അടുത്തമാസം നടക്കുന്ന എ ഐ സി സി അധ്യക്ഷ തിരഞ്ഞെടുപ്പില്‍ രാഹുല്‍ ഗാന്ധി മത്സര രംഗത്തു വരില്ല. വാര്‍ത്താ ഏജന്‍സിയായ എ.എന്‍.ഐ കോൺഗ്രസ് ഉന്നത വൃത്തങ്ങളെ ഉദ്ദരിച്ച് വാർത്ത പുറുത്തു വിട്ടു.

ഭാരത് ജോഡോ യാത്ര പുതിയ തരംഗമാക്കാനുള്ള ശ്രമമാണ്. ഇതിനിടെ രാഹുൽ ഡല്‍ഹിയ്ക്ക് പോകില്ല. യാത്രയുടെ വിജയവും ജനങ്ങളെ അടുത്തറിയാനുള്ള അവസരത്തിൻ്റെ ഊർജ്ജവും ഒന്നിച്ച് അനുഭവിക്കുന്ന സാഹചര്യത്തിലാണ് രാഹുൽ. ഇതിനെ പാർട്ടിക്കായി മുതൽ കൂട്ടുക. ഇപ്പോഴത്തെ സാഹചര്യത്തിൽ വിവാദങ്ങളിലേക്ക് ഇറങ്ങി നഷ്ടങ്ങൾക്ക് അവസരം നൽകാതിരിക്കുക എന്നതും ലക്ഷ്യം വെക്കുന്നു.

കോണ്‍ഗ്രസ് അധ്യക്ഷസ്ഥാനത്തേക്ക് മത്സരിക്കാനുള്ള നാമനിര്‍ദേശ പത്രിക സമര്‍പ്പിക്കാനുള്ള അവസാന തീയതി സെപ്റ്റംബര്‍ മുപ്പതാണ്. ഒക്ടോബര്‍ 17-നാണ് കോണ്‍ഗ്രസ് അധ്യക്ഷസ്ഥാനത്തേക്കുള്ള തിരഞ്ഞെടുപ്പ്.

തമിഴ്‌നാട്ടില്‍നിന്ന് ആരംഭിച്ച് ഇപ്പോള്‍ കേരളത്തിലൂടെ കടന്നുപോകുന്ന ഭാരത് ജോഡോ യാത്ര സെപ്റ്റംബര്‍ 29-നാണ് കര്‍ണാടകയില്‍ പ്രവേശിക്കുക.

ചൊവ്വാഴ്ച കോണ്‍ഗ്രസ് നേതാവ് കെ.സി. വേണുഗോപാല്‍ ഡല്‍ഹിയിലെത്തി സോണിയാ ഗാന്ധിയുമായി കൂടിക്കാഴ്ച നടത്തിയിരുന്നു. ഭാരത് ജോഡോ യാത്രയില്‍ പങ്കെടുക്കുന്നതിനിടയിലാണ് അദ്ദേഹത്തെ സോണിയ, ഡല്‍ഹിയിലേക്ക് വിളിപ്പിച്ചത്. സംഘടനാപരമായ കാര്യങ്ങള്‍ ചര്‍ച്ച ചെയ്യാനാണ് വേണുഗോപാലിനെ സോണിയ വിളിപ്പിച്ചതെന്ന് അദ്ദേഹവുമായി അടുത്ത വൃത്തങ്ങള്‍ പ്രതികരിച്ചു.

ശശി തരൂരിന് അധ്യക്ഷസ്ഥാനത്തേക്ക് മത്സരിക്കാന്‍ തിങ്കളാഴ്ച സോണിയാ ഗാന്ധി അനുമതി നല്‍കിയിരുന്നു. ഇത് കോൺഗ്രസിന് പുതിയ ഒരു വഴിത്തിരിവ് കൂടി സൃഷ്ടിക്കുക എന്ന നയത്തിൻ്റെ കൂടി ഭാഗമായി വിലയിരുത്തപ്പെടുന്നു. ജി 23 നേതാക്കളിൽ നിന്നാണ് തരൂർ രംഗത്ത് എത്തുന്നത്. എന്നാൽ രാജസ്ഥാൻ മുഖ്യമന്ത്രി അശോക് ഗെഹ്ലോത്ത് നാമനിർദ്ദേശ പത്രിക സമർപ്പിച്ചേക്കും. നേരത്തെ മുഖ്യമന്ത്രി സ്ഥാനം നിലനിർത്തുന്നത് ഉൾപ്പെടെ ഉപാധികൾ വെച്ചിരുന്നതാണ് ഇദ്ദേഹം. തരൂർ രംഗത്ത് എത്തുന്നതോടെ ഇതിനും മാറ്റം വരികയാണ്.

നടിയെ ആക്രമിച്ച കേസിൽ വിചാരണക്കോടതി മാറ്റണമെന്നാവശ്യപ്പെട്ട് അതിജീവിത സമർപ്പിച്ച ഹർജി ഹൈക്കോടതി ഇന്ന് പരിഗണിക്കും. ജസ്റ്റിസ് എ.എ. സിയാദ് റഹ്‌മാന്റെ ബെഞ്ചാണ് ഹർജി പരിഗണിക്കുന്നത്.

അതിജീവിത നേരത്തെ തന്നെ വിചാരണക്കോടതി ജഡ്ജി ഹണി എം. വർഗീസിൽ അവിശ്വാസം രേഖപ്പെടുത്തിയിരുന്നു. ഇക്കാര്യം അടക്കം ചൂണ്ടിക്കാട്ടി ഹൈക്കോടതി രജിസ്ട്രാർക്ക് പരാതിയും നൽകിയിരുന്നു.

വിചാരണക്കോടതി മാറ്റണമെന്ന പ്രധാന ആവശ്യത്തിന് പുറമെ വിചാരണ സ്റ്റേ ചെയ്യണമെന്ന ഇടക്കാല ആവശ്യവും അതിജീവിത ഉന്നയിച്ചിട്ടുണ്ട്. ആവശ്യത്തെ നടൻ ദിലീപ് ശക്തമായി എതിർത്തു. എറണാകുളം പ്രിൻസിപ്പൽ സെഷൻസ് കോടതിയിൽ നിന്ന് വിചാരണ മാറ്റണമെന്നാണ് അതിജീവിതയുടെ ഹർജി.

ഗുജറാത്തിലെ എ.എ.പിയുടെ പ്രവര്‍ത്തനങ്ങള്‍ റിപ്പോര്‍ട്ട് ചെയ്യരുതെന്ന് പ്രധാനമന്ത്രിയുടെ ഉപദേഷ്ടാവ് ഹിരണ്‍ ജോഷി നിരവധി ടെലിവിഷന്‍ ചാനലുകളുടെ ഉടമകളെയും എഡിറ്റര്‍മാരെയും ഭീഷണിപ്പെടുത്തിയതായി ഡല്‍ഹി മുഖ്യമന്ത്രി കെജ്‌രിവാള്‍. ഹിരണ്‍ ജോഷിയുടെ സന്ദേശങ്ങളുടെ സ്‌ക്രീന്‍ ഷോട്ടുകള്‍ ഈ എഡിറ്റര്‍മാര്‍ പങ്കുവെച്ചാല്‍ പ്രധാനമന്ത്രിയും അദ്ദേഹത്തിന്റെ ഉപദേശകനും തല്‍സ്ഥാനങ്ങളില്‍ ഉണ്ടാവില്ല, കെജ്രിവാള്‍ പറഞ്ഞു.

ഗുജറാത്ത് തിരഞ്ഞെടുപ്പില്‍ തിരിച്ചടിയുണ്ടാകുമെന്ന് ഭയന്ന് എ.എ.പിയെ തകര്‍ക്കാന്‍ ബി.ജെ.പി. സര്‍ക്കാര്‍ ശ്രമിക്കുകയാണ്. ആംആദ്മി പാര്‍ട്ടി മന്ത്രിമാരെയും നേതാക്കളെയും കള്ള അഴിമതിക്കേസുകളില്‍ കുടുക്കാന്‍ ശ്രമിക്കുന്നു- എ.എ.പിയുടെ തിരഞ്ഞെടുക്കപ്പെട്ട പ്രതിനിധികളുടെ യോഗത്തില്‍ അദ്ദേഹം പറഞ്ഞു.

ഗുജറാത്ത് നിയമസഭാ തിരഞ്ഞെടുപ്പിന് മുന്നേതന്നെ എ.എ.പിക്ക് ലഭിച്ച വലിയ ജനപിന്തുണ ബി.ജെ.പിയെ പടിച്ചുകുലുക്കിയിരിക്കുകയാണെന്ന് കെജ്‌രിവാള്‍ പറഞ്ഞു.

ജനങ്ങള്‍ക്ക് നല്‍കുന്ന സൗജന്യങ്ങള്‍ നല്ലതല്ലെന്ന് പറയാന്‍ സത്യസന്ധതയില്ലാത്ത, അഴിമതിക്കാരനും രാജ്യദ്രോഹിയുമായ ഒരാള്‍ക്കു മാത്രമേ കഴിയൂ. ജനങ്ങള്‍ക്കു നല്‍കുന്ന സൗജന്യങ്ങള്‍ രാജ്യത്തിന്റെ സാമ്പത്തിക സ്ഥിതിയെ തകര്‍ക്കുമെന്ന് ഒരു രാഷ്ട്രീയ നേതാവ് പറഞ്ഞാല്‍, അയാള്‍ക്ക് തെറ്റായ ഉദ്ദേശ്യമുണ്ടെന്നു വേണം കരുതാന്‍, കെജ്‌രിവാള്‍ പറഞ്ഞു.