിയന്ത്രണ ബില്ലിനെതിരേ തുടക്കംമുതൽ നിലപാടെടുത്ത കോൺഗ്രസ് ഇത് മുതൽക്കൂട്ടി.